INGLIZ TILINI OʻQITISh BOʻYIChA 36-SONLI TAYaNCh MAKTABIDA XORIJIY MUTAXASSIS OʻZ FAOLIYaTINI BOShLADI

Bugungi globallashuv davri barcha soha mutaxassislaridan oʻz ona tilidan tashqari, dunyo xalqlari uchun oʻzaro muloqot tili sifatidagi bir yoki bir necha xorijiy tillarni bilishni talab etadi. Chunki til bilish nafaqat shaxsning kamolotida, balki mamlakat taraqqiyotida ham muhim ahamiyatga ega.

Mamlakatimizda bu boradagi ishlarni yuqori bosqichga koʻtarish maqsadida Prezidentimiz tomonidan 2021-yil 19-mayda qabul qilingan "Oʻzbekiston Respublikasida xorijiy tillarni oʻrganishni ommalashtirish faoliyatini sifat jihatidan yangi bosqichga olib chiqish chora-tadbirlari toʻgʻrisida"gi Qarorida keng koʻlamli vazifalar belgilab berildi.

Mazkur Qaror bilan Oʻzbekiston Respublikasi Vazirlar Mahkamasi huzurida Xorijiy tillarni oʻrganishni ommalashtirish Agentligi tashkil etildi. Ayni paytda ushbu Agentlik tomonidan mamlakatimizning eng chekka hududlaridagi taʼlim-tarbiya muassasalarida xorijiy tillarni oʻquvchilarga mukammal oʻrgatish, chet tillari boʻyicha fan oʻqituvchilarining kasbiy mahoratlarini oshirishga qaratilgan amaliy ishlar samarali yoʻlga qoʻyilib, sohaga xorijiy davlatlardan malakali mutaxassislarni jalb qilgan holda ish olib borilmoqda.

Joriy yilning 5-dekabr sanasida Prezident Farmon va Qarorlarida belgilangan vazifalar ijrosini taʼminlash maqsadida Amudaryo tumanidagi 36-sonli ingliz tili fanini oʻqitish boʻyicha tayanch maktabida ingliz tilini oʻrganishni samarali tashkil etish maqsadida ushbu fan boʻyicha tajribali xorijiy mutaxassis shartnoma asosida oʻz faoliyatini boshladi.

Kasbi yuqori malakali ingliz tili fani oʻqituvchisi boʻlgan 39 yoshli Emmanuel Panoga Sanchez Filippin davlatida tugʻilgan. Oʻzbekistonga kelishidan avval Vetnamda faoliyat olib borgan.

Mehmonni tuman taʼlim tizimi masʼullari va maktab oʻqituvchilari hamda oʻquvchilari ehtirom bilan kutib oldilar. Soʻngra u tumandagi 56-sonli maktabning ingliz tili oʻqituvchisi tomonidan tashkil etilgan tajriba almashuv soatida ishtirok  etib, oʻz fikrlarini bildirdi. Emmanuel Sanchez 36-sonli maktabda 1-yil davomida faoliyat yuritadi. U maktab oʻquvchilariga haftasiga 20 soat dars oʻtadi va 6 soat toʻgarak mashgʻulotlarini oʻtkazadi.

Xorijiy mutaxassis tomonidan tumandagi ingliz tili oʻqituvchilarining malakasini oshirish uchun maxsus tizim yoʻlga qoʻyilgan. Amudaryo tumani Maktabgacha va maktab taʼlimi boʻlimi tasarrufidagi 86 ta maktablarning har biridan 1 nafar, jami 86 nafar ingliz tili oʻqituvchilari uchun har oyning ikkinchi haftasidagi juma kunlari "Kasbiy rivojlanish kuni" doirasida 2 soatlik mahorat darslarini olib boradi.

Xorijiy mutaxassisning mahorat darslari orqali amaliy koʻnikmalarga ega boʻlgan 86 nafar ingliz tili oʻqituvchilari esa oyiga 4-marta, har haftaning juma kuni oʻzlari faoliyat olib boruvchi umumtaʼlim maktablarining ingliz tili oʻqituvchilari uchun tajriba almashuv asosida mahorat darslarini oʻtkazadilar.

Taʼlim tizimida amalga oshirilayotgan bu kabi ishlar yosh avlodning xorijiy tillarini mukammal oʻrganishlari bilan birga xorijiy tillar oʻqituvchilarining kasbiy mahoratini oshirish, rivojlangan davlatlarning taʼlim tizimiga oid innovatsion gʻoyalarini samarali oʻzlashtirish va amaliyotga keng joriy etish imkonini beradi.

ROBIYa YOʻLDOShEVA.