Istiqbolga intilgan yoshlar

KELAJAK SARI DADIL QADAMLAR

Inson hayotida shunday kunlar boʻladiki, maʼno-mazmuni butun hayotingga tatiydi, kelgusi ishlaringga qanot bagʻishlaydi, oʻz-oʻziga ishonchi ortadi odamning.

Mangʻit shahridagi 40-sonli maktabda ish boshlaganiga ikki yil toʻlib-toʻlmay, “Yilning eng yaxshi fan oʻqituvchisi – 2018” koʻrik- tanlovining quyi bosqichlarida gʻolib chiqib, Taxiatosh shahrida boʻlib oʻtgan Qoraqalpogʻiston Respublikasi bosqichida faxrli 2-oʻrinni egallagan Sherzod Ashirov uchun tanlovda qatnashgan kuni ana shunday – unutilmas, oydin orzulari sari ilhomlantiruvchi kun boʻlib qoldi.

Aslida murakkab fan – matematikadan oʻttiz, undan ham ortiq yillar dars berib, mehnatda suyagi qotgan tajribali, quyi bosqichlar gʻolibi boʻlgan 14 nafar oʻqituvchilar bilan sohada yangi kadr boʻlgan Sherzodning bellashishining oʻzi bir jasorat edi.

Dastlabki sinov boshlandi. Bu bosqichda oʻqituvchilar bir yarim soat davomida elektron dars-ishlanma tayyorlashi kerak edi. Qurʼa tashlash asosida mavzu tanlanib, barcha ishga kirishib ketdi.

Bu shartda Sherzod geometriya fanidan zamonaviy metodlarni qoʻllagan holda dars ishlanmasi tayyorladi. U 11 ball toʻplashga erishib, 1-shart natijasiga koʻra 6-oʻrinni egalladi.

Ikkinchi shartda 10 daqiqalik maʼruza tayyorlash va uni barcha ishtirokchilar, hakamlar hayʼati uchun taqdimot oʻtkazish topshirigʻi 20 ballik tizimda baholandi.

Sherzod ikkinchi shartda oʻzligini, nimalarga qodir ekanligini yanada yorqinroq namoyon eta oldi, maʼruzasini tugatgan vaqtida nafaqat raqiblari, hakamlar ham qarsak chalib yuborishdi. Bu shartni ijro etishi uni ikkinchi oʻringa koʻtardi.

Ishtirokchilar soni har shartga oʻtishda kamayib borardi. Uchinchi shart, ayniqsa, hayajonli boʻldi. Topshiriqqa koʻra, u shahardagi 21-sonli maktabda 8-sinf oʻquvchilariga geometriya fanidan ilgʻor va zamonaviy uslublardan, axborot-kommunikatsiya texnologiyalaridan foydalangan holda dars oʻtdi. Darsi jarayonida kunlik mavzuni tushuntirgach, savol-javoblar uslubini qoʻlladi. Oʻquvchilar darsga juda berilib ketishdi. Oʻrtada xuddi har kuni taʼlim berib kelayotgan oʻzlarining ustozi kabi iliq munosabat yuzaga keldi, savollarga javob berishda hech tortinib turishmadi. Shu daqiqalarda u oʻqituvchilik kasbini tanlab adashmaganiga qattiq iqror boʻldi, butun borligʻi bilan bolalarga oʻz fanini yanada chuqurroq oʻrgatishga ahd qildi.

Shunday qilib, oxirgi – 4 shartda kasbiga doir test savollariga ham yaxshi javob berib, Sherzod Ashirov “Yilning eng yaxshi fan oʻqituvchisi – 2018” tanlovida matematika fanidan ikkinchi oʻrin sohibi boʻldi. Bu oʻqituvchilik sohasiga endigina kirib kelgan, koʻrinishidan yuqori sinf oʻquvchilaridan deyarli farq qilmaydigan yosh iqtidor egasi uchun katta yutuq edi.

– Bu muvaffaqiyatim zamirida 16-sonli maktabda matematika oʻqituvchisi boʻlib ishlagan, momom Klara Hamroyevaning ulkan mehnatlari bor. Momom vaqtimni behuda oʻtkazishimga yoʻl qoʻymasdi. Matematikaga oid darslikdan tashqari koʻp kitoblar olib berar, birgalikda misol, masalalar yechardik. Oʻqituvchiga oʻz bilimlarini yoshlarga chuqur oʻrgata olishi uchun mahorat ham kerak, deb uqtirardilar. Xullas, 16-sonli maktabning 9-sinfini tugatgan vaqtimda matematika fani oʻqituvchisi boʻlishga aniq qaror qilgandim, – deydi Sherzod.

Ha, uning orzusi qatʼiy edi. Shuning uchun ham maktabni tugatgach, 3-sonli Amudaryo akademik litseyining aniq fanlar yoʻnalishiga oʻqishga kirib, 2012-yilda imtiyozli diplom bilan tugatdi va shu yili Qoraqalpoq Davlat Universitetiga oʻqishga kirdi.

Sherzod Ashirov oʻqituvchilik faoliyatini 2016-yilda dastlab oʻzi taʼlim olgan 16-sonli maktabda boshladi. Keyinchalik 40-sonli maktabda dars bera boshladi.

Uning oʻz fanini qanchalik mukammal egallaganligi va oʻquvchilarga oʻrgata olish mahorati koʻp oʻtmayoq namoyon boʻla boshladi. Xususan, u 2016-yil noyabrdan trener oʻqituvchi sifatida tuman maktablarining matematika fani oʻqituvchilariga dars berayapti, 2017-yilda oʻquvchisi Shohruh Yoʻldoshev matematika fanidan Bilimlar bellashuvida tumanda birinchi oʻrinni egalladi. 2018-yilda uch nafar oʻquvchisi Innovatsion olimpiadada ishtirok etib, 2 nafari Qoraqalpogʻiston Respublika bosqichida qatnashishdi. Bundan tashqari, “Kelajak” nodavlat oʻquv markazidagi Sherzod repititorlik qilgan guruhdan 20 nafar oʻquvchisining 16 nafari turli oliygohlarga oʻqishga kirib, talaba boʻlishdi.

– Ilm – misoli ummon. Men hali ustozlarim tajribalarini koʻp oʻrganishim lozim, deb hisoblayman. – deydi Sherzod oʻzi haqida.

Sherzod Ashirov bu yutuqlari bilan chegaralanib qolmay, oliy taʼlimning magistratura bosqichida oʻqish, hali oʻz bilimlarini yana ham oshirish niyatida.

Shunday iqtidorli, intiluvchan va fidoyi oʻgʻlonlar borligi yurtimizning kelajagi bundanda obod va farovon, goʻzal boʻlishiga ishonch uygʻotadi koʻnglimizda.

Oygul RAJABOVA.