HAMMAMIZGA SEVIMLI ZOYaXONIM EDI...

Baʼzan hayotda yuz beradigan kutilmagan voqea-hodisalar odamni karaxt qilib qoʻyadi. Ayniqsa, har kuni birgalikda chaq-chaqlashib, quvonch-u tashvishingni baham koʻrib, bir havodan nafas olib. Bir jamoada ishlashayotgan hamkasbingdan hech kutilmaganda ayrilib qolsang juda ogʻir botarkan...
Allohning irodasi, xalqimiz boshiga tushgan sinov bizning mehnat jamoamizni ham chetlab oʻtmadi. Gulgul ochilib yurguvchi, nihoyatda samimiy va dilkash. 38-sonli maktabimiz pedagogika jamoasining sevimli doʻsti, oʻquvchilarining aziz ustozi Zoyaxon  Bobojonovani bemavrid ajal oramizdan juda erta olib ketdi. U juda mehribon, shu bilan birga oʻz fanining bilimdoni, maʼnaviy kuchli ayol edi. 1993-yilda NDPIning oʻzbek filiologiyasi fakultetini tamomlab, ilk mehnat faoliyatini 41-sonli maktabda ona tili va adabiyot fani oʻqituvchisi sifatida boshlagan Zoya Bobojonova 1998-2002-yillarda 38-sonli umumtaʼlim maktabida qoraqalpoq tili va adabiyoti fani oʻqituvchisi, 2002-2007-yillarda maktab direktorining maʼnaviy-maʼrifiy ishlar boʻyicha oʻrinbosari, 2008-2012-yillarda Mangʻit Iqtisodiyot kolleji oʻqituvchisi, 2012-2019-yillarda esa 38-sonli umumtaʼlim maktabi direktorining oʻquv-tarbiya ishlari boʻyicha oʻrinbosari vazifalarida faoliyat yuritib, yosh avlodni vatanparvar, mustaqillik gʻoyalariga sadoqatli, maʼnaviy yetuk insonlar qilib tarbiyalash ishiga munosib hissa qoʻshdi.
Biz – 38-sonli maktab jamoasi uni Zoyaxonim, deya yaxshi koʻrar edik. Zoyaxonim har qanday maqtovga, jamoa hurmatiga sazovor, yaxshi koʻrishimizga loyiq inson edi. Uning oʻziga xos dars oʻtish tajribasi, adabiyot darslarida xuddi yoqimli musiqa yangligʻ jarangdor ovozda sheʼr oʻqishlari, chiroyli tabassum qilishlari, turli bayram sanalari munosabati bilan maktabimizda oʻtkaziladigan bayram tadbirlariga bosh-qosh boʻlib yurishlari, hamma ezgu ishlari hech kutilmaganda xotiraga aylandi. Makkor koronavirus bizdan Zoyaxonimdek dilkash hamkasb doʻstni, oilasidan mehribon ona va sevimli rafiqani, yaqinlaridan fidoyi jigarbandni tortib oldi. Ilohim, Zoyaxonimning joylari jannatdan boʻlsin, oxiratlarini Alloh obod qilsin. Yaqinlarining ajri ulugʻ, sabr-toqatlari goʻzal, farzandlarining umrlari uzoq boʻlsin.
Haqlariga doimo duoda boʻlguvchi 38-sonli umumtaʼlim maktabi mehnat jamoasi.