Истиқболга интилган ёшлар

КЕЛАЖАК САРИ ДАДИЛ ҚАДАМЛАР

Инсон ҳаётида шундай кунлар бўладики, маъно-мазмуни бутун ҳаётингга татийди, келгуси ишларингга қанот бағишлайди, ўз-ўзига ишончи ортади одамнинг.

Манғит шаҳридаги 40-сонли мактабда иш бошлаганига икки йил тўлиб-тўлмай, “Йилнинг энг яхши фан ўқитувчиси – 2018” кўрик- танловининг қуйи босқичларида ғолиб чиқиб, Тахиатош шаҳрида бўлиб ўтган Қорақалпоғистон Республикаси босқичида фахрли 2-ўринни эгаллаган Шерзод Аширов учун танловда қатнашган куни ана шундай – унутилмас, ойдин орзулари сари илҳомлантирувчи кун бўлиб қолди.

Аслида мураккаб фан – математикадан ўттиз, ундан ҳам ортиқ йиллар дарс бериб, меҳнатда суяги қотган тажрибали, қуйи босқичлар ғолиби бўлган 14 нафар ўқитувчилар билан соҳада янги кадр бўлган Шерзоднинг беллашишининг ўзи бир жасорат эди.

Дастлабки синов бошланди. Бу босқичда ўқитувчилар бир ярим соат давомида электрон дарс-ишланма тайёрлаши керак эди. Қуръа ташлаш асосида мавзу танланиб, барча ишга киришиб кетди.

Бу шартда Шерзод геометрия фанидан замонавий методларни қўллаган ҳолда дарс ишланмаси тайёрлади. У 11 балл тўплашга эришиб, 1-шарт натижасига кўра 6-ўринни эгаллади.

Иккинчи шартда 10 дақиқалик маъруза тайёрлаш ва уни барча иштирокчилар, ҳакамлар ҳайъати учун тақдимот ўтказиш топшириғи 20 баллик тизимда баҳоланди.

Шерзод иккинчи шартда ўзлигини, нималарга қодир эканлигини янада ёрқинроқ намоён эта олди, маърузасини тугатган вақтида нафақат рақиблари, ҳакамлар ҳам қарсак чалиб юборишди. Бу шартни ижро этиши уни иккинчи ўринга кўтарди.

Иштирокчилар сони ҳар шартга ўтишда камайиб борарди. Учинчи шарт, айниқса, ҳаяжонли бўлди. Топшириққа кўра, у шаҳардаги 21-сонли мактабда 8-синф ўқувчиларига геометрия фанидан илғор ва замонавий услублардан, ахборот-коммуникация технологияларидан фойдаланган ҳолда дарс ўтди. Дарси жараёнида кунлик мавзуни тушунтиргач, савол-жавоблар услубини қўллади. Ўқувчилар дарсга жуда берилиб кетишди. Ўртада худди ҳар куни таълим бериб келаётган ўзларининг устози каби илиқ муносабат юзага келди, саволларга жавоб беришда ҳеч тортиниб туришмади. Шу дақиқаларда у ўқитувчилик касбини танлаб адашмаганига қаттиқ иқрор бўлди, бутун борлиғи билан болаларга ўз фанини янада чуқурроқ ўргатишга аҳд қилди.

Шундай қилиб, охирги – 4 шартда касбига доир тест саволларига ҳам яхши жавоб бериб, Шерзод Аширов “Йилнинг энг яхши фан ўқитувчиси – 2018” танловида математика фанидан иккинчи ўрин соҳиби бўлди. Бу ўқитувчилик соҳасига эндигина кириб келган, кўринишидан юқори синф ўқувчиларидан деярли фарқ қилмайдиган ёш иқтидор эгаси учун катта ютуқ эди.

– Бу муваффақиятим замирида 16-сонли мактабда математика ўқитувчиси бўлиб ишлаган, момом Клара Ҳамроеванинг улкан меҳнатлари бор. Момом вақтимни беҳуда ўтказишимга йўл қўймасди. Математикага оид дарсликдан ташқари кўп китоблар олиб берар, биргаликда мисол, масалалар ечардик. Ўқитувчига ўз билимларини ёшларга чуқур ўргата олиши учун маҳорат ҳам керак, деб уқтирардилар. Хуллас, 16-сонли мактабнинг 9-синфини тугатган вақтимда математика фани ўқитувчиси бўлишга аниқ қарор қилгандим, – дейди Шерзод.

Ҳа, унинг орзуси қатъий эди. Шунинг учун ҳам мактабни тугатгач, 3-сонли Амударё академик лицейининг аниқ фанлар йўналишига ўқишга кириб, 2012 йилда имтиёзли диплом билан тугатди ва шу йили Қорақалпоқ Давлат Университетига ўқишга кирди.

Шерзод Аширов ўқитувчилик фаолиятини 2016 йилда дастлаб ўзи таълим олган 16-сонли мактабда бошлади. Кейинчалик 40-сонли мактабда дарс бера бошлади.

Унинг ўз фанини қанчалик мукаммал эгаллаганлиги ва ўқувчиларга ўргата олиш маҳорати кўп ўтмаёқ намоён бўла бошлади. Хусусан, у 2016 йил ноябрдан тренер ўқитувчи сифатида туман мактабларининг математика фани ўқитувчиларига дарс бераяпти, 2017 йилда ўқувчиси Шоҳруҳ Йўлдошев математика фанидан Билимлар беллашувида туманда биринчи ўринни эгаллади. 2018 йилда уч нафар ўқувчиси Инновацион олимпиадада иштирок этиб, 2 нафари Қорақалпоғистон Республика босқичида қатнашишди. Бундан ташқари, “Келажак” нодавлат ўқув марказидаги Шерзод репититорлик қилган гуруҳдан 20 нафар ўқувчисининг 16 нафари турли олийгоҳларга ўқишга кириб, талаба бўлишди.

– Илм – мисоли уммон. Мен ҳали устозларим тажрибаларини кўп ўрганишим лозим, деб ҳисоблайман. – дейди Шерзод ўзи ҳақида.

Шерзод Аширов бу ютуқлари билан чегараланиб қолмай, олий таълимнинг магистратура босқичида ўқиш, ҳали ўз билимларини яна ҳам ошириш ниятида.

Шундай иқтидорли, интилувчан ва фидойи ўғлонлар борлиги юртимизнинг келажаги бунданда обод ва фаровон, гўзал бўлишига ишонч уйғотади кўнглимизда.

Ойгул РАЖАБОВА.