Китобсеварларнинг севимли зиё маскани
Бугунги глобаллашув даврида аҳоли, айниқса, ёшлар ўртасида китобхонлик маданиятини ошириш, уларни сифатли ахборот билан таъминлаш долзарб вазифа саналади. Ўзбекистон Республикаси Президентининг 2019 йил 7 июндаги қарори асосида ташкил этилган Амударё туман ахборот-кутубхона маркази ҳам ўтган 2025 йил давомида бу йўналишда салмоқли ишларни амалга оширди.
Китобхонлар сафи ва хизмат кўрсатиш қамрови
Йил давомида Ахборот-кутубхона маркази ходимлари томонидан абонемент ва фойдаланувчиларга хизмат кўрсатиш йўналишида тизимли ишлар олиб борилди. Хусусан, турли мавзуларда адабий кечалар, ижодий учрашувлар ва давра суҳбатлари ташкил этилиб, янги адабиётлар тарғиботи йўлга қўйилди.
Рақамларга мурожаат қиладиган бўлсак, бугунги кунга қадар марказ фойдаланувчиларининг умумий сони 6 минг 12 нафарни ташкил этмоқда. Қувонарлиси, биргина 2025 йилнинг ўзида кутубхонага 1 минг 412 нафар янги китобхон аъзо бўлди. Йил давомида фойдаланувчилар қатнови 31 минг 460 тани, берилган ресурслар сони эса жами 113 минг 20 тани ташкил этди. Шундан 102 минг 989 таси анъанавий шаклда, 5 минг 258 таси эса масофадан туриб тақдим этилганлиги соҳага замонавий ёндашув кириб келаётганидан далолатдир.
Шунингдек, чекка ҳудудлар аҳолисини китоб билан таъминлаш мақсадида "Кўчма кутубхона" хизмати йўлга қўйилиб, 6 маротаба ташкил этилган маърифат карвони хизматидан 845 нафар ҳамюртимиз фойдаландилар.
Библиографик изланишлар ва медиа тарғибот
Ахборот-библиография хизмати томонидан китобхонларга каталог ва картотекалардан фойдаланиш маданияти ўргатиб келинмоқда. 2025 йилда фойдаланувчиларга жами 224 та, шу жумладан 132 та оғзаки, 50 та ёзма ва 42 та масофавий шаклда маълумот-ахборот хизмати кўрсатилди.
Йил давомида долзарб мавзуларда 15 га яқин библиографик тавсия ва қўлланмалар ишлаб чиқилди. Марказ фаолияти ОАВда ҳам кенг ёритилди. "Тараққиёт кўзгуси" газетаси ҳамда amunews.uz веб-сайтларида марказ фаолияти ва ўтказилган тадбирлар ҳақидаги мақолалар мунтазам равишда чоп этиб борилди.
Фонднинг бойитилиши ва электрон база
Кутубхона фондини замон талабларига мос равишда тўлдириш ва сақлаш муҳим вазифадир. Ҳозирги кунда Ахборот-кутубхона маркази фонди 19 минг 699 номдаги 65 минг 248 нусха адабиётдан иборат.
2025 йил давомида фондга 95 номдаги 280 нусха китоб сотиб олинган бўлса, ҳомийлар ва китобсеварлар томонидан 118 номдаги 418 нусха китоб совға қилинди. Шунингдек, 10 номдаги газета ва 3 номдаги журналга обуна ташкил қилинди.
Рақамлаштириш ва онлайн фаолият
Замонавий кутубхонани ахборот технологияларисиз тасаввур этиб бўлмайди. Марказнинг Рақамлаштириш хизмати томонидан "Unicat" дастурига 4752 дона асосий ва 462 дона вақтинчалик библиографик ёзувлар киритилди. Марказнинг ижтимоий тармоқлардаги каналларига 18 та аудиокитоб ва 52 та видеоролик жойлаштирилди.
Хулоса қилиб айтганда, Амударё туман ахборот-кутубхона маркази аҳолига сифатли ахборот хизмати кўрсатиш, жамиятда китобхонлик муҳитини мустаҳкамлаш йўлида дадил қадам ташламоқда. Жорий 2026 йилда ҳам бу борадаги ишларни давом эттириб, китобхонлар сафини янада ошириш, тарғибот ишларини кучайтириш ва аҳоли, айниқса ёшларни китобхонликка қизиқтирувчи турли тадбирлар уюштиришни мақсад қилганмиз. Фурсатдан фойдаланиб, барча китобсеварларни Манғит шаҳрининг Ойбек маҳалласи, Қипчоқ кўчасида жойлашган зиё масканимизга таклиф қиламиз!
Дилмурод Ўразақов, туман Ахборот кутубхона маркази директори.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
