“HAMIShA QALBIMIZDA YaShAR NOMINGIZ” MAVZUSIDA XOTIRA TURNIRI OʻTKAZILDI

El-yurt farovonligi, yoshlar kelajagi uchun oʻz umrini bagʻishlagan fidoyi insonlar nomlari oʻzlari bu dunyodan oʻtganlaridan soʻng ham uni yaxshi bilgan insonlar qalbida abadiy yashayveradi. Bunday insonlar bilan bogʻliq xotiralar ham oʻz yaqinlari, doʻstlari, ayniqsa, shogirdlari uchun maʼnaviy ruh bagʻishlab, ularni ezgu ishlar sari ruhlantirib turadi. Alloh rahmat qilsin, Oʻrozboy Saʼdullayev ana shunday fidoyi insonlardan edi.

Oʻrozboy Saʼdullayev qisqa, lekin juda mazmunli umr kechirdi. U 1985-yildan 2018-yilgacha 39-sonli umumtaʼlim  maktabida oʻquvchilarga jismoniy tarbiya va chaqiriqqacha yoshlarni tayyorlash fanidan dars berdi. Oʻquvchi-yoshlar oʻrtasida sportni ommalashtirish, ularning jismonan va maʼnan yetuk, vatanparvar insonlar boʻlib voyaga yetishlari uchun bor bilim va tajribasini ayamadi. Tuman va Respublika miqyosidagi sport musobaqalariga oʻquvchi-yoshlarni tayyorlash, oʻzi mehnat qilayotgan 39-sonli maktab jamoasi nomini tuman va respublika miqyosida tanitish maqsadida vaqtini ham, bilim va tajribasini ham ayamadi. U oʻzidan kichiklarga ham, kattalarga ham bir xil samimiy muomalada boʻldi. Oʻqituvchi etikasiga amal qilish Oʻrozboy Saʼdullayevga xos namunali fazilat edi. Shuning uchun ham uning  shogirdlari turli bayram sanalarida, hayitlarda “Ustoz” deya qabrini ziyorat qilishadi, haqqiga qurʼon tilovat bagʻishlaydilar.
Uning shogirdlari orasida Vatan himoyachilari, yoshlar ustozi, taniqli sport ustalari, muhimi, el-yurtga kamarbasta insonlar juda koʻp.

Oʻrozboy Saʼdullayevning tavallud sanasi munosabati bilan u hayotligida mehnat qilgan 39-sonli umumtaʼlim maktabida 9-10-11-sinflar oʻquvchilari ishtirokida “Hamisha qalbimizda yashar nomingiz” mavzusida xotira turniri oʻtkazildi. Xotira turnirida Oʻrozboy Saʼdullayevning hamkasblari, ustoz va shogirdlari u haqdagi shirin xotiralarni yodga  oldilar. Oʻrozboy Saʼdullayevning hayoti va faoliyati bilan bogʻliq ezgu ishlar haqida faxrlanib soʻzladilar.

Shundan soʻng, maktab maʼmuriyati va jismoniy tarbiya va chaqiriqqacha yoshlarni tayyorlash fani oʻqituvchilari tomonidan sportning yengil atletika  turi boʻyicha musobaqalar tashkil etildi.

Musobaqalar olis masofaga yugurish, arqon tortishish, granata uloqtirish shartlari boʻyicha oʻtkazildi. Nihoyatda hayajonli daqiqalarga boy oʻtgan musobaqada oʻquvchi-yoshlar quvonarli koʻrsatkichlarga erishdilar. Gʻolib oʻquvchilar maktab maʼmuriyati tomonidan faxriy yorliqlar bilan taqdirlandilar.

Shuni alohida qayd etish kerakki, mazkur xotira turniriga maktabni 2003-yilda tugatgan sobiq oʻquvchilar homiylik qilishdi. Oʻrozboy Saʼdullayevning sobiq oʻquvchilari oʻz ustozlari haqida faxrlanib soʻzladilar. Ustoz taʼlimi, tarbiyasi tufayli oʻzlari hayotda erishayotgan yutuqlari haqida oʻquvchi-yoshlarga hikoya qilib berdilar.

Ustozning yorqin xotirasiga bagʻishlab oʻtkazilgan ushbu turnir uning yaqinlari, hamkasblari, shogirdlari va oʻquvchi-yoshlarda katta taassurot qoldirdi.

Muhabbat JANDAULETOVA, 39-sonli maktab direktorining maʼnaviy-maʼrifiy ishlar boʻyicha oʻrinbosari.