Konstitutsiya bayrami arafasida Amudaryoda yangi binolar foydalanishga topshirildi

Oʻzbekiston Respublikasi Konstitutsiyasi qabul qilinganining 33-yilligi Amudaryo tumani hayotida nafaqat bayram, balki taraqqiyot va yangilanish ruhi bilan yodda qoldi. Bayram arafasida tumanda bir qator muhim ijtimoiy obʼektlarning foydalanishga topshirilgani xalqimiz farovonligi yoʻlida olib borilayotgan izchil islohotlarning amaliy natijasini yaqqol namoyon etdi.

Xususan, Doʻstlik mahallasida zamonaviy talablar asosida yangidan qurilgan 58-sonli maktabgacha taʼlim tashkiloti foydalanishga topshirildi. Marosimda tuman hokimi oʻrinbosari Nodirbek Kamolov, tuman prokurori Bahram Masharipov, tuman Maktabgacha va maktab taʼlimi boʻlimi boshligʻi Yalgʻash Shomuratovlar soʻzga chiqib, bu bunyodkorlik ishlari mamlakatimizda taʼlim-tarbiya sohasiga berilayotgan yuksak eʼtiborning yorqin isboti ekanini taʼkidladilar.

Darhaqiqat, muhtaram Prezidentimizning tegishli qarori asosida joriy yilda Amudaryo tumanida 4 ta maktabgacha taʼlim muassasasini qurish va rekonstruktsiya qilish uchun 24 milliard 902 million soʻm mablagʻ ajratildi. Ana shu ezgu dastur doirasida “Xiva Qurilish Kompleks” MChJ tomonidan qiymati 8 milliard 600 million soʻm boʻlgan, 240-oʻrinli ikkita qavatli bino bunyod etilib, bayram arafasida foydalanishga topshirildi.

Bu nafaqat yangi bogʻcha — balki kelajagimiz egalari uchun bilim, tarbiya va mehr maskanidir. Zamonaviy oʻquv xonalari, oʻyin maydonchalari, sport va rivojlantiruvchi mashgʻulotlar uchun moʻljallangan xonalar — barchasi bolalarning har tomonlama kamol topishi uchun xizmat qiladi.

Bayram arafasida yana bir muhim obʼekt — Oq oltin ovulida yangidan qurilgan Madaniyat markazi binosi ham foydalanishga topshirildi. Mazkur maskan ovul ahlining maʼnaviy hayotida yangi sahifa ochadi.

Markazning ochilish marosimida tuman hokimi oʻrinbosari Bahodir Ernazarov, tuman prokurori Bahram Masharipov, tuman Madaniyat boʻlimi boshligʻi Murod Ibragimov, shuningdek, qurilish tashkiloti masʼullari soʻzga chiqib, ushbu bunyodkorlikning tumanning maʼnaviy yuksalishiga qoʻshadigan hissasi haqida soʻz yuritdilar.

Prezidentimizning 2024-yil 24-dekabr kungi “2025-2027-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi qarori asosida barpo etilgan mazkur maskan “MANGʻIT INVEST MAKSIMUM” MChJ tomonidan qurilib, 2 milliard 700 million soʻm mablagʻ sarflandi.

Madaniyat markazlari – xalqning oʻzligini anglash, maʼnaviyatni boyitish va yoshlarni toʻgʻri yoʻlga boshlash maktabidir. Ayniqsa, yoshlar uchun toʻgaraklar, ijodiy studiyalar, kutubxona va sahna zallari ushbu maskanni hududning madaniy markaziga aylantirishi shubhasiz.

Tumanimizda amalga oshirilayotgan bu kabi yirik loyihalar Oʻzbekiston Respublikasining Bosh Qomusi — Konstitutsiyamizda belgilangan eng muhim tamoyillar: inson qadri, farovon hayot, bilimli avlod va kuchli ijtimoiy infratuzilma kabi maqsadlarning real ifodasi, Konstitutsiyamizda belgilangan ijtimoiy davlat kontseptsiyasining amaliy ijrosidir. Bolalar bogʻchalari, madaniyat markazlari, taʼlim va sogʻliqni saqlash tizimidagi islohotlar — bularning barchasi fuqarolarimizning munosib turmushiga qaratilgan uzoq muddatli strategiyaning barqaror amaliy davomidir.

Marosimlarda soʻzga chiqqanlar barcha quruvchilar, muhandislar, loyiha mutaxassislari, homiylar hamda tashabbuskor fuqarolarning mehnati yuqori baholanishini alohida taʼkidladilar. Zero, bunday ulkan loyihalar faqat hamjihatlik va maqsad sari birgalikda intilish orqali roʻyobga chiqadi.

Charos Arslonova, tuman hokimligining Axborot xizmati rahbari.