JUMUP OVULLIK PILLAKOP PAISA ONAXON

Tumanimizning goʻzal goʻshalaridan boʻlmish Jumur ovul mahallasida koʻplab jonkuyar, fidoyi, mehnatsevar insonlar istiqomat qilishadi. Ularning qilgan xayrli ishlari, albatta, har bir insonni hayajonga solmasdan qoʻymaydi. Ayniqsa, yurtimizdagi karantin holati har bir soha vakilini oʻz sohasida fidoyilikka undaydi.

Sinovli kunlarni birgalikda yengib oʻtish istagi Jumur ovulliklar uchun kundalik qoidaga aylangan. Boshqird millatiga mansub Qalandarova Paisa ona ana shunday fidoyilardan. U oilada oqila, mehribon ona boʻlish bilan bir qatorda fidokorona mehnatlari bilan koʻpchilik qalbidan joy olgan. Paisa ona Boshqirdiston Pespublikasidan mahallamizga kelin boʻlib tushgan va shu yurtni Vatan deb bilib, xizmatiga shaylandi. 1969-yildan buyon avvalgi Krupskaya, hozirgi Zarbdor nomli MTP hududidagi fermer xoʻjaliklarida ishlab, nafaqaga chiqdi. Har yili ipak qurti boqish mavsumida 25-30 gramm ipak qurti parvarishlab, yurtimiz pillachiligi rivojiga munosib xissa qoʻshib kelmoqda. Bugungi kunda ham nafaqada boʻlishiga qaramasdan ipak qurti boqishda davom etmoqda. Bu yil onaxon 19 gramm ipak qurti urugʻini parvarishlamoqda.

Paisa ona oilasiga, el-yurtga mehribon. U Bobojon ota Qalandarov bilan yetti nafar farzandni ziyoli insonlar qilib tarbiyalab, xalqimiz xizmatiga yoʻlladi. Har bir farzandi oʻz sohasining ustalaridir. Onaxonimiz bolalari, nevara-chevaralari davrasida xursand va baxtiyor hayot kechirmoqda.

Boshqird millatiga mansub xonadonda tugʻilib, voyaga yetgan, Oʻzbekistonning olis va soʻlim qishlogʻi – Jumur ovulni oʻziga suyukli Vatan qilgan, el-yurtga, oilasiga fidoyi, mehnatkash Paisa ona bilan biz haqli ravishda faxrlanamiz va halol mehnat bilan obod, fayzli xonadonidan aslo quvonch arimasligini tilab qolamiz.

Halima Utaganova, 48-maktab oʻqituvchisi.