AMUDARYoDA 221 TONNA “KUMUSh TOLA” XIRMONI BUNYoD ETILDI

Tumanimizda joriy dehqonchilik yilining ilk hosil xirmoni bunyod etildi. Amudaryolik pillakorlar 221 tonnalik yuqori sifatli xom ashyo yetishtirib, zimmalaridagi shartnomaviy rejalarini ortigʻi bilan bajaradilar.

Pillachilik – sermashaqqat soha. Bu sohada muvaffaqiyatga erishib, moʻl hosil olishning oʻzi boʻlmaydi. Shu sababli amudaryolik pillakorlar joriy yilgi ipak qurti boqish mavsumiga ham puxta hozirlik koʻrdilar.

Avvalo, ipak qurti urugʻini jonlantirish uchun 16 ta inkubatoriy zarur jihozlar bilan taʼminlanib, har bir inkubatoriyga tajribali va oʻz kasbining bilimdonlari boʻlgan mutaxassislar ishga jalb etildi. 3960 quti ipak qurti urugʻi agrotexnika qoidalariga rioya qilgan holda jonlantirilib, 1607 nafar kasanchilarga 1703 quti, fermer xoʻjaliklariga 2257 quti ipak qurti urugʻi shartnoma asosida tarqatib berildi va ipak qurtini parvarishlash, oziqlantirish jarayonlari malakali mutaxassislar tomonidan qatʼiy nazorat qilib borildi.

Bundan tashqari, mavsum davomida tut bargi taqchilligining oldini olish maqsadida kasanachilar va fermer xoʻjaliklari qaramogʻidagi mavjud tutzorlarda mart oyi boshidanoq zarur agrotexnik tadbirlar amalga oshirilib, “Jayxun silk” masʼuliyati cheklangan jamiyati korxonasi tomonidan yangi tutzorlar barpo etildi va bu yangi tutzorlarga 334,8 ming tup serhosil tut koʻchatlari oʻtqazildi.

Ipak qurti urugʻini tarqatish jarayonida kasanachi-pillakorlarga har bir quti ipak qurti urugʻi uchun oldindan 250 ming soʻmdan boʻnak pullari berildi. Shu bilan birga mavsum ishlarini sifatli va uyushqoqlik bilan oʻtkazish maqsadida malakali mutaxassislar qurtxonalarda tez-tez boʻlishib, jarayonni toʻliq nazorat qilib borishlari uchun sharoitlar yaratildi. Natijada tumanimizdagi barcha qurtxonalarda moʻl va sifatli pilla hosili yetishtirildi. Pillakorlarimiz joriy yilning 29-may sanasida oʻzlari yetishtirgan yilimizning birinchi hosili – pilla topshirishni boshlab yubordilar.

Shuni alohida qayd etish joizki, “Mangʻit Pilla” masʼuliyati cheklangan jamiyatiga qarashli Mangʻit va Xitoy pilla qabul qilish maskanlari mavsumga oʻz vaqtida taxt qilib qoʻyilgani tufayli pillani qabul qilish jarayoni uzluksiz olib borilishiga erishildi. Buning uchun Mangʻit pilla qabul qilish maskaniga 50 nafar, Xitoy pillaxonasiga 20 nafar mavsumiy ishchilar ishga qabul qilinib, ularning mehnati bilan qabul qilib olingan pilla hosili peshma-pesh quritilib, oʻz vaqtida gʻumbagidan sifatli ajratib olinishiga alohida eʼtibor qaratilmoqda. Mazkur pilla qabul qilish maskanlarida yaratilgan shart-sharoitlardan pillakorlar ham mamnun.

Pillachilikni yetti xazinaning biri, deyishadi. Shu bilan birga oʻta nozik va eʼtibortalab soha. Yetishtirilgan hosilning sifati esa pillakorning fidoyi mehnatiga bogʻliq. Fidoyilik bilan qilingan mehnat esa har tomonlama eʼtirof etilib, ragʻbatlantirib borilgani bois, pillakorlarning joriy yilgi mavsum yakunidan kayfiyatlari baland. Chunki rejadan tashqari yetishtirilgan har bir kilogramm pilla uchun pillani qabul qilish maskanining oʻzidayoq 25 ming soʻmdan ish haqi berilgani, rejadagi pilla hosilining har bir kilogrammi uchun 22 ming 440 soʻmdan hisob-kitob qilinishi  pillakorlar mehnatiga munosib ragʻbat boʻldi.

Oʻz kasbining bilimdonlari boʻlgan soha mutaxassislari va mohir pillakorlar mehnati tufayli shartnomaviy rejadagi 221 tonna oʻrniga 223,7 tonna yuqori sifatli pilla hosili yigʻilishtirib olinib, bu boradagi reja 101,2 foizga ortigʻi bilan ado etildi. Yetishtirilgan hosilning 163,9 tonnasi Mangʻit, 59,8 tonnasi Xitoy pilla qabul qilish maskanlari tomonidan qabul qilinib, ayni paytda pillani sifatli quritish, saralash va oʻz vaqtida gʻumbagidan ajratish kabi mavsum ishlari uyushqoqlik bilan olib borilmoqda.

Robiya Yoʻldosheva.