Amudaryo tumanida saylovlarga puxta tayyorgarlik koʻrilmoqda

Xalq deputatlari Amudaryo tuman Kengashining 2020-yil 19-avgust kungi 12-sessiyasida tuman Kengashining boʻshab qolgan 24-Oq oltin va 28-Daryoboʻyi saylov okruglarda 2020-yilning 20-sentyabr kuni saylov oʻtkazilishi belgilangan edi. Tuman saylov komissiyasining qarori bilan saylovga tayyorgarlik koʻrish va uni oʻtkazish boʻyicha tadbirlarning kalendar rejasi tasdiqlandi.

Ushbu rejaga muvofiq boʻshagan oʻrinlarga boʻlib oʻtadigan saylovga tayyorgarlik koʻrish yuzasidan tuman saylov komissiyasi, 2 ta okrug va 4 ta uchastka saylov komissiyalari tomonidan Saylov kodeksi asosida ishlar oʻz muddatlarida amalga oshirilib kelinmoqda.

Tuman saylov komissiyasining 12-sentyabr kuni boʻlib oʻtgan yigʻilishida saylovga tayyorgarlik koʻrish va uni oʻtkazish boʻyicha tadbirlarning kalendar rejasida belgilangan vazifalarning ijrosi muhokama qilindi.

Aytish kerakki, tuman saylov komissiyasining 4-sentyabrdagi 22-sonli qarori bilan boʻshagan oʻrinlarga xalq deputatlari Amudaryo tuman Kengashi deputatligiga nomzodlar roʻyxatga olindi. Jumladan, 24-Oq oltin saylov okrugidan 3 nafar, 28-Daryoboʻyi saylov okrugidan 3 nafar jami 6 nafar nomzodlar roʻyxatga olindi. 

Tuman saylov komissiyasi saylovni qonun talablari va karantin qoidalariga rioya qilgan holda oʻtkazishda okrug, uchastkalar saylov komissiyalari aʼzolariga yaqindan yordam berib kelmoqda.

Shuningdek, tuman saylov komissiyasi aʼzolari tushuntirish-targʻibot ishlari bilan ham shugʻullanib, Saylov Kodeksining mazmun-mohiyati, fuqarolarning saylash huquqi va konstitutsiyaviy burch hamda majburiyatlari haqida saylovchilarga keng tushunchalar berib kelmoqda.

***

Saylov uchastkalarida ham tayyorgarlik ishlari jadal surʼatda olib borilmoqda.

Saylov boʻlib oʻtadigan 2 ta okrug va 4 ta uchastka saylov komissiyalari tomonidan Saylov kodeksi asosida amalga oshirilishi lozim boʻlgan vazifalarning oʻz muddatlarida ijrosi taʼminlanmoqda. Jumladan, saylovchilar roʻyxatiga aniqlik kiritish, fuqarolarga pandemiya sharoitida saylovlar oʻtkazish tartibini tushuntirish, saylov uchastkalarini jihozlash kabi tayyorgarlik ishlari namunali tarzda tashkil qilinmoqda.

Xalq deputatlari tuman Kengashining “24-Oq oltin” saylov okrugidan deputatligiga 3 nafar nomzodlar roʻyxatga olingan. Ayni kunlarda uchastka saylov komissiyalari joylashgan binolar deputatlikka nomzodlarning tarjimai holi haqidagi maʼlumotlar bilan taʼminlangan boʻlib, komissiya aʼzolari aholi orasida tushuntirish-targʻibot ishlarini amalga oshirmoqdalar.

Shu oʻrinda taʼkidlash kerakki, saylovlarni ochiq-oshkora, milliy saylov qonunchiligimiz talablariga muvofiq, demokratik saylovlar oʻtkazish boʻyicha toʻplangan boy milliy tajribamizga asoslangan holda hamda umumeʼtirof etilgan xalqaro huquq normalari va standartlari talablariga hamohang tarzda tashkil etish, eng asosiysi saylovlar jarayonida har bir fuqaroga, saylovchiga oʻz xohish-irodasini erkin ifoda etishi uchun shart-sharoit va imkoniyat yaratib berish muhim ahamiyat kasb etadi. Shu sababli uchastka saylov komissiyalari raislari va aʼzolari ushbu muhim siyosiy jarayonga munosib tayyorgarlik koʻrmoqdalar.

“24-Oq oltin” okrug saylov komissiyasi raisi, 41-sonli umumtaʼlim maktabi direktori Duysenboy Nurjanov okrug va uchastkalar saylov komissiyalari aʼzolariga samarali faoliyat olib borishlari uchun qulay sharoitlar yaratish, saylov okrugi va uchastkalar joylashgan binolarning barcha talablarga javob berishini nazorat qilish, saylovga oid qoʻllanmalar va zaruriy jihozlar bilan toʻliq taʼminlash, saylov okrugi va uchastkalari joylashgan binolar atroflarini obodonlashtirish va muhandislik-kommunikatsiya tarmoqlarining uzluksiz ishlashlarini taʼminlash ishlariga katta eʼtibor qaratmoqda.

Shuni alohida taʼkidlash joizki, Respublika maxsus komissiyasi xulosasiga koʻra pandemiya sharoitida aholining xavfsizligini taʼminlash maqsadida saylovchilarga chaqiruv qogʻozlari tarqatilmaydi. Shunday ekan, Oq oltin ovulining “Koʻnabosu”, “Tozabosu”, “Paxtaobod”, “Dehqonobod” va “Jiydali Qulon” aholi punktlarida, “Qipchoq” shaharchasida, shuningdek, Daryoboʻyi mahallasi “Taraqqiyot” aholi punktining janubiy qismidagi xonadonlarda istiqomat qiluvchi saylov huquqiga ega boʻlgan barcha yurtdoshlarimizni 20-sentyabr kuni boʻlib oʻtadigan saylovlarda faol ishtirok etib, oʻz konstitutsiyaviy huquqlaridan foydalanishga hamda oʻzlari munosib deb bilgan nomzodlarga ovoz berishga chaqiramiz.

Oygul Rajabova,

Charos Arslonova.