PREZIDENT MASLAHATChISI OʻRINBOSARI BOShChILIGIDAGI IShChI GURUH AMUDARYoDA SAYYoR QABUL OʻTKAZDI

Bugungi kunda mamlakatimizda fuqarolar bilan ishlash boʻyicha yaxlit tizim yaratildi. Muhtaram Prezidentimiz boshchiligida insonlarning muammolarini tinglash, ularni joyida bartaraf qilish, aholiga farovon turmush sharoitlarini yaratish borasida salmoqli ishlar amalga oshirilmoqda. Hududlarda aholi bilan uchrashish, insonlar bilan yaqindan muloqotda boʻlib, ularning muammo hamda kamchiliklarini oʻrganish, hal qilish maqsadida sayyor qabullar oʻtkazilmoqda.

18-sentyabr kuni aholining davlat idoralariga boʻlgan ishonchini yanada mustahkamlash, eng koʻp murojaatlar kelib tushayotgan sohalar boʻyicha muammolarni tezkor hal etish maqsadida Amudaryo tumanida navbatdagi ommaviy sayyor qabul oʻtkazildi.

Sayyor qabulda Prezident maslahatchisi oʻrinbosari Alisher Usmonov rahbarligidagi ishchi guruh aʼzolari, respublikamizdagi vazirliklar, maʼmuriy organlar, idora-tashkilotlar, xoʻjalik birlashmalaridan jalb qilingan mutasaddi rahbarlar ishtirok etdilar. Shuningdek, tuman hokimligi mutasaddilari, boʻlimlar, muassasa va korxona-tashkilotlar rahbarlari hamda aholi vakillari qatnashdilar. Unda Prezident maslahatchisi oʻrinbosari Alisher Usmonov nutq soʻzlab, sayyor qabullarni tashkil qilishdan koʻzlangan maqsadlar hamda uning ahamiyati xususida toʻxtaldi.

Taʼkidlanganidek, hukumat rahbarlarining aholi bilan bevosita muloqotga kirishi, ayniqsa, sayyor qabullar tashkil etib, murojaatchilar huzuriga borishi xalqimizning adolatga, davlatga, ertangi kunga boʻlgan ishonchini yanada mustahkamlashga xizmat qilishi, shubhasiz. Eng muhimi, ochiq muloqotlarda aholiga munosib ish va turmush sharoiti yaratish borasida bor kuch hamda imkoniyatlar ishga solinmoqda. Bunday saʼy-harakatlar yurtdoshlarimizning mamlakatimizda olib borilayotgan islohotlarga daxldorlik hissini yuksaltirib, dunyoqarashini tubdan oʻzgartirish, yaratuvchanlik va tashabbuskorligini oshirishga zamin yaratmoqda.

Shundan soʻng, fuqarolarning murojaatlari hamda takliflari tinglandi. Qabul jarayonida fuqarolardan turli masalalarga oid murojaat hamda takliflar kelib tushdi. Xususan, fermer xoʻjaligi faoliyatni kengaytirish uchun chorvachilik kompleksi tashkil qilish maqsadida yer maydoni ajratib berilishida, 100-oʻrinli maktabgacha taʼlim tashkilotning qurilishini yakuniga yetkazishda hamda zamonaviy oʻquv uskunalari va oʻqitish vositalari xarid qilish uchun imtiyozli kreditlar olishda, tumandagi Qangli madaniyat markazini  qayta taʼmirlash, rekonstruktsiya qilishda, oqar suv taʼminotini yaxshilash maqsadida Qipchoq arna kanali quyi  16 km. qismining qazilishiga, fermer xoʻjalikka traktor sotib olish uchun 270 mln. soʻm mikdorida kredit ajratilishiga, Amir Temur nomli ovul hududidagi xonadonlarning tomorqa yerlarini oqar suv hamda ichimlik suvi bilan  taʼminlash maqsadida 2 ta yer osti  qudugʻi  qurishda amaliy yordam soʻralgan murojaatlar qabul qilindi.

Shuningdek, fuqarolar tomonidan uy-joy qurish uchun yerga muhtoj, ehtiyojmand, kambagʻal oilalarga imtiyoz bilan, auktsionsiz uy-joy qurish uchun yer berish choralarini koʻrish haqida, aholi punktlari posyolkalarda joylashgan, qurilganiga 15-yildan koʻp boʻlgan, soliqlarni oʻz vaqtida toʻlab kelayotgan turar joylarga nisbatan tan olish qarorlari vakolatini tuman hokimliklariga berilishi haqidagi takliflar ham kelib tushdi.

Qabul davomida tumandagi ijtimoiy himoyaga muhtoj aholi qatlami vakillarini yanada qoʻllab-quvvatlash maqsadida nogironligi boʻlgan, jismoniy imkoniyati cheklangan fuqarolarga nogironlik aravachalari topshirildi.

Shuningdek, mutasaddilar tumandagi tabiiy gaz yetib bormaydigan hududlardan boʻlgan Oʻrtaqalʼa ovuli Arna boʻyi mahallasidagi xonadonlarga gaz ballonlarini topshirdilar.

Sayyor qabul karantin qoidalariga amal qilingan holda, ochiq muloqot tarzida oʻtdi. Fuqarolar oʻz fikrlarini ochiq-oydin bayon qildilar. Qabul jarayonida fuqarolar tomonidan qilingan murojaatlar hamda takliflar inobatga olinib, har biri tegishli mutasaddi tashkilotlar bilan kelishilgan holda ijobiy hal qilindi.

Shu oʻrinda qayd etish lozimki, bugun har bir fuqaro uchun barcha davlat organlari va tashkilotlarining eshiklari ochiq. Davlat idoralari rahbarlari fuqarolarning murojaatlarini sokin ish xonalarida emas, balki ijtimoiy jarayonlar kechayotgan pallada joyiga borib, haqiqiy holatni oʻrganmoqdalar.

Aytish kerakki, sayyor qabullar aholi muammolarini joyida, tez va samarali hal etish imkonini berayotgani, hududlarda yigʻilib qolgan muammolarni aniqlash va bartaraf etilishida davlat organlari va tashkilotlari oldiga vazifalar qoʻyayotgani va ushbu vazifalarni toʻlaqonli bajarishga undayotgani bilan muhim ahamiyat kasb etmoqda.

Tuman hokimligining Axborot xizmati.