YoSh AVLODNI ONA TILIMIZGA HURMAT RUHIDA TARBIYaLAYMIZ

Maktabgacha taʼlim tizimida yosh avlodga  taʼlim-tarbiya berishda eng asosiy maqsad va vazifalardan biri – ularga oʻzbek tilining nihoyatda boy ekanligini koʻrsatish, oʻz tilini qadrlashni oʻrgatish,  uni yoʻqotish oʻzligini yoʻqotish bilan barobar ekanligini uqtirish bilan birga nutqini ham rivojlantirishdir.

Har yili 21-oktyabr – oʻzbek tiliga davlat tili maqomi berilgan kun, yaʼni Til bayrami munosabati bilan badiiy kechalar, davra suhbatlari oʻtkaziladi. Bunday tadbirlar yosh avlod qalbida muqaddas tilimizga boʻlgan mehr-muhabbat, Vatanga sadoqat, millatlararo bagʻrikenglik kabi tuygʻular yanada mustahkamlanishiga zamin yaratadi.

Bu yil ham Til bayrami munosabati bilan tumandagi maktabgacha taʼlim tashkilotlari pedagog-tarbiyachilari uchun onlayn seminar-treninglar, taʼlimiy oʻyinlar va badiiy kechalar tashkil etilib, videoroliklar namoyish qilindi. Shuningdek, maktabgacha taʼlim tashkilotlari pedagog-tarbiyachilari kichkintoylar uchun masofaviy tarzda ushbu kunga bagʻishlangan mashgʻulotlarni koʻtarinki ruhda oʻtkazishdi.

Biz yosh avlodni oʻz tilimizga hurmat ruhida tarbiyalashga masʼulmiz. Prezidentimiz Sh.Mirziyoyev “Xalqning milliy madaniyati va oʻziga xosligini ifoda  etuvchi vosita boʻlmish oʻzbek tilini rivojlantirish bu tilning davlat maqomini izchil va toʻliq roʻyobga chiqarish demakdir”, deb taʼkidlab oʻtgan edi. Jamiki ezgu fazilatlar inson qalbiga avvalo ona allasi, ona tilining betakror jozibasi bilan singadi. Zero, ona tilimiz bu – millatimizning ruhidir.

Nodira Tajimurodova,

tuman Maktabgacha taʼlim boʻlimi shoʻʼba mudiri.