«Жайхун илҳомлари» нодавлат нотижорат ташкилоти ижодкор ёшлар ва уларнинг ота-оналари билан учрашди

Туманимизда «Жайхун илҳомлари» нодавлат нотижорат ташкилотининг иш бошлаганига 5 йилдан зиёд вақт ўтди. Бу муддат ичида мазкур ташкилот ҳаваскор шоир, ёзувчилар, санъатсевар ёшларни излаб топиш ва уларнинг ижод намуналарини элга танитиш мақсадида фаолият олиб борди.

Ташкилот аъзоларининг ижодкор ёшларни кашф қилиш ва уларни рағбатлантириш мақсадида Назархон овулидаги 3-сонли умумтаълим мактабида бўлди. Бу мактабда ёш иқтидор эгалари жуда кўп. Улар ўзларнинг жажжи шеър ва ҳикоялари билан кўпчиликка манзур бўлиб келишмоқда. Мактабнинг 9-синф ўқувчиси Шаҳзода Жўллибоева, Тошкент шаҳрида ўтказилган кастингда қатнашиб, ғолиб бўлиб, ёш журналистлар мактабига қабул қилинди.

Мактаб ўқувчиларидан Навбаҳор Сарсенбоева, Қундуз Алибоева, Муҳаббат Ўринбосарова, Шаряр Қурбонбоев, Шахсанам Қосимова, Мийиргул Ўрозбоева, Сендуғаш Давлатбоевалар ҳам ўзларининг ижодий намуналари билан анча танилган. Уларнинг бадиий ижодиётда ютуқларга эришишида мактабнинг қорақалпоқ тили ва адабиёти фани ўқитувчиси Жулдыз Турғанбоева, ўзбек тили ва адабиёти фани ўқитувчиси Фарида Ендирбоеваларнинг саъй-ҳаракатлари салмоқли бўлмоқда.

Қолаверса бой адабиётга эга бўлган мактаб кутубхонаси ҳам доим ўқувчилар хизматида. Ўқув зали мунтазам ишлаб турибди. Кутубхона мудираси Тазахон Хидирниязова мактаб ўқувчилари учун зарур китобларни топиб беришга доимо тайёр.

Мактабда ота-оналар билан бўлган учрашувда “Жайхун илҳомлари” нодавлат-нотижорат ташкилоти раиси Ўрозали  Рейимов сўзга чиқиб, ижодкор ёшлар учун яратиб қўйилган кенг имкониятларга тўхталиб ўтди. Жумладан, ҳаваскор шоир ва ёзувчиларнинг шеър, ҳикоялари “Тараққиёт кўзгуси”, “Менинг оилам” газеталари саҳифаларида, Амударё телевидениесининг кўрсатувларида мунтазам ёритиб борилаётган айтиб ўтилди. Шунингдек, туманимизда ташкил этилган нашриёт орқали ижодкорларнинг китоблари чоп этилиши ҳам йиғилганларга тушунтирилди.

Ташкилот томонидан ёш ижодкорларга ҳар томонлама ёрдам бериб, қулайликлар яратиб қўйилганлиги учун мактабнинг мураббийлар жамоасига, ота-оналарга миннатдорчилик билдирилди.

“Жайхун илҳомлари” нодавлат-нотижорат ташкилотининг асосий мақсади адабиёт, мусиқа, бадиий ва амалий санъат равнақига ҳисса қўшиш ва ҳаваскор шоирлар, ҳаваскор ёзувчилар, ижодкорлар, санъаткорлар, амалий санъат усталарини қўллаб-қувватлаш, жамиятда ижтимоий-маънавий муҳитни янада яхшилашда ёрдам беришдан иборат.

Сўнгги яқин йилларда туманимизда яшаб, ижод қилаётган шоир ва ёзувчиларнинг 40 дан зиёд китоблари чоп этилиб, ўқувчиларга тақдим этилди. Бу ютуқларда ҳам мазкур ташкилотнинг муносиб ҳиссаси бор албатта.

Ташкилот томонидан ёш иқтидор эгаларини излаб топиш ишлари тизимли давом эттилмоқда. Ташкилотнинг асосий мақсади туманимиздаги иқтидор эгаларини излаб топиб, уларнинг ижод намуналарини  оммага таништиришдир. Бу борада туманимизда кенг имкониятлар бор. Ўз ижод намуналари ўқувчиларга тақдим қилишни истаган ҳар бир ижодкор бу ташкилотга мурожаат қилиши мумкин. Мурожаат қилувчилар ташкилот аъзолигига қабул қилинади ва ижод намуналари мунтазам ёритиб борилади.

Ўрозали РЕЙИМОВ.