Jayxun ilhomlari

Uzatilayotgan qizga

Ketmoqdasan uying tashlab,

Ota-onang koʻzin yoshlab.

Taqdiringga shu yozilgan,

Muhr boʻlib xoʻp bosilgan.

Qanday erur yangi uying,

Shu haqdadir fikr-u oʻying.

Ketgaysan-yey tashlab tomir,

Eshilib yur, misli xamir.

Ortda qoldi erkaliging,

Ukanglarga serkaliging.

Kelin oʻrni mudom pastda,

Oʻxshaydursan goh choʻp-xasga.

Bekachlaring boʻlsa agar,

Sinasharlar har tong-sahar,

Tengdoshlardan olib oʻgit,

Toʻy kechasi kuyov yigit,

“Siz”ni qoʻyib, “sen” deyar,

“Xoʻjayining men” deyar.

Qaynonangda taʼna gap koʻp,

Topishmoqli maʼno gap koʻp.

Til uchida deydi: “qizim,

Ikki qilma aytgan soʻzim”.

Biz ham kelin boʻlganmiz, der,

Yashnab hamda soʻlganmiz der.

Oson emas boʻlmoq maʼqul,

Kutgil doim, piching, aql.

Qaynotang ham gʻalat odam,

Aytganimda yoʻqdir xatom.

Goh-gohida aynib turar,

Dashnom berar, ham doʻq urar.

Xullas, kelin boʻlmoq qiyin,

Baʼzan bahong toʻqson tiyin.

Shu taxlitda kunlar oʻtib,

Jim yurolsang chiqqung yutib,

Unib-oʻssang shudir baxting,

Onaliging – oltin taxting.

Ulgʻayishib soya boʻlar,

Suyanmoqqa qoya boʻlar.

Koʻkragingga tegar oftob,

Yurisharlar seni maqtab.

Orom olar asablaring,

Unutilib azoblaring.

Esda tutgil shuni zinhor,

Bunday qismat ayolda bor.

Shunday boʻlgan, qolar abad,

Oy oʻn beshi yorugʻ, albat.

Nasihat shu: sabrli boʻl,

Tiling emas, yugursin qoʻl.

Erinmasdan etsang xizmat,

Topadursan har on izzat.

Maqtov, olqish senikidir,

Quruq rahmat menikidir.

Saʼdulla XOʻJANIYoZOV, faxriy jurnalist.

 

ARMONSIZ QIZ

(Uzatilayotgan qizga)

Dugona, doʻstiga soʻzi botmasa,

Ishongan yoridan jafo totmasa,

Chiqoni bir kuni sirin sotmasa,

Armoni bormikan, shunday qizning ham?!

 

Etagin oʻpsalar gullar soʻqmoqda,

Yigitlar toʻlgʻonsa ishqiy qiynoqda,

Aka togʻdek tursa kerakli chogʻda –

Armoni bormikan, shunday qizning ham!?

 

Toʻyida baxt tutsa ich-u tashini,

Onasi ardoqlab artsa yoshini,

Otaning koʻksiga qoʻysa boshini

Armoni bormikan, shunday qizning ham!?

 

Tezda kechirsalar boʻlsa xatosi,

Aylanib-oʻrgilsa, singil – opasi,

“Oʻzimning qizim!” deb tursa otasi,

Armoni bormikan, shunday qizning ham!?

 

Bahorda etsa gul sarmast dimogʻin,

Yigitlar tush koʻrsa lola yonogʻin,

Murabbiy onadek ochsa quchogʻin,

Armoni bormikan, shunday qizning ham!?

 

Ona kabi bilsa,sevsa elini,

Xizmatga shay tursa sirib belini,

Momolar istasa qilmoq kelini,

Armoni bormikan, shunday qizning ham!?

 

Yo RABBIY! Jannatning mevasi – Udir!

Sheʼrimning gʻaybona egasi – Udir!

Salomchining orzu-havasi – Udir!

Armoni bormikan, shunday qizning ham!?

Tursunboy ABDULLAYeV.

 

Yangi yil tongida

Yana mamlakatning bir tongi otdi,

Qancha “xayr” oʻtdi, boshlandi “salom”.

Tiriklik shukriga qoʻshilar yana,

Tongda yaqinlardan kelgan har paygʻom.

 

“Omad olib kelsin yangi yilimiz”,

Uygʻonar shu niyat bilan odamlar.

Har kimni shu tongda koʻngliga olgan,

Zafarlarga eltsin bosgan qadamlar.

 

Qanday el boʻlsa-da, ertasi porloq

Agar qoʻllasa yosh avlodlarini.

