ONA TILIMIZ SOFLIGINI SAQLAShGA HAMMAMIZ BURChLIMIZ

Mamlakatimizda ona tilimizning jamiyatdagi oʻrni va nufuzini oshirishga alohida eʼtibor qaratilmoqda. Alisher Navoiy nomidagi Toshkent Davlat oʻzbek tili va adabiyoti universiteti, universitet huzurida Vazirlik va idoralar, mahalliy ijro etuvchi hokimiyat organlari va xoʻjalik birlashmalari xodimlari, respublikada doimiy istiqomat qilayotgan boshqa tillarda soʻzlashuvchi aholi uchun yuridik shaxs maqomiga ega hamda Qoraqalpogʻiston Respublikasi va viloyatlardagi davlat universitetlari, pedagogika institutlari qoshida hududiy boʻlinmalariga ega boʻlgan Davlat tilida ish yuritish asoslarini oʻqitish va malaka oshirish markazi tashkil etildi.

Markaz va uning hududiy boʻlinmalarida vazirlik va idoralar, mahalliy ijro etuvchi hokimiyat organlari xodimlarini oʻzbek tilida ish yuritish asoslari boʻyicha oʻqitish yoʻlga qoʻyildi.

Oʻzbekiston Respublikasi Vazirlar Mahkamasining 2020-yil 20-yanvarda qabul qilgan “Mamlakatda davlat tilida ish yuritishni samarali tashkil qilish chora-tadbirlari toʻgʻrisida”gi Qarori oʻzbek tili maqomi va nufuzini oshirish yoʻlida yana bir muhim qadam boʻldi. Qarorda davlat boshqaruvi organlari, xoʻjalik birlashmalari rahbarlari, viloyatlar, tuman, shaharlar hokimlari “Davlat tili toʻgʻrisida”gi Qonun hujjatlari talablariga soʻzsiz rioya qilish, ish yuritishni davlat tilida tashkil etishga shaxsan masʼul ekanligi belgilab qoʻyildi. Shuningdek, ularning maʼnaviy-maʼrifiy ishlar samaradorligini oshirish, “Davlat tili toʻgʻrisida”gi Qonun hujjatlariga rioya etilishini taʼminlash masalalari boʻyicha maslahatchisi lavozimi joriy etildi.

Tumanimizda ham Qarorda belgilangan vazifalarni ijro etish yuzasidan koʻpgina chora-tadbirlar belgilandi va amalga oshirilmoqda. Xususan, tumanimizda tadbirkorlar safi kengayib, ularga tegishli boʻlgan maishiy xizmat koʻrsatish obʼektlari, savdo, umumiy ovqatlanish shoxobchalari binolari koʻpaymoqda. Biroq ularning nomi yozilishida turli xatoliklarga yoʻl qoʻyilayapti. Korxona-tashkilotlar peshlavhalarida, har xil reklama va chaqiriqlar yozilgan pannolarda grammatik xatolar uchraydi. Shularni inobatga olgan holda tuman hokimi farmoyishiga koʻra, turli obʼektlar peshlavhalaridagi yozuvlarni koʻzdan kechirish, ularni belgilangan talablar asosida joylashtirilishini oʻrganish boʻyicha ishchi guruh tuzildi va faoliyat olib bormoqda.

2020-yilning 10-oktyabrigacha ishchi guruh saʼy-harakatlari bilan tumanimiz boʻyicha 30 ta tashqi yozuvlar (peshlavha, reklama, eʼlon, axborot matnlari) oʻzgartirildi, jamoat joylaridagi 20 ta tashqi yozuvlar, 5 ta viloyatlararo, tuman va shaharlararo asosiy yoʻllar boʻylarida oʻrnatilgan tashqi yozuvlar, 5 ta shoh koʻchalar boʻyida oʻrnatilgan tashqi yozuvlar oʻrgartirildi. Tumandagi 2507 ta koʻchaga nom berildi.

Ona tilimiz qadimiy va nihoyatda boy, jozibador til. Uning sofligini saqlashga hammamiz ham burchlimiz.

Ashirboy QOʻShAYeV,

tuman hokimi maslahatchisi.