YaXShILAR YoDI ZAVOL BILMAYDI

Yaxshi insonlarning umri tugamaydi, balki qalblarga, xotiralarga koʻchadi. Butun umrini xalq xizmatiga, sanʼatga baxshida etgan betakror sozanda, zarb usullari ustasi, jonkuyar ustoz Rajabboy Bobojonovning hayoti bunga misol boʻla oladi.

U umr boʻyi Respublikamizdan tashqari Xorazm viloyati, Turkmaniston Respublikasi sanʼat shinavandalarini oʻz sozi, yoqimli ovozi bilan bahramand etib yashadi, zarbli cholgʻularni eng nozik pardada, inson ruhiyatidagi mudroq tuygʻularni ham junbushga keltira oladigan darajada chalib, bu borada oʻziga xos maktab yaratgan inson.

Ustoz sanʼatkor Mangʻit shahrining hozirgi Navoiy mahallasida 1927-yilda dunyoga kelgan. Oʻrta maktabni tugatgach, avval haydovchilik qilgan, sanʼat sohasidagi faoliyati 1965-yildan boshlangan. Dastlab, Madaniyat uyida xodim, soʻng “Uchqun” ashula va raqs dastasi rahbari lavozimida ishlagan. Bozorgul Sherimbetova bilan turmush qurib, 9 nafar farzandni ilmli, kasb-hunarli qilishgan.

Ot izini toy bosar, deganlaridek, oʻgʻli Hamza Bobojonov ota kasbining davomchisi sifatida 9-sonli BMSMda musiqa oʻqituvchisi boʻlib ishlab, nafaqaga chiqdi. Nevarasi Oʻtkirbek Bobojonov esa ayni shu maktabda hozir yoshlarga sanʼat sirlarini oʻrgatmoqda.

Rajabboy Bobojonovning faoliyatini beqiyos isteʼdod sohibi, xalqimiz qalbida oʻz qoʻshiqlari bilan oʻchmas iz qoldirgan Nazir Rahimov va sozanda Usmon Ahmedov faoliyatidan ayro tasavvur etish qiyin. Ular uchovi goʻyo bir butun edi, charchashni, xizmatini minnat qilishni yo xizmatiga haq aytishni bilishmasdi.

Rajabboy Bobojonov “Uchqun” ashula va raqs dastasiga rahbarlik qilish barobarida, Nazir Rahimovning doirachisi, qoʻshiqlarini eng avj pardaga koʻtarishda joʻrovoz hamkori edi.

Oʻtgan asrning 70-yillarida Nazir Rahimov, Rajabboy Bobojonov, Usmon Ahmedovlarning tumanda oyogʻi tegmagan hudud yoʻq, degan gap yurardi. Chindan-da, bu hokisor insonlar chorlaganning toʻyida, kontsertlarda elga xizmat qilishdan charchamagan, shinavandalarining koʻnglini olishni oʻzlariga ulkan baxt deb bilishgan.

Yaqinda tuman Madaniyat boʻlimi tomoshalar zalida benazir ustoz sanʼatkor Rajabboy Bobojonovning xotira kechasi oʻtkazildi.

Avvalo shu oʻrinda tuman Madaniyat boʻlimi maʼmuriyatining soha rivojiga ulkan hissa qoʻshib, hayotda oʻzidan ulkan maʼnaviy saboq qoldirgan insonlarni xotirlab, ularning sobiq kasbdoshlari, oila aʼzolari, doʻstlari ishtirokida ana shunday tadbirlarni oʻtkazib kelayotgani eʼtiborga loyiq ekanligini aytish joiz. Bu sanʼat sohasini tanlagan yoshlar uchun sanʼatning, sanʼatkorning qadr-qimmatini chuqur anglashlari uchun ibrat desak, xato boʻlmas.

Rajabboy Bobojonovning hayoti va ijodiy faoliyatiga bagʻishlangan xotira kechasida farzandlari, soha xodimlaridan tashqari, tumanimizning jamoat tashkilotlaridan vakillar, sanʼatkorning kuy-qoʻshiqlarini hurmat-ehtirom bilan eslaydigan muxlislari, doʻstlari, shogirdlari ishtirok etdilar.

Ulkan anjuman tusini olgan xotira kechasida soʻz olgan ilk shogirdlaridan biri, Qoraqalpogʻistonda xizmat koʻrsatgan madaniyat xodimi Gulmirza Nurmatov Rajabboy Bobojonovning tumanimiz sanʼati rivojiga qoʻshgan hissasini, elga qilgan xizmatlarini soʻz bilan ifodalash qiyin, deb taʼkidladi.

- Bir voqeani aytay, kech kuzakda, tongda armiyadan keldim. Hademay xabar topib, Nazir aka Rahimov, Rajabboy aka Bobojonov, Usmon aka Ahmedovlar uyimizga kirib kelishdi. Ota-onamga “Koʻz oydin” aytib, ozgina oʻtirishdi-da, otamga qarab Rajabboy aka:

- Kuz oxirlayapti, hali tumanning paxta rejasi bajarilishiga ancha bor. Kolxozchilarga hormasinga ketayotgan edik, oʻgʻlingizni ham olib ketsak, - dedi. Otam bizni duo qilib qoldilar.

Shu kuni necha xoʻjaliklarda, dala boshida necha joyda kontsert qoʻydik, esimda yoʻq, esimda bori - qorongʻi tushib, yulduzlar charaqlab turgan vaqtda uyga qaytdik. Kelsam, meni koʻrgani kelgan qarindoshlarim, doʻstlarim tarqalishib boʻlishgan ekan. Men ana shunday hokisor ustozlar yetovida yurib, sohaga hissa qoʻshganimdan juda baxtiyor hisoblayman oʻzimni.

Tadbirda koʻngil qatlaridagi xotiralar tilga olindi. Shogirdlarning dil ehtiromi aks etgan qoʻshiqlari davraga oʻzgacha ruh bagʻishladi. Ayniqsa, Rajabboy Bobojonovning oʻgʻli, Hamza Bobojonovning ijrosidagi qoʻshiqlarni yigʻilganlar miriqib tingladilar.

Xotira! Koʻngillarimizga koʻchgan yaxshilar yodini ana shunday nom bilan ataymiz, eslaymiz, sogʻinamiz.

Ha, ibratli umr sohibi Rajabboy Bobojonov ham koʻngillarimizda barhayot.

Oygul RAJABOVA.