QORAQALPOGʻISTON RESPUBLIKASI MIGRATsIYa VA FUQAROLIKNI RASMIYLAShTIRISh BOShQARMASI BOShLIGʻI Sh.TOʻRAYeV JUMUROVULLIK YoShLAR BILAN UChRAShDI

Oʻzbekiston Respublikasi Prezidentining 2024-yil 21-fevraldagi “Oʻzbekiston - 2030” strategiyasini “Yoshlar va biznesni qoʻllab-quvvatlash yili”da amalga oshirishga oid davlat dasturi toʻgʻrisida”gi Farmoni 1-bandiga asosan 2024-yil 1-martdan boshlab alohida ishlash talab etiladigan, shuningdek, isteʼdodli va iqtidorli yoshlar Mahallalarda yoshlar bilan ishlash masalalarini muvofiqlashtirish boʻyicha Respublika komissiyasi qarori bilan “Yoshlar balansi” asosida vazirlik va idoralar, mahalliy ijro etuvchi hokimiyat organlari, davlat ishtirokidagi korxona va tashkilotlar hamda oliy taʼlim tashkilotlari rahbarlariga biriktirilishi belgilangan edi.

Dasturda belgilanganidek, mazkur rahbarlar har oyda kamida bir marotaba oʻzlariga biriktirilgan hudud yoshlari bilan uchrashib, ularning muammolarini hal qilish, bilim va salohiyatlarini yuzaga chiqarish, ularni talab yuqori boʻlgan kasb-hunarga oʻqitish orqali bandligini taʼminlash, hayotda oʻz oʻrnini topishi, shuningdek, huquqiy ongi va madaniyatini yuksaltirishga har tomonlama koʻmaklashib borilishi taʼkidlangan boʻlib, joylarda bu borada davlat dasturi ijrosini taʼminlashga qaratilgan ishlar boshlab yuborildi.

Xususan, idora va tashkilotlar hamda vazirlikdar, hokimiyat organlari xodimlari oʻzlari biriktirilgan hududlarda boʻlishib, yoshlar muammolarini joyiga chiqqan holda oʻrganmoqdalar. Oʻrganishlar natijasida aniqlangan muammolar yechimi yuzasidan chora-tadbirlar rejalari ishlab chiqilib, shu asosda tizimli ishlar yoʻlga qoʻyilmoqda. Unga koʻra, yoshlarning salohiyati, isteʼdodi va tashabbuslarini toʻlaqonli roʻyobga chiqarish maqsadida “Besh tashabbus olimpiadasi” doirasida xorijiy tillarni qunt bilan oʻrganayotgan bilimdon yoshlar bellashuvlari, kibersport musobaqalari va “Zakovat” intellektual oʻyinlarini tashkil etish orqali salohiyatli, iqtidorli yoshlarni ragʻbatlantirishga alohida ahamiyat qaratilmoqda.

Joriy yilning 13-mart sanasida Qoraqalpogʻiston Respublikasi Ichki ishlar vazirligi Migratsiya va fuqarolikni rasmiylashtirish boshqarmasi boshligʻi Shavkat Toʻrayev Amudaryo tumanida boʻlib, oʻziga biriktirilgan hudud yoshlari bilan uchrashdi. Jumurovul mahalla fuqarolar yigʻini hududidagi 45-sonli umumtaʼlim maktabida boʻlib oʻtgan mazkur uchrashuv tadbirida Amudaryo tuman IIB huzuridagi Migratsiya va fuqarolikni rasmiylashtirish boʻlimi boshligʻi Abdurahmon Umirov, hudud boʻyicha yoshlar yetakchisi Zafar Otaboyev va mahallaning iqtidorli yoshlari ishtirok etishdi.

Oshkora va samimiy muloqot tarzida oʻtkazilgan uchrashuv tadbirida Shavkat Toʻrayev mahalla yoshlarining yozma va ogʻzaki murojaatlarini hudud masʼullari bilan birgalikda oʻrgandi. Oʻrganishlar natijasida safarbarlik chaqiruv rezervi tarkibida harbiy xizmat burchini oʻtash uchun ketayotgan yoshlarning shartnoma pullarini toʻlash, OTMlarda taʼlim olayotgan yoshlarning oʻqishi uchun shartnoma mablagʻini toʻlab berish, shuningdek, kasb-korli, mutaxassislik diplomiga ega yoshlarning ish bilan bandligini taʼminlash boʻyicha yoshlarning murojaatlari alohida tizimga olinib, mutasaddi tashkilotlar rahbarlari bilan birgalikda hal etish choralari koʻrildi.

Uchrashuv davomida yoshlar oilaviy tadbirkorlik doirasida davlatimiz tomonidan ajratilayotgan kredit mablagʻlari hisobidan oʻz loyihalarini amalga oshirish borasida amaliy yordam koʻrsatish, olis qishloqlarda ham til oʻrganish markazlarini tashkil etish yuzasidan oʻzlarining fikrlari va takliflarini bayon qildilar. Shu bilan birga, yoshlar tadbirkorligini rivojlantirish, shaxsiy biznes-loyihalarini ishlab chiqish boʻyicha oʻzlarini qiziqtirgan savollar bilan murojaat qildilar. Yoshlarning barcha savollariga masʼullar batafsil javob berdilar.

Robiya YOʻLDOShEVA.