Xalq deputatlari Amudaryo tuman Kengashining 25-sessiyasi toʻgʻrisida AXBOROT

2021-yil 12-yanvar kuni Amudaryo tumani hokimligining majlislar zalida Xalq deputatlari tuman Kengashining 25-sessiya boʻlib oʻtdi. Sessiya majlisida deputatlar, sektor rahbarlari, tuman hokimi oʻrinbosarlari, hokimlik masʼul xodimlari, huquq-tartibot organlari, boʻlimlar, tijorat banklari rahbarlari, fuqarolarning oʻzini oʻzi boshqarish organlari raislari hamda ommaviy axborot vositalari vakillari ishtirok etdi.

Shuningdek, sessiyada Oʻzbekiston Respublikasi Oliy Majlisi Senatining Orolboʻyi mintaqasini rivojlantirish masalalari qoʻmitasi raisi oʻrinbosari Batir Matmuratov, Qoraqalpogʻiston Respublikasi Joʻqorgʻi Kengesi qoʻmitasi raisi Shukurulla Ataniyazov hamda tumandan saylangan Qoraqalpogʻiston Respublikasi Joʻqorgʻi Kengesi deputatlari qatnashdilar.

Sessiyani Kengash raisi, tuman hokimi Sultonboy Yoʻldashev ochdi va olib bordi. Sessiya kotibligiga 1-Navoiy saylov okrugidan deputat Gulshod Yusupova saylandi.

Sessiya kun tartibiga “Oʻzbekiston Respublikasi Prezidenti Shavkat Mirziyoyevning 2020-yil 29-dekabr kuni Oliy Majlisga yoʻllagan Murojaatnomasi mazmun-mohiyatini targʻib etish hamda belgilab berilgan ustuvor vazifalardan kelib chiqib tuman dasturini tayyorlash haqida”gi masala kiritildi.

Sessiya ishida dastlab Oliy Majlis Senatining Orolboʻyi mintaqasini rivojlantirish masalalari qoʻmitasi raisi oʻrinbosari Batir Matmuratov axborot berdi.

Senator oʻz soʻzida Prezidentimizning Oliy Majlisga yoʻllagan Murojaatnomasida xalqimiz turmushini yanada farovon, yurtimizni yanada obod qilish, davlat va jamiyat rivojini yangi bosqichga olib chiqish boʻyicha muhim vazifalar belgilab berilganini taʼkidlab oʻtdi.

Kun tartibidagi masala yuzasidan tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlari boʻyicha oʻrinbosari  Maxmud Shermetov axborot berdi. Axborotda Murojaatnomaning mazmun-mohiyati haqida keng tushunchalar berildi.

Ushbu masala yuzasidan tuman hokimi oʻrinbosari – investitsiyalar va tashqi savdo boʻlimi boshligʻi Rashid Salayev ham soʻzga chiqib, Murojaatnomada belgilab berilgan ustuvor vazifalardan kelib chiqib tayyorlanayotgan tuman hududiy dasturining muhim jihatlariga toʻxtaldi.

Muhokamalarda xalq deputatlari tuman Kengashining doimiy komissiyalari railari Maxsud Sadullayev, Muqaddas Beknazarova, tuman Kengashi raisi oʻrinbosari Gʻulomjon Yeshniyozovlar ishtirok etib, kun tartibidagi masalalar boʻyicha fikr-mulohazalarini bayon qildi.

Sessiya yakunida kun tartibidagi masala boʻyicha tegishli qaror qabul qilindi.

Tuman hokimligining axborot xizmati.