Tumanda ijtimoiy himoyaga muhtoj 7 ta oila Kasaba uyushmalari Federatsiyasi koʻmagida uy-joyga ega boʻldi
Mehr-oqibat xalqimizga xos ezgu fazilat. Ayniqsa, oʻzgalar koʻmagiga zarurati bor insonlardan el-yurt aslo mehrini darigʻ tutmaydi. Imkon boricha yordam qoʻlini choʻzib, qoʻllab-quvvatlashga harakat qiladi.
Bunday ezgu amallar insonlar oʻrtasida mehr-oqibat rishtalarini mustahkamlashga xizmat qiluvchi qadim qadriyatlar sifatida davom etib kelmoqda. Mamlakatimizda aholining ijtimoiy himoyaga muhtoj qatlamlarini moddiy va maʼnaviy qoʻllab-quvvatlash hamda jamiyatda insonlarni oʻzaro hamjihatlik, mehr-oqibat, bagʻrikenglik va xayr-saxovatga undash borasida amalga oshirilayotgan xayrli ishlarda Oʻzbekiston kasaba uyushmalari Federatsiyasining ham faol ishtiroki taʼminlanmoqda.
Prezidentimizning 2017-yildagi "Aholining kam taʼminlangan qatlamlarini qoʻllab-quvvatlashga oid qoʻshimcha chora-tadbirlari toʻgʻrisida»gi 3268-sonli Qarori ijrosi yuzasidan respublikamizning barcha hududlari, tumanlarida kam taʼminlangan oilalarning ijtimoiy-maishiy ahvoli oʻrganildi hamda uy-joyga muhtoj oilalar aniqlandi. Mazkur toifadagi oilalar roʻyxati mahalliy hokimliklar, Qoraqalpogʻiston Respublikasi Joʻqorgʻi Kengashi tomonidan tasdiqlandi va 2017-2018-yillarda aholining kam taʼminlangan toifalariga begʻaraz yordam koʻrsatish boʻyicha hududiy manzilli dastur ishlab chiqildi.
Tuman hududida ham dasturga koʻra aholining ijtimoiy himoyaga muhtoj qatlamlarining yashash, maishiy sharoitlari hamda boquvchisini yoʻqotgan, nogironligi boʻlgan shaxslar va ularni parvarishlayotgan ehtiyojmand oilalarning ahvoli mahallalar kesimida uyma-uy yurilib, oʻrganib chiqildi. Shu asosda oʻtgan yillar davomida kam taʼminlangan 35 ta oilaning uylarini taʼmirlashga koʻmaklashildi, muhtojligi boʻlgan 111 ta oila esa maishiy texnika buyumlari bilan taʼminlandi. Tibbiy yordam zarur boʻlgan 6 nafar ehtiyojmandga 4 mln. soʻmlik dori-darmonlar olishiga yordamlashildi.
Mazkur yilda esa dasturga muvofiq, tumanda oʻrganishlar natijasida aniqlangan kam taʼminlangan, nogironligi boʻlgan va muhtoj oilalarni uy-joy bilan taʼminlash ishlari rejalashtirilgan edi. Oʻzbekiston kasaba uyushmalari Federatsiyasi tomonidan ajratilgan 609,9 mln. mablagʻ evaziga ana shunday 7 ta oila uy-joy bilan taʼminlandi.
Nogironligi sababdan uy qurishga imkoni boʻlmayotgan Doʻrman ovulida yashovchi 2-guruh nogironi Rajabboy Abdullayevga Boʻzsolma mahallasidan uy sotib olib berildi. Ijtimoiy himoyaga muhtoj boʻlgan Boʻston mahallasida yashovchi Mehribon Begmonova Oybek nomli mahalladan hamda Navoiy nomli mahallada yashovchi Olimboy Sobirov Yangiobod mahallasidan sotib olingan uylarga oʻz oilalari bilan koʻchib oʻtishdi.
Oʻz uyi boʻlmaganligidan Gulzor mahallasida ijarada yashab kelgan Zaynab Jumatova Beruniy nomli mahalladan, Doʻstlik mahallasida ijarada yashab kelgan Umida Matniyozova “Qilichboy” koʻchasidan, Farovon mahallasida ijarada yashab kelgan Xurshida Xudoyberganova “Qilichboy” koʻchasidan, Boyovul mahallasida ijarada yashab kelgan Qanigul Begmonova esa “Jumurtau” koʻchasidan sotib olingan uy-joylarga ega boʻlishdi.
Hozirgi kunda barcha oilalar yangi sotib olib berilgan uylarda yashashmoqda. Oʻzlariga koʻrsatilgan bunday gʻamxoʻrliklardan cheksiz mamnun boʻlib, yangidan hayot boshlashdi.
Prezidentimiz tashabbuslari bilan mamlakat miqyosida aholining ijtimoiy himoyaga muhtoj qatlamlariga qaratilayotgan yuksak eʼtibordan chekka hududlarda istiqomat qilayotgan oilalar bahramand boʻlmoqdalar. Tumandagi Kasaba uyushmalari ham mazkur jarayonda faol ishtirok etmoqda va berilayotgan amaliy yordamlarning qishloq va ovullardagi ehtiyojmand oilalarga manzilli yetkazilishini taʼminlamoqda. Davlatimiz rahbari taʼkidlaganlaridek, bu aholi qatlamining ertaga emas, bugun yaxshi yashashni taʼminlash, ijtimoiy-maishiy turmush sharoitlari sifatini oshirish borasida arzirli ishlar amalga oshirmoqda.
Alohida taʼkidlash zarurki, aholi oʻrtasida kam taʼminlanganlik darajasini kamaytirish, xalqimiz turmushi farovonligini oshirish maqsadida yoʻlga qoʻyilgan bunday ezgu ishlardan tumanimizning chekka hududlarida yashayotgan ijtimoiy koʻmakka muhtoj insonlarning koʻngillari togʻdek koʻtarilmoqda va davlatimiz eʼtiborida ekanligini chuqur his etishmoqda.
U.Abdurahmonov,
Taʼlim, fan va madaniyat xodimlari
kasaba uyushmasi tuman Kengashi raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