Marra biznikidir tarbiya qilsak

Yurtning Alpomish-u Farhodlarini.

 

Xalqimiz sogʻligi boʻlsin mustahkam,

“Sogʻ tanda – sogʻ aql” deydilar axir,

Agarda kuch bilan aql birlashsa,

Buyuk xalq qudrati boʻladi zohir.

 

Ravon yoʻl qadrini bilganlar uchun,

Aynan ushbu kundir shodlik ayyomi –

Toʻqson yildan keyin yana boshlandi,

Turksib yoʻllarining yangi davomi.

 

Koʻprik qurilmoqda daryoga jadal,

Rahbarlar bu ishda koʻrsatib sabot.

Shu sabab birlashgan ikkala elning,

Hayoti boʻladi yanada obod.

 

Ezgu niyat boʻlsa hamma qalblarda

Qari-yosh – hammaning baxti kulajak.

Albatta, orzular amalga oshib,

Barimizni kutar porloq kelajak!

A.Nafasov.

ERTAKLARNI SOGʻINIB

Esimda, bir paytlar dilkash momolar,

Erinmay gʻaroyib ertak aytardi.

Unda oshiq yorin, botir oʻz elin,

Yovlardan qutqarib, yengib qaytardi.

Behisob boyligin qizgʻongan xasis,

Saxiylar oldida mulzam boʻlardi.

Ezgulik parisi doimo gʻolib,

Yosuman hasaddan kuyib oʻlardi.

Ertaklarni tinglab, yaxshilik tilab,

Ulgʻaydik, u damlar endi qaytmaydi.

Bolalar telefon oʻynab, momolar

Serialga ishqiboz, ertak aytmaydi.

Ertaklar poklikka yetaklar edi,

Ne bilsak, barini rostiga yoʻydik.

Aqlimiz shunchalar oʻzib ketdimi,

Nechun ertaklarga ishonmay qoʻydik.

Tilagim, farzandlar Vatanni sevib,

Tohir kim, Zuhro kim, bilib yashasin.

Ular har jabhada fidoyi boʻlib,

Botirlarga havas qilib yashasin.

Ulugʻlar loqayd-u, boshqalar befarq

Boʻlavermay oʻylang ertangingizni.

Momolar, turli xil ermakni qoʻyib,

Bolalarga ayting, ertagingizni.

Oʻrozali REYIMOV.

 

Duosini ol

Bu dunyo rohatin koʻrayin desang,

El ichra hurmatda yurayin desang.

Qaddingni tik tutib turayin desang,

Avvalo otangning duosini ol,

Keyinidan onangning rizosini ol!

 

Qulingni sotgin-u qul boʻlgin oʻzing,

Hamisha xizmatin oʻzing qil, oʻzing.

Shirinsuxanlikda boʻlsin har soʻzing,

Avvalo otangning duosini ol,

Keyinidan onangning rizosini ol!

 

Bir parcha etlikdan oʻstirgan seni,

Dovuldan, shamoldan asragan seni.

Ne bir azoblarda oʻstirgan seni,

Avvalo otangning duosini ol,

Keyinidan onangning rizosini ol!

 

Hademay qaytadi oʻzingga bilsang,

Yaxshimi, yomonmi xizmatin qilsang.

Tanangga oʻylab koʻr, oʻzingga kelsang,

Avvalo otangning duosini ol,

Keyinidan onangning rizosini ol!

 

Ey farzand! Hammasi Qodir Xudodan,

Bu soʻzlar merosdir, Odam Atodan.

Saqlanib yurgaysan har dam xatodan,

Avvalo otangning duosini ol,

Keyinidan onangning rizosini ol!

Farhod Avezov, Namuna MFY.

 

Qish

Qishda keladi uyga,

Qorbobo mehmon boʻlib.

“Sogʻ boʻlinglar bolalar”,

Deydi Qorqizcha kulib.

 

Chugʻurlashib koʻchada,

Qorboʻronlar oʻynaymiz.

Qiziqarli oʻyinlar,

Oʻynashdan toʻxtamaymiz.

Iroda BAHROMOVA,

76-maktab oʻquvchisi.

 

Shukrona

Dildan shukur qilamiz,

Ozod, hur zamon uchun.

Quvonchlarga toʻlamiz.

Osuda osmon uchun!

 

Shunchalar baxtiyormiz,

Rizq-roʻzimiz butundir.

Halol mehnatga yormiz,

Dasturxonlar  toʻkindir!

Fazilat YOʻldOsheva, 22-sonli maktab oʻquvchisi.