Konstitutsiya va vijdon erkinligi
Mamlakatimiz Bosh Qomusi – Konstitutsiya qabul qilinganligiga 26-yil toʻldi. Koʻp millatli mamlakatimiz fuqarolarining huquq va majburiyatlarini, imtiyozlari-yu, burchlarini taʼminlovchi bosh omil bu – Konstitutsiyadir. Konstitutsiya davlatimiz mustaqilligining ulkan ramzi boʻlib, unda oʻz istiqlol va taraqqiyot yoʻlimiz aks etgan. Konstitutsiyamizda inson hayoti, uning shaʼni, qadr-qimmati, haq-huquqlari, manfaatlari oliy qadriyat sifatida mustahkamlab qoʻyilgan va bosh maqsadimiz – faqat huquqiy demokratik davlat emas, balki adolatli jamiyat qurish ekani aniq-ravshan belgilab berilgan.
Oʻzbekiston davlatining dunyoviylik, diniy bagʻrikenglik, barcha dinlarga bir xilda munosabatlari ushbu tamoyil asosida amalga oshiriladi.
Qomusimizda barcha millat vakillari uchun teng fuqarolik huquqi mustahkamlab qoʻyilgan. Dinga eʼtiqod qiluvchi fuqarolar ham jamiyatning tarkibiy qismi va shu sababli din fuqarolik jamiyatida oʻz mavqeiga ega.
Konstitutsiyamizdagi normalar dunyodagi rivojlangan mamlakatlardagi huquqiy-meʼyoriy talablarga toʻla javob beradi. Har qanday dinga eʼtiqod qiluvchi va hech qanday dinga eʼtiqod qilmaydigan kishilar uchun bir xildagi shartlar qoʻyilishini taʼminlovchi Oʻzbekiston Pespublikasi Konstitutsiyasining 31-moddasida, jumladan, shunday deyiladi: “Hamma uchun vijdon erkinligi kafolatlanadi. Har bir inson xohlagan dinga eʼtiqod qilish yoki hech qaysi dinga eʼtiqod qilmaslik huquqiga ega. Diniy qarashlarni majburan singdirishga yoʻl qoʻyilmaydi”.
Bagʻrikenglik tamoyili Konstitutsiyamizning barcha moddalarida oʻz aksini topgan, desak xato boʻlmaydi. Oʻzbekiston hududida yashovchi har bir fuqaroning manfaatlari, haq-huquq va burchlari Qonunimiz doirasida aniqlanib, belgilab qoʻyilgan. Har kim oʻz eʼtiqodiga amal qilishda erkin boʻlgani holda bu huquqqa boshqalar ham ega ekanligini eʼtirof etmoq lozim.
Oʻzbekiston Pespublikasi Konstitutsiyasi qadr-qimmatini hech narsa bilan oʻlchab va tenglashtirib boʻlmaydi. Chunki unda mustahkamlangan qoidalarda va ifodalangan gʻoyalar zamirida xalqning, millatning huquq va erkinliklari mujassam. Uni aziz deb bilib, Konstitutsiyadagi qoidalar asosida yashash bizning kelgusi hayotimiz farovon boʻlishining asosidir. Asosiy Qonunimizning hayotimizdagi oʻrni va ahamiyatini keng targʻib etish, yosh avlodni qonunlarimizga hurmat, Vatanga mehr va sadoqat ruhida tarbiyalash ishlariga munosib hissa qoʻshishimiz lozim.
Oʻktam QUPBONIYoZOV, “Noʻgʻoy eshon”
jomeʼ masjidi imom-xatibi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
