Ichimlik suvi va oqova suv tarmoqlaridagi holat qatʼiy nazoratda

Suv – hayot manbai. Uning beqiyos qadri va ijtimoiy ahamiyati ayniqsa, ekologik vaziyat oʻziga xos boʻlgan Orolboʻyi mintaqasida yanada yaqqolroq namoyon boʻladi. Shu boisdan ham, aholini toza ichimlik suvi bilan uzluksiz taʼminlash, oqova suv tarmoqlarining sifatli va barqaror ishlashini nazorat qilish bugungi kunning eng dolzarb vazifalaridan sanaladi.

Qoraqalpogʻiston Respublikasi qurilish va uy-joy kommunal xoʻjaligi sohasida nazorat qilish inspektsiyasi tomonidan ichimlik suvi hamda oqova suv sohasida xizmatlar koʻrsatish sifatini oshirish, tizimdagi mavjud muammolarni bartaraf etish boʻyicha keng koʻlamli, maqsadli ishlar amalga oshirilmoqda.

Inspektsiya hamda Oʻzbekiston mahallalar uyushmasi oʻrtasida tasdiqlangan maxsus memorandumga asosan, joriy yilning birinchi yarmi davomida respublika boʻylab jami 119 ta ovul va mahallalarda oʻrganishlar va monitoring tadbirlari oʻtkazildi. Ushbu oʻrganish ishlari davomida 17 ta mahalla hududida ichimlik suvi taʼminoti hamda oqova suv xizmatlarini koʻrsatishda turli xil kamchiliklar va muammolar borligi aniqlandi. Holat yuzasidan zudlik bilan tegishli amaliy choralar koʻrilib, “Qoraqalpoq suv taʼminoti” aktsiyadorlik jamiyatiga mazkur kamchiliklarni tezkorlik bilan bartaraf qilish boʻyicha qatʼiy koʻrsatmalar berildi. Natijada aniqlangan tizimli muammolarning qariyb barchasi shu joyning oʻzida ijobiy hal etilishiga erishildi.

Bu kabi nazorat va aholi bilan ishlash tadbirlari shu kunlarda ham izchil davom ettirilmoqda. Xususan, Inspektsiya mutaxassislari Amudaryo tumanida ham xizmat safarida boʻlib, Mangʻit shahrida joylashgan Gulzor va Farovon mahalla fuqarolar yigʻinlari binolarida aholi va masʼullar ishtirokida uchrashuv oʻtkazdilar.

Tadbir davomida mahallalar maʼmuriyatiga birinchi galda aholini toza ichimlik suvi bilan taʼminlash sifati ustida qatʼiy jamoatchilik nazoratini oʻrnatish kerakligi batafsil tushuntirildi. Shuningdek, amaldagi qonunchilik normalariga soʻzsiz rioya qilish, suvni isrof qilmasdan, tejamkorlik bilan foydalanish, suv va kanalizatsiya tarmoqlariga oʻzboshimchalik bilan ulanish holatlarining oldini olish, eng asosiysi, koʻrsatilgan kommunal xizmatlar uchun toʻlovlarning oʻz vaqtida amalga oshirishni taʼminlash borasida hamkorlikda ish olib borish zarurligi alohida taʼkidlab oʻtildi. Shu bilan birga, aholining huquqiy va ekologik madaniyatini oshirish maqsadida keng qamrovli targʻibot ishlarini yanada kuchaytirish lozimligi qayd etildi.

Muloqotlar davomida yana bir muhim masalaga alohida eʼtibor qaratildi. Ichimlik hamda oqova suv inshootlari va tarmoqlarda yuzaga kelishi mumkin boʻlgan turli avariyalar boʻyicha taʼminotchilarni zudlik bilan ogohlantirish, shuningdek, rejali oʻchirishlar va texnik taʼmirlash ishlari olib boriladigan vaqtlarda isteʼmolchilarni oldindan xabardor qilishning muhim ahamiyati haqida mahallalar masʼullariga tegishli maʼlumotlar berildi. Zero, aholining oldindan ogohlantirilishi turli tushunmovchiliklarning oldini oladi va ularga oʻz vaqtida zarur suv zaxirasini shakllantirib olish imkonini beradi.

Aytish joizki, joriy yil boshidan buyon inspektsiya tomonidan Qoraqalpogʻiston Respublikasi boʻyicha jami 17 ta avariya holati aniqlangan boʻlib, shundan ichimlik suv tarmoqlarida 16 ta va oqova suv tarmoqlarida 1 ta holat qayd etilgan. Bunday noxush vaziyatlarni zudlik bilan bartaraf etishga qaratilgan aniq koʻrsatmalar kiritilib, belgilangan tartibda va oʻz vaqtida taʼmirlash, tiklash hamda bartaraf etish choralari koʻrilgan.

Suv taʼminoti tizimining uzluksiz ishlashini taʼminlash nafaqat soha xodimlari, balki barchamizning doimiy eʼtiborimizda boʻlishi lozim boʻlgan umummilliy masaladir. Isteʼmolchilarga sifatli xizmat koʻrsatilishi va suvdan oqilona, tejamkorlik bilan foydalanilishi esa yurtimiz farovonligi hamda ekologik barqarorlikning kafolatidir.