«Jayxun ilhomlari» nodavlat notijorat tashkiloti ijodkor yoshlar va ularning ota-onalari bilan uchrashdi

Tumanimizda «Jayxun ilhomlari» nodavlat notijorat tashkilotining ish boshlaganiga 5-yildan ziyod vaqt oʻtdi. Bu muddat ichida mazkur tashkilot havaskor shoir, yozuvchilar, sanʼatsevar yoshlarni izlab topish va ularning ijod namunalarini elga tanitish maqsadida faoliyat olib bordi.

Tashkilot aʼzolarining ijodkor yoshlarni kashf qilish va ularni ragʻbatlantirish maqsadida Nazarxon ovulidagi 3-sonli umumtaʼlim maktabida boʻldi. Bu maktabda yosh iqtidor egalari juda koʻp. Ular oʻzlarning jajji sheʼr va hikoyalari bilan koʻpchilikka manzur boʻlib kelishmoqda. Maktabning 9-sinf oʻquvchisi Shahzoda Joʻlliboyeva, Toshkent shahrida oʻtkazilgan kastingda qatnashib, gʻolib boʻlib, yosh jurnalistlar maktabiga qabul qilindi.

Maktab oʻquvchilaridan Navbahor Sarsenboyeva, Qunduz Aliboyeva, Muhabbat Oʻrinbosarova, Sharyar Qurbonboyev, Shaxsanam Qosimova, Miyirgul Oʻrozboyeva, Sendugʻash Davlatboyevalar ham oʻzlarining ijodiy namunalari bilan ancha tanilgan. Ularning badiiy ijodiyotda yutuqlarga erishishida maktabning qoraqalpoq tili va adabiyoti fani oʻqituvchisi Juldiz Turgʻanboyeva, oʻzbek tili va adabiyoti fani oʻqituvchisi Farida Yendirboyevalarning saʼy-harakatlari salmoqli boʻlmoqda.

Qolaversa boy adabiyotga ega boʻlgan maktab kutubxonasi ham doim oʻquvchilar xizmatida. Oʻquv zali muntazam ishlab turibdi. Kutubxona mudirasi Tazaxon Xidirniyazova maktab oʻquvchilari uchun zarur kitoblarni topib berishga doimo tayyor.

Maktabda ota-onalar bilan boʻlgan uchrashuvda “Jayxun ilhomlari” nodavlat-notijorat tashkiloti raisi Oʻrozali  Reyimov soʻzga chiqib, ijodkor yoshlar uchun yaratib qoʻyilgan keng imkoniyatlarga toʻxtalib oʻtdi. Jumladan, havaskor shoir va yozuvchilarning sheʼr, hikoyalari “Taraqqiyot koʻzgusi”, “Mening oilam” gazetalari sahifalarida, Amudaryo televideniyesining koʻrsatuvlarida muntazam yoritib borilayotgan aytib oʻtildi. Shuningdek, tumanimizda tashkil etilgan nashriyot orqali ijodkorlarning kitoblari chop etilishi ham yigʻilganlarga tushuntirildi.

Tashkilot tomonidan yosh ijodkorlarga har tomonlama yordam berib, qulayliklar yaratib qoʻyilganligi uchun maktabning murabbiylar jamoasiga, ota-onalarga minnatdorchilik bildirildi.

“Jayxun ilhomlari” nodavlat-notijorat tashkilotining asosiy maqsadi adabiyot, musiqa, badiiy va amaliy sanʼat ravnaqiga hissa qoʻshish va havaskor shoirlar, havaskor yozuvchilar, ijodkorlar, sanʼatkorlar, amaliy sanʼat ustalarini qoʻllab-quvvatlash, jamiyatda ijtimoiy-maʼnaviy muhitni yanada yaxshilashda yordam berishdan iborat.

Soʻnggi yaqin yillarda tumanimizda yashab, ijod qilayotgan shoir va yozuvchilarning 40 dan ziyod kitoblari chop etilib, oʻquvchilarga taqdim etildi. Bu yutuqlarda ham mazkur tashkilotning munosib hissasi bor albatta.

Tashkilot tomonidan yosh iqtidor egalarini izlab topish ishlari tizimli davom ettilmoqda. Tashkilotning asosiy maqsadi tumanimizdagi iqtidor egalarini izlab topib, ularning ijod namunalarini  ommaga tanishtirishdir. Bu borada tumanimizda keng imkoniyatlar bor. Oʻz ijod namunalari oʻquvchilarga taqdim qilishni istagan har bir ijodkor bu tashkilotga murojaat qilishi mumkin. Murojaat qiluvchilar tashkilot aʼzoligiga qabul qilinadi va ijod namunalari muntazam yoritib boriladi.

Oʻrozali REYIMOV.