IZLANISh VA OʻRGANISh – KAMOLOTGA YeTAKLAYDI
16-sonli ixtisoslashgan davlat umumtaʼlim maktabining rus tili fani oʻqituvchisi Nodirjon Tojimovni kasbdoshlari intiluvchan, yosh avlodga taʼlim-tarbiya berishda yangiliklardan, ilgʻor tajribalardan foydalanishga harakat qiladigan tinib-tinchimas pedagog sifatida eʼtirof etishadi.
Faoliyatini 2017-yilda rus tili oʻqituvchisi sifatida boshlagan Nodirjon dars oʻtish jarayonlarida koʻproq yangi uslublardan foydalanishga harakat qildi. Ayniqsa, yosh oʻqituvchi faoliyatining ikkinchi yili quvonchli voqealarga boy yil boʻldi.
2018-yilning noyabr oyida Qoraqalpogʻiston miqyosida fan oyligi doirasida rus tili fani oʻqituvchilari oʻrtasida oʻtkazilgan tanlovda Nodirjonning “Rus tili va adabiyotini oʻrganishda loyihaviy izlanish faoliyati” mavzusida yozgan ilmiy maqolasi eng yaxshi ilmiy maqola deb topildi va unga Qoraqalpogʻiston Respublikasi Xalq taʼlimi Vazirligining “Faxriy yorligʻi” berildi.
Shundan keyin Nodirjon Tojimov 2018-yilning dekabr oyida Rossiya Federatsiyasi tomonidan tashkil etilgan “Oʻzbekistonda rus tili: yangi ufqlar” tanlovida ham faol ishtirok etdi. U tanlovning 2019-yil aprel oyida oʻtkazilgan birinchi bosqichida gʻoliblikni qoʻlga kiritib, diplom bilan taqdirlandi. Tanlovning iyun oyida oʻtkazilgan ikkinchi bosqichida esa Nodirjon yana gʻoliblikni qoʻlga kiritib “Yilning eng yaxshi rus tili oʻqituvchisi” boʻldi. Shu tanlovning ikkinchi bosqichida ham gʻolib boʻlganligi sababli unga 15-20-iyul kunlari Moskva shahriga sayohatga borish nasib qildi.
Nodirjon Tojimov oʻquvchilarni rus tiliga qiziqtirishda zamonaviy axborot-kommunikatsiya texnologiyalari va dasturlardan, koʻrgazmali qurollar hamda audio, video materiallardan keng foydalanmoqda.
Ishchan pedagog 2019-2020 oʻquv yilidan oʻquv ishlari boʻyicha direktor oʻrinbosari lavozimiga tayinlangach, uning ish koʻlami va taʼlim sifati va samaradorligini oshirishdagi masʼuliyati yanada oshdi.
Ayni kunda N.Tojimov maktabda muhtaram Prezidentimiz Sh.Mirziyoyev tomonidan ilgari surilgan 5 ta tashabbus doirasida bir qancha ishlarni amalga oshirishga harakat qilayapti. Jumladan, maktab oʻquvchilarini darsdan boʻsh paytlarida maktab qoshida joylashgan 9-sonli bolalar musiqa va sanʼat maktabida turli yoʻnalishlar boʻyicha taʼlim olishga jalb qilmoqda.
Maktabning oʻzida stol tennisi, shaxmat, shashka boʻyicha va kompyuter hamda internetdan foydalanish savodxonligini oshirish boʻyicha toʻgaraklar tashkil etildi. Shuningdek, maktabda yoshlar maʼnaviyatini yuksaltirish uchun kitobxonlikni keng targʻib qilish maqsadida ham turli tanlovlar tashkil etilmoqda.
– Hozirgi zamon oʻqituvchisi oʻz faoliyatini eskicha, qotib qolgan uslubda emas, balki, yangi pedtexnologiyalarga suyangan holda tashkil etishi lozim, – deydi Nodirjon Tojimov. – Buning uchun esa tinmay izlanish va ilgʻor tajribalarni oʻrganish kerak boʻladi. Bu – davr talabi.
Biz bir qancha tanlovlar gʻolibi, oʻquvchilarga dars oʻtishda zamonaviy uslublardan foydalanish tashabuskori Nodirjon Tojimovni 1-oktyabr – Oʻqituvchi va murabbiylar kuni bayrami bilan muborakbod etib, uning kelgusidagi ishlarida zafarlar tilaymiz.
A.JUMANIYoZOV.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
