TUMAN TIBBIYoT BIRLAShMASIDA “XALQARO HAMShIRALAR KUNI” KENG NIShONLANDI

Hamshiralik kasbi butun dunyoda bemorlarga davo muolajalarini qilib dardiga darmon baxsh etadigan  kasb sifatida qadrlanadi. Shu boisdan ham 12-may sanasi “Xalqaro hamshiralar kuni” deb eʼtirof etilgan.

Jahon Sogʻliqni saqlash tashkiloti tomonidan ushbu sana har yili oʻzgacha shior bilan butun dunyo boʻylab nishonlanishi tavsiya etiladi. Shiorlarda fuqarolarning sogʻligʻini saqlashda hamshiralarning oʻrni va mavqei oʻz aksini topadi.

Shu munosabat bilan mamlakatimizda ham har yili 12-may – Xalqaro hamshiralar kuni keng nishonlanadi. Sana munosabati bilan ilmiy-amaliy seminarlar, turli bayram tadbirlarini oʻtkazish anʼanaga aylanib bormoqda. Chunki, hamshira deganda koʻz oldimizda qoʻli yengil, soʻzi shirin, yuzi doim kulib turadigan, koʻngli egnidagi xalatiday oppoq, har qanday vaziyatda dard chekayotgan insonga yordamga shay malakali mutaxassis gavdalanadi. Odamlar ular xizmatidan minnatdor boʻlib yashaydilar.

Shu yil 11-may kuni tuman Tibbiyot birlashmasida ham 12-may – Xalqaro hamshiralar kuni munosabati bilan tadbir boʻlib oʻtdi. Unda birlashma bosh shifokori Faxriddin Abdullayev soʻzga chiqib, sohada faoliyat yuritayotgan oʻrta tibbiyot xodimlarini kasb bayrami bilan qizgʻin qutladi.

Shuningdek, Tibbiyot maskanlarida davolangan bemorlarning  sogʻayib oilasi bagʻriga qaytishida muolajalarni mehr bilan amalga oshirayotgan, xastalarga shirin muomalasi bilan ham dalda boʻlayotgan hamshiralarning kelgusidagi faoliyatiga muvaffaqiyatlar tiladi.

Taʼkidlash joizki, tibbiyot sohasida hamshiralarning oʻrni alohidadir. Eng soʻnggi tibbiyot texnologiyalari asosida oʻtkaziladigan murakkab operatsiyalarni muvaffaqiyatli oʻtkazishdan tortib, operatsiyadan soʻng bemorni parvarishlash, ona-bola parvarishi, shoshilinch va tez tibbiy xizmat sohasida, farmatsevtika sohasida hamshiralarning fidoyi xizmatlarini hech narsaga qiyoslab boʻlmaydi.

Kasb bayrami arafasida ular sharafiga tadbir tashkillashtirilgani tumanimiz tibbiyot sohasida  mehnat qilayotgan hamshiralarga ulkan quvonch baxsh etdi.

Tadbirda aholi salomatligini muhofaza qilishda samarali faoliyat yuritayotgan 48 nafar hamshiralarga tuman Tibbiyot birlashmasi va kasaba uyushma qoʻmitasining qimmatbaho sovgʻalari topshirildi.

Oʻz faoliyatlariga qaratilgan eʼtibor va ragʻbatdan xursand boʻlgan hamshiralar birlashma maʼmuriyatiga  va kasaba uyushma qoʻmitasiga oʻz minnatdorchiligini bildirdilar, butun salohiyati va bilimini aholi sogʻligʻini muhfoaza qilishga, kasbiy burchini ado etishda etishga safarbar etishini bildirdilar.

Oygul RAJABOVA.