“MAHALLADA KAMBAGʻAL OILALAR SONINI KAMAYTIRISh” LOYIHASI DOIRASIDA TADBIR OʻTKAZILDI

16-aprel kuni Oʻzbekiston Xalq demokatik partiyasi Markaziy Kengashi, Partiyaning Oʻzbekiston Respublikasi Oliy Majlis Qonunchilik palatasidagi fraktsiyasi va Qoraqalpogʻiston Respublika Kengashi bilan hamkorlikda “Mahallada kambagʻal oilalar sonini kamaytirish” loyihasi doirasida amaliy tadbir oʻtkazildi. Tafsilotlar dastlabki lavhamizda.

Mamlakatimizda aholi muammolarini hal etish, yangi ish oʻrinlari yaratish, kambagʻallikni qisqartirishda “Temir daftar”, “Ayollar daftari” va “Yoshlar daftari” joriy etilgani ijobiy natijalar bermoqda. Oliy Majlis Qonunchilik palatasidagi Oʻzbekiston Xalq demokatik partiyasi fraktsiyasi aʼzolari joylarda aholi bilan ishlashning “mahallabay”, “fuqarobay” tizimi hamda “Ayollar daftari” va “Yoshlar daftari” boʻyicha amalga oshirilayotgan ishlarni bevosita oʻrganmoqda.

Bu borada Amudaryo tumanida ham tizimli ishlar yoʻlga qoʻyilgan. Ushbu daftarlarga kiritilgan fuqarolarning muammolarini oʻrganish, ularga amaliy yordam koʻrsatishga Xalq demokratik partiyasi deputatlari ham hissa qoʻshishmoqda. Ularning bevosita koʻmagi bilan “Temir daftar” va “Ayollar daftari”ga kiritilgan ayollar, “Yoshlar daftari”da roʻyxatda turgan yoshlar  ish bilan taʼminlanib, muammolari hal etilmoqda.

Amudaryo tumaniga Oʻzbekiston Respublikasi Oliy Majlis Qonunchilik palatasidagi Oʻzbekiston Xalq demokatik partiyasi fraktsiyasi aʼzolari Dilbar Mamadjanova, Qizilgul Qosimova, Oʻzbekiston Xalq demokratik partiyasi Qoraqalpogʻiston Respublika Kengashi raisi, Qoraqalpogʻiston Respublikasi Joʻqorgʻi Kengesidagi Oʻzbekiston Xalq demokatik partiyasi fraktsiyasi rahbari Xalilla Yeshimbetov va boshqalar tashrif buyurib, aholi bilan ishlashda “Mahallabay” va “fuqarobay” shakldagi ishlarni tashkil qilish boʻyicha mazkur partiyadan saylangan barcha darajadagi deputatlarning amaliy faoliyati bilan tanishib chiqdilar.

Masʼullar tuman hokimi Sultonboy Yoʻldashev, Qoraqalpogʻiston Respublikasi vazirlik va idoralar, tuman boʻlimlari rahbarlari, Xalq deputatlari Amudaryo tuman Kengashidagi partiya guruhi aʼzolari, partiya xodimlari hamrohligida dastlab Doʻrman ovuliga tashrif buyurdilar. Ovuldagi “Yoshlar daftari”ga kiritilgan yoshlar bilan uchrashib, ularning istak va maqsadlari bilan tanishdilar. Roʻyxatdagi ishsiz yoshlarning bandligini taʼminlash maqsadida hududda 5 yarim gektar yer 24 nafar yoshga 24 sotixdan boʻlib berilgan boʻlib, masʼullar ushbu yerlardan foydalanish holatini oʻrganib chiqdilar. Ekin maydonlarida ayni paytda dehqonchilik bilan shugʻullanayotgan yoshlarning rejalari bilan qiziqib, ularga zarur tavsiya va maslahatlar berdilar.

