"Jayxun ilhomlari” NNT tomonidan yoshlarni kitobxonlikka jalb etish boʻyicha tadbirlar oʻtkazildi

Ijtimoiy, maʼnaviy-maʼrifiy sohalardagi ishlarni yangi tizim asosida yoʻlga qoʻyish boʻyicha beshta muhim tashabbusning toʻrtinchisida yoshlar maʼnaviyatini yuksaltirish, ular oʻrtasida kitobxonlikni targʻib qilish boʻyicha tizimli ishlarni tashkil etish gʻoyasi ilgari surilgan. Shu jihatdan olib qaraganda tumanimizning barcha oʻquv maskanlarida, korxonalarda, madaniyat markazlarida kutubxonalarning mavjudligi, ularning kitobxonlar bilan gavjumligi kishining koʻngliga quvonch bagʻishlaydi.

 “Jayxun ilhomlari” nodavlat notijorat tashkiloti tomonidan rejaga muvofiq taʼlim muassasalarida yoshlarni kitobxonlikka jalb etish, qiziqishlarini yanada oshirish maqsadida maʼnaviy-maʼrifiy tadbirlar oʻtkazish yoʻlga qoʻyildi.

  Amudaryo qishloq xoʻjaligi kasb-hunar kolleji kutubxonasida boʻlib oʻtganana shunday tadbirda kutubxona mudirasi Vazira Sobirova bu yerda oʻquvchilarning kitob bilan oshno boʻlib, chuqur bilim egallashlari uchun barcha shart-sharoitlar muhayyo qilinganligini, kutubxonaning 1560 dona kitob fondi boʻlib, bular asosan darsliklardan iborat ekanligini va badiiy adabiyotlar ham mavjudligini aytib oʻtdi. Kutubxonaning 284 nafar aʼzosi va boshqa kitobsevarlar internet tarmogʻiga ulangan kompyuter tizimidan foydalanishini, shinam va yorugʻ oʻqish zali mavjudligini gapirdi.

Kutubxona xodimlari esa kollej maʼmuriyati tomonidan kitob fondini yanada boyitish, oʻquvchilar uchun yanada qulay muhitni yaratish maqsadida zarur choralar koʻrilayotganini taʼkidlashdi. Kollej oʻquvchilaridan Rustam Roʻzmetov hamda boshqalar kutubxonadagi kitoblardan foydalanib, oʻz bilim va salohiyatlarini oshirib kelayotganligini hamda kitoblarning inson hayotida tutgan oʻrni haqidagi fikrlarini bayon etdilar.

Tashkilot tomonidan hududlardagi yoshlarni kitobxonlikka jalb etish, qiziqishlarini oshirish maqsadida oʻtkazilib kelinayotgan tadbirlar barchaga juda manzur boʻlmoqda.

Oʻ.REYIMOV. “Jayxun ilhomlari” NNT raisi.