UNING NOMI XOTIRALARDA MANGU YaShAYDI

1992-yilning yozida boʻlib oʻtgan bir voqea hamon yodimda. Oʻsha kuni muharririmiz Xonimjon opa Rajabovaning taklifiga koʻra tahririyatimizga mustaqillik sharofati bilan haj ziyoratini ado etishga musharraf boʻlgan tumanimizning ilk hoji onasi, mehnat faxriysi Halima Matniyozova mehmon boʻldilar.

Muharrirning ulkan xonasida tahririyat va 4-bosmaxona mehnat jamoalari aʼzolari barchamiz onaxonning haj ziyorati taassurotlarini berilib tingladik, hoji onaga havasimizning cheki yoʻq edi. Chunki bunday imkoniyat, istiqlolning ilk yillaridagi iqtisodiy nochorliklar esingizdadir, koʻpchilik uchun orzu edi.

Suhbat tugagach, onaxon bizning ishimizga baraka, yurtga tinchlik-omonlik tilab xayrlashdilar, sizlarni ham farzandlaringiz ana shunday qutlugʻ safarga yuborgay, deb duo qildilar.

Onaxonni haj ibodatiga yoʻl olishga farzandlari undagan ekan-da, degan oʻy xayolimga keldi mening. Yana bir eʼtiborimni tortgani – hali tetik va harakatchan onaxonni tahririyatga oʻgʻli olib kelib, qoʻlidan tutib olib ketgani boʻldi. Koʻpchilikning koʻnglidan shu damlarda oʻgʻling shunday mehribon boʻlsa, degan oʻy oʻtgani shubhasiz.

Oʻsha oʻgʻil – tumanimiz rivojiga ulkan hissa qoʻshgan ajoyib inson, gazetamizning hamkorlaridan biri Muhammadsoliy Sodiqov edi.

U nafaqat oilasiga gʻamxoʻr, balki uzoq yillar turli masʼuliyatli lavozimlarda ishlab, tumanimiz hayotida ham munosib iz qoldirgan insondir.

Muhammadsoliy Sodiqov 1954-yilda tugʻildi. Oʻrta maktabni tugatgach, mahalliy sanoat kombinatida, Mangʻit paxta tozalash zavodida ishchi boʻlib ishladi. 1974-yilda Toshkent xalq xoʻjaligi institutiga oʻqishga kirdi va 1978-yilda tugatib, iqtisodchi mutaxassisligiga ega boʻldi.

1978-yildan boshlab, Aholiga maishiy xizmat koʻrsatish kombinati kassiri, bosh muhandisi, “Resbitximchistka” tuman shoxobchasi boshligʻi, “Shveytrikotaj” ishlab chiqarish korxonasi boshligʻi, tuman Matlubot jamiyati boshqaruvi raisi, “Amudaryo” asalarichilik xoʻjaligi boshqaruvi raisi, “Doʻstlik” xoʻjaligi tashqi boshqaruvchisi, “Doʻstlik” MMTP raisi, tuman Obodonlashtirish boshqarmasi boshligʻi vazifalarida samarali faoliyat olib bordi. Qaysi sohada, qanday lavozimda ishlamasin, mehnat jamoasi gʻamxoʻri, tuman matbuotining beminnat hamkori boʻldi.

Afsus, shunday ajoyib insonning umri qisqa ekan. U 55 yoshida 2009-yilda olamdan oʻtdi. Keyinchalik faxriy jurnalist, shoir Saʼdulla Xoʻjaniyozov u haqda:

Seni sanar edik qatorda nor, deb

Yordamga muhtojning yonida bor, deb...

– deya yozgani ham bejiz emas.

Ha, insonlar boʻladiki, vafotidan soʻng ham tirikligida qilgan ezgu amallari tilga olinaveradi, nomi tildan tushmaydi.

Muhammadsoliy Sodiqov ham taʼbir joiz boʻlsa, ana shundaylar sirasidan edi. U kishi bilan hamnafas boʻlgan, yaqindan tanigan borki, yaxshi soʻzlar bilan tilga oladi nomini.

U kishidan endi ana shunday xotiralar, ota diydoriga toʻymay qolgan, ishlarining davomchilari boʻlgan farzandlar qoldi.

Yurtimizda 9-may – Xotira va qadrlash kunini keng nishonlashga hozirlik koʻrilayotgan shu damlarda tumanimizning bir fidoyi oʻgʻloni Muhammadsoliy Sodiqovni eslab qoʻyishni oʻz burchimiz deb bildik.

Ha, yaxshilar nomi oʻchmaydi. Yillar osha xotiralarda bir ibrat boʻlib yashayveradi.

Oygul RAJABOVA.