Oʻsimliklar karantini va himoyasi boʻyicha seminar boʻlib oʻtdi
Oʻzbekiston Respublikasi Oʻsimliklar karantini ilmiy-tadqiqot instituti tomonidan Qoraqalpogʻiston Respublikasi Amudaryo tumanining Choykoʻl ovuli hududidagi bogʻ maydonida biologik usulning afzalligiga bagʻishlangan seminar boʻlib oʻtdi.
Tadbirga Oʻsimliklar karantini va himoyasi ilmiy-tadqiqot instituti masʼullari, mazkur ilmiy-tadqiqot institutining Qoraqalpogʻiston Respublikasi filiali direktori Daryoboy Ubbiniyazov va filial xodimlari, tuman fermer, dehqon xoʻjaliklari va tomorqa yer egalari kengashi mutasaddilari, paxta klasteri korxonasi bosh agronomi, tuman agronom-inspektorlari, biolaboratoriya xodimlari va bogʻdorchilikga ixtisoslashgan fermer xoʻjaliklari qatnashdi.
Maʼlumki, qishloq xoʻjaligi ekinlari maydonlarini kengaytirish va ularning hosildorligini oshirish uchun karantindagi va boshqa iqtisodiy xavfi yuqori boʻlgan zararkunandalarga alohida eʼtibor qaratish lozim. Bu borada feromonitoring usulining oʻrni katta. Mazkur usul zararkunandaning tabiatda rivojlanishini aniqlash natijasida unga qarshi biologik yoki kimyoviy usulni ishlatishning ilmiy asoslangan muddatini belgilab berib, himoya samaradorligini oshiradi. Zararkunandalarning bor yoki yoʻqligini monitoring qilish maqsadida feromon tutqichlardan toʻgʻri foydalanish, zararkunandalar mavjud boʻlgan taqdirda tezkorlik bilan ularga qarshi kurash choralarini ishlab chiqish usullarini toʻgʻri olib borish haqida maʼlumotlar berildi.
Seminarda karantindagi va boshqa xavfli zararkunanda oʻchoqlarini yoʻq qilish va ulardan holi boʻlgan hududlarni belgilash, ular tarqalishining oldini olish hamda ularga qarshi kurashish boʻyicha zarur tavsiyalar berildi. Tuman hududida katta iqtisodiy zarar keltirishi mumkin boʻlgan zararkunandalarning xavflilik tahlilini oʻtkazish va ular kirib kelishining oldini olishga qaratilgan ilmiy asoslangan fitosanitar choralar ishlab chiqish va ularni amaliyotga tadbiq etish yuzasidan seminar ishtirokchilariga maʼlumotlar berib oʻtildi.
Shuningdek, tadbir davomida tuman agronom-inspektorlari tomonidan oʻsimliklar karantini va himoyasi sohasida feromon tutqichlardan keng foydalanishi boʻyicha feromonitoring yurilishi, shu bilan birga, zararkunandlarning qishloq xoʻjaligiga taʼsirini oʻrganish, ularni zararsizlantirishning zamonaviy usullarini ishlab chiqish va yangi turdagi choralarni yaratish muhokama qilindi.
Seminarda ishtirokchilar yuqoridagi zararkunandalarga qarshi oʻz vaqtida kurash olib borilmasa, ularning iqtisodiy zarari, tarqalish xavfi va oqibatlari haqida tushunchalarga ega boʻlishib, oʻzlarini qiziqtirgan savollarga mutaxassislar tomonidan javoblar olishdi.
Shahzod QURBONBOYeV, QDU talabasi
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
