Doʻrman ovulida Qoraqalpogʻiston Respublikasi prokurori ishtirokida sayyor qabul oʻtkazildi

Mamlakatimizda davlat organlari va mansabdor shaxslarning xalq bilan muntazam aloqasini yoʻlga qoʻyish, aholi bilan muloqot qilib, dardu tashvishlarini tinglash va muammolariga yechim topish, bir soʻz bilan aytganda, odamlarni rozi qilish davlat siyosatining eng ustuvor yoʻnalishlaridan biriga aylangan.

"Inson manfaatlari hamma narsadan ustun" degan ezgu tamoyil asosida joylarda uchrashuvlar, ochiq muloqotlar va sayyor qabullar oʻtkazilib, ularda aholi turmush farovonligini oshirish, muammolarni aniqlash va hal qilish, hududlarni ijtimoiy-iqtisodiy rivojlantirish masalalariga alohida eʼtibor qaratilmoqda. 28-mart kuni Amudaryo tumanining Doʻrman ovulida Qoraqalpogʻiston Respublikasi Prokurori Xidir Karimov raisligida oʻtkazilgan sayyor qabul ham mana shu tamoyilning hayotiy ifodasi boʻldi.

Sayyor qabulda Qoraqalpogʻiston Respublikasi prokuraturasi, vazirliklar va davlat idoralari, tuman hokimligi hamda tumandagi davlat va jamoat muassasalari va tashkilotlarining mutasaddilari ishtirok etdi.

Yigʻilishni tuman hokimi Sultonboy Yoʻldoshev ochdi va olib bordi.

Tumanimizning Qilichboy, Xolimbeg va Doʻrman ovullari va ular tarkibidagi mahallalar aholisi ishtirokida oʻtkazilgan sayyor qabul davomida 20 dan ortiq murojaatlar koʻrib chiqildi. Murojaatlarning aksariyati fuqarolik olish, mahalliy va ichki xoʻjalik yoʻllarini taʼmirlash, suyultirilgan gaz va ichimlik suvi taʼminoti, bolalarni maktabgacha taʼlim muassasalariga qamrab olish darajasini oshirish kabi masalalarda boʻldi.

Qilichboy ovulining Xizr eli mahallasida yashovchi Sanobar Mirjanova 1992-yilda Turkmaniston Respublikasidan Oʻzbekistonga koʻchib oʻtgan. Shundan buyon turli sabablarga koʻra pasport olmagan edi. Shu sababli turmush oʻrtogʻi Adilboy Oqboyev bilan nikohini qonuniy qayd qildirish imkoni boʻlmagan, natijada farzandlariga ham tugʻilganlik haqidagi guvohnoma olishning iloji boʻlmay kelayotgan edi.

Sanobar Mirjanova bu masalada yordam koʻrsatishni soʻrab, tegishli idoralarga murojaat qildi. Tuman Ichki ishlar boʻlimi hamda fuqarolik holati dalolatnomalarini yozish boʻlimi xodimlarining yordami bilan qisqa muddatda barcha hujjatlar taxt qilinib, Sanobar Mirjanovaga fuqaroligi boʻlmagan shaxs guvohnomasi, er-xotinga nikohi qayd qilingani haqida guvohnoma va farzandlariga tugʻilganlik haqidagi guvohnomalar rasmiylashtirildi va sayyor qabul davomida tantanali ravishda topshirildi.

Sayyor qabulda kelib tushgan murojaatlarni oʻrganib chiqish va hal qilish boʻyicha tegishli soha mutasaddilariga topshiriqlar berildi. Topshiriqlar ijrosi Qoraqalpogʻiston Respublikasi prokuraturasi tomonidan nazoratga olinishi belgilab qoʻyildi.

Shuningdek, shu kuni Doʻrman ovulining Boʻz solma mahallasida yashovchi Gulsara Allamovaga tuman tibbiyot birlashmasi tomonidan nogironlik aravachasi topshirildi.

Gʻ.Yeshniyozov