“Sharaf tojini izlama, ona rizoligini izla”

Ayol bu - shunday bir shirin xilqatki, uning bergan mehridan nihol (farzand) unib oʻsadi ulgʻayadi,gullaydi meva beradi. Koʻksi ostidan mehr ila bergan oppoq suti bilan farzandini koʻz qorachigʻiday asrab, unga gard yuqishiga hech ham yoʻl qoʻymaydi. Yuzlaridagi ajinlar albatta, farzandlarining kamoli uchun tinim bilmasdan qilgan mehnati tufayli, qoʻllari qadoq, yuzlari esa ajinga toʻladi. Baʼzan ojiza, baʼzan himoyachi, baʼzan yigʻloq, baʼzan shunchalar baquvvatki, sabri oldida togʻlar ham boshini egadi. Oʻzi mehrning bulogʻi boʻlsada, doim mehrga tashna, vaqtida yosh boladek erkatoy, oʻrni kelganda pahlavondek kuchli, baʼzida oʻta jahldor, baʼzan muloyim. U necha yoshda boʻlmasin, qanchalik kuchli koʻrinmasin, baribir qalbda, u doim mehrga muhtoj. Siz unga shunday mehr beringki, toki u dunyoda sizdan boshqa hech kimdan mehr izlamasin.

Dunyoda ayol oʻz turmush oʻrtogʻining onasi vazifasini bajarar ekanlar. Sababi ayol oʻz erlarining ovqatiga, kiyimlariga qaraydigan, kasal boʻlib qolsa eri boshida parvona boʻluvchi eng birinchi inson bu oʻz ayoli boʻlar ekan. Kayfiyati yoʻq boʻlsa, koʻnglini oladigan, boriga ham, yoʻgʻiga ham shukur qilib, uyini fayz-u barakaga toʻldirib oʻtiradigan inson bu albatta, ayol ekan! Bolaligimizda maktabdan yoki boshqa joydan kelsak, birinchi navbatda oʻz onamizni izlaymiz, to hozirgi kungacha. Zero, ular boʻlmasa uy boʻm-boʻsh turgandek tuyuladi, hattoki dadamiz oʻtirsa ham. Shuning uchun ham ona ana shu qoʻrgʻonning posboni, oilaning muqaddasligini taʼminlovchi moʻʼtabar insondir.

Qurʼoni karimda, hadislarda ayol – onani ulugʻlash kerakligi haqida koʻplab ibratli koʻrsatmalar bor. Ularning hammasi ayol – onaning oilada tutgan oʻrnidan kelib chiqib aytilgan, albatta. Negaki, dunyoga yangi kelgan farzand uchun oila – ilk tarbiya maskani, shu muqaddas dargohning maʼnaviy – axloqiy muhitini farzandiga tushuntiruvchi va oʻrgatuvchi moʻʼtabar zot onadir.

Bu hayotda hammamiz mehmonmiz. Hech kim mezbon emas. Ikki narsa insonda bardavom boʻlmaydi: Yoshlik va Quvvat. Ikki narsa hammaga foyda beradi: Yaxshi xulq va bagʻrikenglik!!! Va bu ikki kunlik dunyoda oʻz hayotimizni ezgu amallar bilan bezaylik. Onalarimizni borida qadrlaylik. Ollohim rizqimizga baraka, xonadonimizga tinchlik, ruhimizga xotirjamlik ato etib, barchamizni oʻz panohida asrasin.

Yulduzxon SAFARBOYeVA, Nukus shahar 1-sonli kasb-hunar maktabi
oʻzbek tili oʻqituvchisi.