BOYOVUL MAHALLASINING NURONIY ONAXONLARI IShTIROKIDA DAVRA SUHBATI OʻTKAZILDI
Yoshi ulugʻ insonlarni qadrlash, ularning hayot tajribasini oʻrganish, pand-u nasihatlariga doimo amal qilish xalqimizga xos qadriyat hisoblanadi. Ushbu qadriyatlarni davom ettirish hamda yurtimizda katta avlod vakillarining tinchlik, osoyishtalikni mustahkamlashdagi ishtirokini oshirish, yoshlarni vatanparvarlik, milliy qadriyatlarimizga hurmat ruhida tarbiyalashda ularning boy hayotiy tajribasidan foydalanishga alohida eʼtibor qaratilmoqda.
Amudaryo televideniyesining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida ham “Keksalar – xonadonlarimiz fayzi va farishtasi” shiori ostida turli tadbirlar tashkil etilmoqda. Keksalarni eʼzozlash, ularning pand-nasihatlarini yoshlarga yetkazish orqali jamiyatda oʻzaro hurmat va mehr-muhabbat, yuksak axloqiy va maʼnaviy muhitni shakllantirish borasida hududlarda “Buvijonlar maktabi” aʼzolari tomonidan amalga oshirilayotgan ishlar tanishtirib borilmoqda.
22-dekabr kuni 16-sonli ixtisoslashtirilgan davlat umumtaʼlim maktabida mazkur grant loyihasi ish rejasiga koʻra Boyovul mahallasida “Buvijonlar maktabi” aʼzolari, nuroniy onaxonlar, mehnat faxriylari ishtirokida davra suhbati tashkil etildi. Ushbu tadbirda loyiha ijrochilari, tahririyat xodimlari va fuqarolar yigʻini xotin-qizlar faoli Husnida Abdurahmonova, mahalla qizlari ishtirok etishdi.
Tadbirda dastlab Amudaryo televideniyesi tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi ish rejasiga muvofiq oʻtkazilayotgan tadbirlar, tanlovlar xususida maʼlumotlar berildi. Ushbu tadbirlarning yoshlarning boʻsh vaqtlarini mazmunli oʻtkazishlarida, ularni kitobxonlikka jalb etishda muhim ahamiyat kasb etayotgani taʼkidlab oʻtildi.
Tadbir davomida faxriy oʻqituvchi Hayitgul Allaqova xonadonlar koʻrki boʻlgan bobo va buvijonlar qanoti ostida farzandlarning ulgʻayib, kamol topishida koʻp hikmat mujassamligi, bu hikmatlar ulugʻ yoshdagi keksalarning oʻzbekona tutumlari, oila aʼzolarining xulq-atvoridagi goʻzal sifat va fazilatlarda namoyon boʻlishini eʼtirof etdi.
Shuningdek, qiz bolaning odobi, kiyinish madaniyati, milliy liboslar haqida ham soʻz yuritib, qadimda buvilar, onalar kiygan liboslarga taʼrif berdi. Hayotiy tajribalaridan misollar keltirib, qizlarni ibo-hayoli, odob-ikromli, kasb-hunarli boʻlishga undab, oʻz oilasining koʻrki, ota-onasining faxri, jamiyatga kerakli insonlar boʻlib ulgʻayishlariga tilak bildirdi.
Mahalladagi faol onaxonlar libos har bir xalq milliy madaniyatini, milliy qadriyatlarini oʻzida aks ettiruvchi eng muhim belgi ekanligini alohida taʼkidlab, milliy qadriyatlarimizga, momolarimizning umrboqiy udum va anʼanalariga hurmat bilan qarash lozimligini aytib oʻtishdi.
Boyovul mahalla fuqarolar yigʻini xotin-qizlar faoli Husnida Abdurahmonova ham libos nafaqat insonning tashqi koʻrinishi bezagi, balki undagi axloq-odob, maʼnaviyat va madaniyatning belgisi ekanligin, momo va buvijonlarimiz kiygan milliy liboslar oʻzbek xalqining qadimiy va oʻchmas maʼnaviyati va boy qadriyatlari oʻz ifodasini topganligini taʼkidlab, mahalla hududida bu borada amalga oshirilayotgan ishlar xususida soʻzlab oʻtdi.
Nuroniy onaxonlar “Mutaassiblik va yot gʻoyalar taʼsiriga tushib qolmaslik”, “Milliy urf-odatlar va anʼanalar”, “Qiz bola odobi”, “Sarishtalik uy – farishtalik uy”, “Ozodalik va poklik – sogʻlik garovi”, “Oilalarda sogʻlom turmush tarzini toʻgʻri yoʻlga qoʻyish”, “Toʻgʻri ovqatlanish – salomatlik garovi” mavzularida qizlar bilan dildan suhbat qurishdi.
Amudaryo televideniyesining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida oʻtkazilgan tadbir baprchaga manzur boʻldi.
O.Xudoyberganova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
