“Xalq bilan muloqot va inson manfaatlari yili” tuman hududiy dasturining 2017-yil birinchi yarim yilligidagi ijrosi toʻgʻrisida

Xalq deputatlari Amudaryo tuman Kengashi QARORI

"Xalq bilan muloqot va inson manfaatlari yili” tuman hududiy dasturining 2017-yil birinchi yarim yilligidagi ijrosi toʻgʻrisida

"Xalq bilan muloqot va inson manfaatlari yili” tuman hududiy dasturining 2017 yil birinchi yarim yilligidagi ijrosi toʻgʻrisida”gi masala yuzasidan tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlari boʻyicha oʻrinbosari A.Yuldashevning axborotini tinglab va muhokama qilib, "Mahalliy davlat hokimiyati toʻgʻrisida”gi Oʻzbekiston Respublikasi Qonunining 6-, 24-moddalariga asosan xalq deputatlari tuman Kengashi

Q A R O R    Q I L A D I :

1. "Xalq bilan muloqot va inson manfaatlari yili” tuman hududiy dasturining 2017-yil birinchi yarim yilligidagi ijrosi toʻgʻrisida”gi masala yuzasidan tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlari boʻyicha oʻrinbosari A.Yuldashevning axboroti maʼlumot uchun qabul qilinsin.

2. "Xalq bilan muloqot va inson manfaatlari yili” tuman hududiy dasturi asosida 2017-yil birinchi yarim yilligida muayyan ishlar amalga oshirilgani qayd etilsin.

3. Tuman hokimligi (S.Yoʻldashev)ga:

- tuman hokimligi va hokimlik boʻlimlarida fuqarolarning va yuridik shaxslarning murojaatlari bilan ishlash tizimini yanada yaxshilash, aholi bilan ochiq muloqotni yoʻlga qoʻyish maqsadida sayyor qabullar va aholi bilan uchrashuvlar oʻtkazish, hokim oʻrinbosarlari, boʻlimlar rahbarlarining aholi oldida hisobot berishi tizimini amaliyotga joriy etish, shu asosda xalqning davlat hokimiyatiga boʻlgan ishonchini mustahkamlash;

- tuman iqtisodiyotining barqaror surʼatlar bilan oʻsishini taʼminlash, qishloq xoʻjaligida yerdan unumli foydalanish, davlat kontraktatsiya shartnomalarining bajarilishini va oziq-ovqat xavfsizligini taʼminlash, kichik biznes va xususiy tadbirkorlikni qoʻllab-quvvatlash va ragʻbatlantirish, tadbirkorlik faoliyati uchun eng qulay shart-sharoitlar yaratish;

hududlarni, ayniqsa ijtimoiy va iqtisodiy rivojlanishda nisbatan orqada qolayotgan ovul va mahallalarni, chekka aholi punktlarini kompleks, jadal rivojlantirish, tijorat banklarining faol ishtirokida yangi ish oʻrinlari yaratilishini taʼminlash, byudjetga tushumlar, shu jumladan, naqd pul mablagʻlari tushumini oshirish va shu asosda pensiyalar, nafaqalar va boshqa birinchi darajali toʻlovlarni oʻz vaqtida toʻlash, aholining hayot darajasi va sifatini oshirish;

- muhandislik-kommunikatsiya, ijtimoiy va bozor infratuzilmasini rivojlantirish, aholi hayoti sharoitlari va sifatini yaxshilashga yoʻnaltirilgan yangilangan namunaviy loyihalar boʻyicha arzon va qulay uylar qurish ishlarini oʻz vaqtida yakunlash va foydalanishga topshirish;

- taʼlim, ijtimoiy taʼminot va sogʻliqni saqlash sohasini, shu jumladan onalik va bolalikni muhofaza qilishni yanada rivojlantirish, oilalar mustahkamligini taʼminlash, sogʻlom va barkamol avlodni tarbiyalash, yoshlarning iqtidorlari va qobiliyatlarini roʻyobga chiqarish, ularning hayotda munosib oʻringa ega boʻlishlari uchun keng imkoniyatlar yaratish boʻyicha zarur chora-tadbirlarni amalga oshirish;

- jamiyatda hukm surayotgan oʻzaro hurmat va birdamlik vaziyatini yanada mustahkamlash, mahalla, xotin-qizlar, yoshlar tashkilotlari, faxriylar tashkilotlarining roli va ahamiyatini kuchaytirish, tinchlik va xavfsizlikni taʼminlash boʻyicha zarur choralarni koʻrish vazifalari topshirilsin.

4. Muassasa, korxona va tashkilotlar rahbarlariga jismoniy va yuridik shaxslarning murojaatlari bilan ishlash borasida masʼuliyatni yanada oshirish, aholi bilan muntazam ravishda ochiq muloqotni yoʻlga qoʻyish, mansabdor shaxslarning aholi oldida hisobot berishi tamoyiliga amal qilgan holda xalqning davlat hokimiyatiga boʻlgan ishonchini mustahkamlashga hissa qoʻshish vazifalari topshirilsin.

5. Fuqarolarning oʻzini oʻzi boshqarish organlari rahbarlariga tegishli tuman Kengashi deputatlari va hududdagi jamoat tashkilotlari bilan hamkorlikda "Xalq bilan muloqot va inson manfaatlari yili” tuman hududiy dasturining ijrosi ustidan jamoatchilik nazoratini oʻrnatish vazifasi topshirilsin.

6. Tuman Kengashi deputatlariga qabul qilingan qonunlar, farmonlar va boshqa qonun hujjatlari bajarilishi, davlat organlariga yuklangan vazifalar va funktsiyalarning bajarilishi boʻyicha ular ishining samaradorligi, ular tomonidan fuqarolarning murojaatlariga munosabat bildirilishi yuzasidan deputatlik nazoratini oʻrnatish vazifasi topshirilsin.

7. Ushbu qaror "Taraqqiyot koʻzgusi” gazetasida, xalq deputatlari tuman Kengashi va tuman hokimligining rasmiy veb-saytlarida eʼlon qilinsin.

8. Ushbu qarorning ijrosini nazorat qilish xalq deputatlari tuman Kengashining Qonuniylik, huquq-tartibot va fuqarolar xavfsizligini taʼminlash masalalari boʻyicha doimiy komissiyasi raisi Gʻ.Yeshniyozov zimmasiga yuklatilsin.

9. Ushbu qaror qabul qilingan kundan eʼtiboran kuchga kiradi.

Xalq deputatlari Amudaryo

tuman Kengashi raisi:                                     S.Yoʻldashev

 2017-yil 29-iyul,

№ 128/35-05