Shundan soʻng, masʼullar tumandagi 2-sonli kasb-hunar maktabidagi “Yoshlar daftari”ga kiritilgan yoshlarni kasbga oʻrgatish markaziga tashrif buyurib, muassasada yaratilgan sharoitlar bilan tanishdilar. Markazda kasb oʻrganayotgan yoshlar, ularga taʼlim berayotgan ustozlar bilan boʻlib oʻtgan suhbat chogʻida taʼlim sohasida davlatimiz rahbarining tashabbusi bilan tizimli ishlar yoʻlga qoʻyilayotgani, sohadagi islohotlarning samaradorligi koʻp jihatdan oʻqituvchi-pedagoglarga bogʻliqligi taʼkidlandi.

Tadbir doirasida uyma-uy yurib fuqarolarga manzilli yordam koʻrsatish, ularning qiynab kelayotgan muammolarini oʻrganish maqsadida masʼullar aholi xonadonlariga tashrif buyurdilar. “Ayollar daftari”ga kiritilgan, ijtimoiy himoyaga muhtoj fuqarolar – Boy ovul mahallasida yashovchi  Bozorgul Chinniyeva, Chordara mahallasidagi Komila Aminboyevalarning holidan xabar olinib, ularga zarur yordamlar koʻrsatildi. Shuningdek, nogironligi boʻlgan Bozorgul Chinniyeva hamda bolalikdan nogiron Komila Aminboyevaga maxsus aravachalar topshirildi. Ularga partiya ramzi tushirilgan sovgʻalar ham berildi.

Shuningdek, masʼullar Yangiobod mahallasida yashovchi “Temir daftar” va “Ayollar daftari”da roʻyxatda turgan kam taʼminlangan fuqarolar Anorgul Eshniyazova, Saltanat Oʻrozbayeva, Feruza Rahimovalar xonadonlariga ham tashrif buyurib, xonadon egalari bilan muloqot qildilar.  Ushbu ayollarga partiya sovgʻalarini topshirdilar.

Tashrif tumandagi Xotira maydonida davom ettirildi. Tadbir ishtirokchilari Xotira maydonida Vatan ozodligi uchun qurbon boʻlgan ajdodlar xotirasiga hurmat bajo keltirdilar.

Tadbir doirasida Tosh yop ovulidagi davlat-xususiy sherikchilik shaklidagi “Zebo Qilichboy” maktabgacha taʼlim tashkilotiga tashrif buyurilib, muassasada bolajonlar uchun yaratilgan zamonaviy shart-sharoitlar bilan tanishdilar. Shundan soʻng, tuman Tibbiyot birlashmasiga qarashli koʻp tarmoqli poliklinikada tibbiy muassasaning moddiy-texnik bazasi, kasalliklarni erta aniqlash, toʻgʻri tashxislash va davolash uslublari bilan tanishildi. Bemorlarga sifatli tibbiy xizmat koʻrsatish hamda muassasa xodimlariga, ayni paytda amalga oshirilayotgan vaktsinatsiya jarayonlari, emlanish uchun kelgan fuqarolarga yaratilgan sharoitlar oʻrganildi. 

Muassasa xodimlari bilan boʻlgan suhbatda aholi salomatligini saqlash, tibbiy-sanitariya yordami muassasalari faoliyatiga mutlaqo yangi mexanizmlarni joriy etish, tibbiy profilaktika ishlari samaradorligini yanada oshirish orqali jamoat salomatligini taʼminlash borasidagi tizimli ishlar toʻgʻrisida soʻz yuritildi.

Masʼullar tomonidan kambagʻallikni qisqartirish boʻyicha tumanda amalga oshirilgan ishlar oʻrganilib, mahalliy deputatlarga samaradorlikni yanada oshirish boʻyicha maslahat va tavsiyalar berildi. “Temir daftar”, “Ayollar daftari”, “Yoshlar daftari”ga kiritilgan fuqarolar bilan oʻtkazilgan muloqotlarda koʻtarilgan masalalarni hal etish boʻyicha ham tegishli vazifalar topshirildi.

 Ozoda Xudoyberganova.