Kitobsevarlarning sevimli ziyo maskani

Bugungi globallashuv davrida aholi, ayniqsa, yoshlar oʻrtasida kitobxonlik madaniyatini oshirish, ularni sifatli axborot bilan taʼminlash dolzarb vazifa sanaladi. Oʻzbekiston Respublikasi Prezidentining 2019-yil 7-iyundagi qarori asosida tashkil etilgan Amudaryo tuman axborot-kutubxona markazi ham oʻtgan 2025-yil davomida bu yoʻnalishda salmoqli ishlarni amalga oshirdi.

Kitobxonlar safi va xizmat koʻrsatish qamrovi

Yil davomida Axborot-kutubxona markazi xodimlari tomonidan abonement va foydalanuvchilarga xizmat koʻrsatish yoʻnalishida tizimli ishlar olib borildi. Xususan, turli mavzularda adabiy kechalar, ijodiy uchrashuvlar va davra suhbatlari tashkil etilib, yangi adabiyotlar targʻiboti yoʻlga qoʻyildi.

Raqamlarga murojaat qiladigan boʻlsak, bugungi kunga qadar markaz foydalanuvchilarining umumiy soni 6 ming 12 nafarni tashkil etmoqda. Quvonarlisi, birgina 2025-yilning oʻzida kutubxonaga 1 ming 412 nafar yangi kitobxon aʼzo boʻldi. Yil davomida foydalanuvchilar qatnovi 31 ming 460 tani, berilgan resurslar soni esa jami 113 ming 20 tani tashkil etdi. Shundan 102 ming 989 tasi anʼanaviy shaklda, 5 ming 258 tasi esa masofadan turib taqdim etilganligi sohaga zamonaviy yondashuv kirib kelayotganidan dalolatdir.

Shuningdek, chekka hududlar aholisini kitob bilan taʼminlash maqsadida "Koʻchma kutubxona" xizmati yoʻlga qoʻyilib, 6 marotaba tashkil etilgan maʼrifat karvoni xizmatidan 845 nafar hamyurtimiz foydalandilar.

Bibliografik izlanishlar va media targʻibot

Axborot-bibliografiya xizmati tomonidan kitobxonlarga katalog va kartotekalardan foydalanish madaniyati oʻrgatib kelinmoqda. 2025-yilda foydalanuvchilarga jami 224 ta, shu jumladan 132 ta ogʻzaki, 50 ta yozma va 42 ta masofaviy shaklda maʼlumot-axborot xizmati koʻrsatildi.

Yil davomida dolzarb mavzularda 15 ga yaqin bibliografik tavsiya va qoʻllanmalar ishlab chiqildi. Markaz faoliyati OAVda ham keng yoritildi. "Taraqqiyot koʻzgusi" gazetasi hamda amunews.uz veb-saytlarida markaz faoliyati va oʻtkazilgan tadbirlar haqidagi maqolalar muntazam ravishda chop etib borildi.

Fondning boyitilishi va elektron baza

Kutubxona fondini zamon talablariga mos ravishda toʻldirish va saqlash muhim vazifadir. Hozirgi kunda Axborot-kutubxona markazi fondi 19 ming 699 nomdagi 65 ming 248 nusxa adabiyotdan iborat.

2025-yil davomida fondga 95 nomdagi 280 nusxa kitob sotib olingan boʻlsa, homiylar va kitobsevarlar tomonidan 118 nomdagi 418 nusxa kitob sovgʻa qilindi. Shuningdek, 10 nomdagi gazeta va 3 nomdagi jurnalga obuna tashkil qilindi.

Raqamlashtirish va onlayn faoliyat

Zamonaviy kutubxonani axborot texnologiyalarisiz tasavvur etib boʻlmaydi. Markazning Raqamlashtirish xizmati tomonidan "Unicat" dasturiga 4752 dona asosiy va 462 dona vaqtinchalik bibliografik yozuvlar kiritildi. Markazning ijtimoiy tarmoqlardagi kanallariga 18 ta audiokitob va 52 ta videorolik joylashtirildi.

Xulosa qilib aytganda, Amudaryo tuman axborot-kutubxona markazi aholiga sifatli axborot xizmati koʻrsatish, jamiyatda kitobxonlik muhitini mustahkamlash yoʻlida dadil qadam tashlamoqda. Joriy 2026-yilda ham bu boradagi ishlarni davom ettirib, kitobxonlar safini yanada oshirish, targʻibot ishlarini kuchaytirish va aholi, ayniqsa yoshlarni kitobxonlikka qiziqtiruvchi turli tadbirlar uyushtirishni maqsad qilganmiz. Fursatdan foydalanib, barcha kitobsevarlarni Mangʻit shahrining Oybek mahallasi, Qipchoq koʻchasida joylashgan ziyo maskanimizga taklif qilamiz!

Dilmurod Oʻrazaqov, tuman Axborot kutubxona markazi direktori.