IPAK QURTLARI DASTALARDA SIFATLI PILLA OʻRAMOQDA

Ayni kunlarda zimmalaridagi rejalarini har yili ortigʻi bilan ado etib kelayotgan tumanimiz pillakorlari joriy yilgi ipak qurti boqish mavsumini uyushqoqlik bilan olib borishmoqda.

May oyining birinchi oʻn kunligida tumanimizning turli hududlarida tashkil etilgan ipak qurtini jonlantirish inkubatoriyalarida «JAYHUN SILK» MChJ tomonidan 3960 quti xorijiy, serhosil navli ipak qurti urugʻlari jonlantirilib, 1607 nafar kasanachilarga  pillachilik fermer xoʻjaliklariga tarqatib berildi. Ipak qurti parvarishi bilan shugʻullanuvchilarga har bir quti ipak qurti uchun mavsum boshida oldindan 250 ming soʻmdan boʻnak puli berildi.

Ipak qurti parvarishi mavsumi davomida pillakorlarga qulaylik yaratish, ozuqa taqchilligi yuz bermasligi uchun tumanimizning barcha hududlaridagi tutzorlarga erta bahordanoq sifatli ishlov berilib, oziqlantirildi va natijada tutzorlarda moʻl ozuqa bazasi yaratildi. Bundan tashqari, yangidan tutzorlar bunyod etilib, sara tut koʻchatlari oʻtqazildi.

Ayni paytda pillakorlar tomonidan mehr bilan parvarish qilingan ipak qurti beshinchi yoshda, yaʼni pilla oʻrash bosqichiga kirgan Toʻlqin ovuli hududidagi “Qurbonboyev Sobir” fermer xoʻjaligining mohir pillakorlaridan biri Maʼrifat Hayitboyeva 2002  yildan beri har yilgi mavsumda 20 gramm ipak qurtini parvarishlab, zimmasidagi rejasini ortigʻi bilan bajarib keladi. Mohir pillakor joriy yilgi mavsumda ham xonadoni qurtxonasida 20 gramm ipak qurtini parvarish qildi. Unga bu ishda oila aʼzolari yaqin koʻmakdosh boʻlishdi. Maʼrifat Hayitboyeva rejadagi 56 kilogrammni oʻrniga har yili 90 kilodan ziyod yuqori sifatli pilla hosili yetishtirib beradi. Joriy yil mavsumda esa u 85 kilogramm pilla topshirishni rejalashtirgan. Ayni paytda Maʼrifat Hayitboyeva qurtxonasidagi ipak qurtiga dasta qoʻygan va tez kunda pilla hosilini terib olish niyatida.

Robiya YOʻLDOShEVA.