Xalq deputatlari Amudaryo tuman Kengashining qirq ikkinchi sessiyasi toʻgʻrisida AXBOROT

2018-yil 8-yanvar kuni Xalq deputatlari Amudaryo tuman Kengashining qirq ikkinchi sessiyasi boʻlib oʻtdi.

Sessiyada tuman hokimi oʻrinbosarlari, hokimlik masʼul xodimlari, huquqni muhofaza qilish organlari, hokimlik boʻlimlari, jamoat tashkilotlari, fuqarolarning oʻzini oʻzi boshqarish organlari raislari hamda ommaviy axborot vositalari vakillari ishtirok etdi.

Sessiya kun tartibida “Amudaryo tumanidagi “Yangiobod” va “Daryoboʻyi” mahallalarini boʻlish, chegaralarini belgilash, yangidan tashkil qilinadigan mahalla va shaharchaga nom berish hamda “Bosuv” mahallasi, “Choykoʻl” va “Oʻrta qalʼa” ovullari chegaralariga oʻzgartishlar kiritish toʻgʻrisida”gi, “Amudaryo tumanidagi “Farovon”, “Doʻstlik”, Oybek mahallalaridagi ayrim koʻchalarga nom berish toʻgʻrisida”gi hamda “Xalq deputatlari Amudaryo tuman Kengashi va Kengash doimiy komissiyalarining 2018-yilga moʻljallangan ish rejalarini tasdiqlash toʻgʻrisida”gi masalalar muhokama qilindi.

Kun tartibidagi 1-masala yuzasidan tuman hokimi S.Yoʻldashev soʻzga chiqib, hozirgi kunda tumanda 1 ta shaharcha, 16 ta ovul, 30 ta mahalla fuqarolar yigʻinlari faoliyat koʻrsatib, ular tomonidan ijtimoiy-iqtisodiy sohada samarali jamoatchilik nazoratini taʼminlashda, aholi keng qatlamlarining huquq va qonuniy manfaatlarini himoya qilishda mahallaning roli oshib, oilaviy biznes va xususiy tadbirkorlikni rivojlantirish uchun qulay shart-sharoitlar yaratish, ijtimoiy dasturlarni amalga oshirishda fuqarolar yigʻinlarining hokimlik va boshqaruv organlari bilan hamkorligi kuchayib borayotganini taʼkidlab oʻtdi.

Amudaryo tumanidagi “Boʻz yop” ovuli, “Yangiobod” va “Daryoboʻyi” mahallalarini boʻlish, chegaralarini belgilash va yangidan tashkil qilinadigan ovul va mahallalarga nom berish hamda “Bosuv” mahallasi, “Choykoʻl” va “Oʻrta qalʼa” ovullari chegaralariga oʻzgartishlar kiritish boʻyicha fuqarolar yigʻinlarining iltimosnomalariga asosan Qoraqalpogʻiston Respublikasining “Fuqarolarning oʻzini oʻzi boshqarish organlari toʻgʻrisida”gi Qonunining         6-moddasi va Joʻqorgʻi Kenges Prezidiumining 2014-yil 14-martdagi 271-sonli qarori bilan tasdiqlangan “Shaharlar, posyolkalar va ovullarning mahallalarini tuzish, birlashtirish, boʻlish va tugatish, shuningdek ularning chegaralarini belgilash va oʻzgartirish, ularga nom berish va ularning nomini oʻzgartirish tartibi toʻgʻrisida”gi Nizom talablariga muvofiq tuman hokimining 2017-yil 29-maydagi 351-sonli qarori qabul qilinib, ularning iltimosnomalari maʼqullangan edi.

Yuqoridagi Nizomga asosan tuman hokimligi tomonidan barcha hujjatlar Qoraqalpogʻiston Respublikasi Vazirlar Kengashi Raisi huzuridagi geografik obʼektlarga nom berish va ularning nomlarini oʻzgartirish masalalari boʻyicha Respublika komissiyasiga hamda Qoraqalpogʻiston Respublikasi Joʻqorgʻi Kengesiga tegishli tartibda taqdim qilindi.  

Qoraqalpogʻiston Respublikasi Vazirlar Kengashi va Joʻqorgʻi Kengesida ushbu takliflar tegishli vazirlik va tashkilotlar bilan oʻrganib chiqilib, Qoraqalpogʻiston Respublikasi Joʻqorgʻi Kengesining 2017-yil 30-dekabrdagi 02-1094-sonli xati bilan tumandagi “Yangiobod” mahalla fuqarolar yigʻini hududidan yangidan “Farovon” mahalla fuqarolar yigʻini hamda “Daryoboʻyi” mahalla fuqarolar yigʻini hududidan yangidan “Qipchoq” shaharcha fuqarolar yigʻinini tashkil etish hamda yangidan tashkil qilinayotgan fuqarolar yigʻinlariga tegishli shtat birliklarini ajratish, davlat byujdeti hisobidan mablagʻ manbalari bilan taʼminlashni 2018-yil byudjetiga kiritish, shuningdek, “Bosuv” mahalla fuqarolar yigʻini hududidagi “Noʻgʻoy Eshon” aholi punktidagi 109 oila va “Qassob qalʼa” aholi punktidagi 56 oila “Choykoʻl” ovul fuqarolar yigʻini hududiga oʻtkazilib, chegaralarini oʻzgartirishga kelishim berildi.

Deputatlar mazkur masala yuzasidan tayyorlangan tuman Kengashi qarori loyihasini muhokama qilib, bir ovozdan maʼqulladilar.

Kun tartibidagi xalq deputatlari Amudaryo tuman Kengashi va Kengash doimiy komissiyalarining 2018-yilga moʻljallangan ish rejalarini tasdiqlash toʻgʻrisidagi masala yuzasidan xalq deputatlari Amudaryo tuman Kengashining ijtimoiy-madaniy rivojlanish hamda yoshlar siyosati va sogʻlom avlodni tarbiyalash masalalari boʻyicha doimiy komissiyasi raisi, 6-“Olmazor” saylov okrugidan deputat Sh.Yangibayeva chiqib, tuman Kengashi va Kengash doimiy komissiyalarining joriy yilga moʻljallangan ish rejalari loyihasini oʻqib eshittirdi hamda deputatlardan ushbu ish rejani tasdiqlashni soʻradi.

Soʻzga 17-“Boʻzyop” saylov okrugidan deputat G.Matyakubova, 18-Xitoy saylov okrugidan deputat G.Babajanov, 24-“Oq oltin” saylov okrugidan deputat R.Urazbayevlar chiqib ish rejalar loyihasini tuman Kengashi Reglamenti, Kengash doimiy komissiyalari toʻgʻrisidagi Nizom hamda Senat tavsiyalariga asosan siyosiy partiyalarning deputatlik guruhlari va nodavlat notijorat tashkilotlari takliflari inobatga olingan holda ishlab chiqilganligini aytib tuman Kengashi va Kengash doimiy komissiyalarining 2018-yilga moʻljallangan ish reja loyihasini maʼqulladilar.

Kun tartibidagi masalalar boʻyicha tegishli soha mutasaddilari, deputatlar soʻzga chiqib, oʻz fikr-mulohazalarini bildirdilar.

Bildirilgan taklif, fikr va mulohazalar inobatga olingan holda tuman Kengashining qarorlari qabul qilindi.

Shuning bilan sessiya oʻz ishini yakunladi.

Gʻ.Yeshniyozov