BOLAJONLARNING TILINI VA DILINI ANGLASh TARBIYaChI MAHORATIGA BOGʻLIQ

Men har tong bolalarni xushkayfiyat bilan kutib olishga harakat qilaman. Ikki kun katta, ikki kun kichik va oʻrta guruhlarda mashgʻulotlar olib boraman. Kichik guruh bolalari koʻpincha injiqlik qilib, oyilaridan ajralishni istamay, yigʻlab qoladilar. Shunday bolajonlarga sheʼr aytib bersam, tinchib qolishadi.

Yigʻlamagin bolajon,
Burning oqadi.
Gar yigʻlasang bolalar,
Senga boqadi.
“Uyat-uyat”, - deydilar
Senga kulishib,
Shoʻx-shodon bola boʻlgin
Oʻynagin joʻshib.

Bu sheʼrni qoʻshiq qilib aytsam, har qanday yigʻloqi bola ham yigʻisini toʻxtatib, guruh oʻyiniga qoʻshilib ketadi. Bolajonlarga nonushta va tushlikdan keyin mazali taomlar uchun oshpazga rahmat aytishni oʻrgatish, ularning qalbida yaxshi ishlardan minnatdorlik tuygʻusini uygʻotadi.

Rahmat Sizga, opajon,
Doim boʻling sogʻ-omon.
Mazza qilib yedik biz.
Endi yotib uxlaymiz, - deya rahmat aytadilar.

Bu ham bola qalbida insoniylik odobini shakllantiradi.

Begʻubor bolalar davrasida mehnat qilish, ularga taʼlim-tarbiya berish, qalblarida vatanparvarlik tuygʻularini uygʻotish maqsadida stsenariylar, hatto sheʼrlar yozaman. Bu menga ilhom bagʻishlaydi:

Atrofimda oʻynashar,
Jajji, koʻzi munchoqlar.
Dikir-dikir sakrashar,
Goʻyo chopqir toychoqlar,
Bir kun oʻsib, albatta,
Elga sarbon boʻladi.
Oʻzbekiston degan yurtga,
Ezgulik yogʻiladi.

Agar tarbiyachi bolajon, qalbi mehr-muhabbatga toʻla boʻlsa, bolajonlar unga hamisha talpinib turishadi. Tarbiyachining har bir harakatiga hatto soʻzlashlariga ham taqlid qilishadi. Demak, tarbiyachi hamisha izlanishdan, oʻqib-oʻrganishdan toʻxtamasligi kerak.

Bolajonlarning tilini va dilini anglash esa tarbiyachi mahoratiga bogʻliq. Mahoratli tarbiyachi hamma narsaning uddasidan chiqadi.

Tursunoy OʻROZBOYeVA, 8-sonli MTM tarbiyachisi.