Karantin davridagi cheklov va kuchaytirilgan tartib-qoidalarni buzish bilan bogʻliq huquqbuzarliklarga chek qoʻyilmoqda

Butun dunyo boʻylab keng tarqalgan koronavirus pandemiyasi davrida bor kuch va imkoniyatlar ushbu infektsiyaga qarshi kurashish, insonlar salomatligini muhofaza qilish, hayotini asrashga qaratilmoqda. Tobora jiddiy tus olayotgan hozirgi vaziyatda dunyoda va mamlakatimizda koronavirus infektsiyasi keng tarqalishining olini olishga qaratilgan keskin choralar koʻrib borilmoqda.

Vaziyatning qanchalik jiddiy va tahlikali ekanini his qilmaslik, avvalo oʻzini, yaqinlarini, qolaversa, boshqalarning salomatligini xatarga qoʻyish ham bugungi qaltis kunda eng katta jinoyatdir. Shu bois yurtimizning barcha hududlaridagi kabi tumanimizda ham sanitariya-epidemiologik osoyishtalikni taʼminlash, epidemiyaga qarshi kurashish va karantin qoidalariga rioya etilishi ustidan Ichki ishlar boʻlimi, Yoʻl-patrul xizmati, Milliy gvardiya, Favqulodda vaziyatlar boʻlimi va Sanitariya-epidemiologiya osoyishtalik markazi xodimlari tomonidan qatʼiy nazorat oʻrnatilgan.

Aytish joizki, karantin boshlanganidan buyon tumanimiz hududida oʻtkazilayotgan reydlar, nazorat tadbirlari davomida masʼullikni his qilmayotgan, belgilangan cheklovlarga eʼtiborsiz qarayotgan va maqsadsiz koʻchada yurgan fuqarolar uchrayotgani juda achinarli. Karantin qoidalarini buzib, oʻz yaqinlari hayotini xatarga qoʻyayotgan bunday shaxslarga nisbatan huquqni muhofaza qiluvchi organlar tomonidan belgilangan tartibda maʼmuriy choralar qoʻllanilmoqda.

Tuman Ichki ishlar boʻlimi xodimlari tomonidan karantin boshlanganidan buyon koʻchada tibbiy niqobsiz yurgan 96 nafar shaxsga eng kam ish haqining 1 baravari miqdorida jarima solindi. Belgilangan karantin qoidalariga amal qilmasdan yoʻlda oʻz avtomobilida maxsus ruxsatnomasiz harakatlanayotgan 33 nafar haydovchi aniqlandi. Ushbu haydovchilarga maʼmuriy jazo tayinlanib, avtomashinalari vaqtincha saqlash uchun jarima maydonchalariga joylashtirildi. Koʻchada maqsadsiz velosipedda harakatlanib ketayotgan 202 nafar fuqaroning velosipedlari olib qoʻyildi. Shuningdek, yoʻllarda maqsadsiz yurgan 87 nafar fuqarolarga karantin qoidalari tushuntirildi.

7-aprel kuni  tumanimizda oʻtkazilgan reyd tadbirida ham oʻrnatilgan cheklov va kuchaytirilgan tartib-qoidalarni buzish bilan bogʻliq qator huquqbuzarlik holatlari aniqlandi. Reyd jarayonida 3 nafar fuqaro Maʼmuriy javobgarlik toʻgʻrisidagi Kodeksning 131-moddasi talablarini buzib mast holda, 3 nafar fuqaro hujjatsiz, 1 nafar fuqaro Maʼmuriy javobgarlik toʻgʻrisidagi Kodeksning 126-moddasi 1-qismiga zid ravishda avtomobil boshqarib kelayotgani maʼlum boʻldi. Shuningdek, nazorat davomida yoʻl harakati qoidalarining boshqa bandlarini buzgan koʻplab avtoransport haydovchilari va piyoda fuqarolar aniqlandi. Ushbu holatlar boʻyicha huquqbuzarlarga nisbatan maʼmuriy bayonnomalar tuzilib, rasmiylashtirildi.

Koʻrilayotgan choralardan koʻzlanayotgan asosiy maqsad fuqarolarimizni karantin davrida tartibga chaqirib, koronavirus kasalligi tarqalib ketishining oldini olishdir. Fuqarolarimizga imkon qadar uyda qolishlari kerakligi, koʻchalarda bemaqsad va niqobsiz yurishlari mumkin emasligi takror-takror tushuntirilsa-da, huquqbuzarlik holatlari hali-hamon sodir etilmoqda. Dunyo boʻylab karantin choralari tufayli koronavirusdan oʻlim darajasi kamaymoqda. Bu ofatga qarshi davo topilmayotgan hozirgi paytda infektsiya tarqalishining oldini olishda birdan-bir samarali vosita bu karantindir. Shu sababli yurtdoshlarimizdan karantin qoidalariga qatʼiy rioya qilishlarini soʻrab qolamiz. 

O.Xudoyberganova.