Xalq deputatlari tuman Kengashining 32-sessiyasi toʻgʻrisida AXBOROT

28-aprel kuni Xalq deputatlari tuman Kengashining 32-sessiyasi boʻlib oʻtdi.

Sessiyada tuman Kengashi deputatlari, tuman hokimi oʻrinbosarlari, hokimlik masʼul xodimlari, boʻlimlar rahbarlari, jamoat tashkilotlari hamda ommaviy axborot vositalari vakillari ishtirok etdi. 

Sessiya kotibligiga 11-Oʻrta qalʼa saylov okrugidan tuman Kengashi deputati Jasurbek Yaxshimov saylandi.

Sessiya kun tartibiga "Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonunining tuman davlat soliq inspektsiyasida ijrosi toʻgʻrisida”gi, Oʻzbekiston Respublikasi Prezidentining 2016 yil 28-dekabrdagi "Keksalar va nogironlarni davlat tomonidan qoʻllab-quvvatlash tizimini yanada takomillashtirishga doir qoʻshimcha chora-tadbirlar toʻgʻrisida”gi qarorining ijrosi va kelgusidagi vazifalar toʻgʻrisida”gi, "Tumanda aholiga tibbiy xizmat koʻrsatish sifatini yanada yaxshilash borasida amalga oshirilayotgan ishlar toʻgʻrisida tuman tibbiyot birlashmasi boshligʻining hisoboti haqida”gi, "Amudaryo tumani mahalliy byudjetining 2017-yil birinchi chorakdagi ijrosi toʻgʻrisida”gi hamda "Xalq deputatlari tuman Kengashining reglamenti va Kengash doimiy komissiyalari toʻgʻrisidagi Nizomga oʻzgartish va qoʻshimchalar kiritish toʻgʻrisida”gi masalalar kiritildi.

"Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonunining tuman davlat soliq inspektsiyasida ijrosi toʻgʻrisidagi masala yuzasidan tuman Kengashining qonuniylik, huquq-tartibot va fuqarolar xavfsizligini taʼminlash masalalari boʻyicha doimiy komissiyasi raisi Gʻulomjon Yeshniyozov axborot berdi. Axborotda taʼkidlanganidek, xalq deputatlari tuman Kengashining qonuniylik, huquq tartibot va fuqarolar xavfsizligini taʼminlash masalalari doimiy komissiyasi aʼzolari tomonidan yuqorida nomlangan qonunning tuman davlat soliq inspektsiyasida ijrosi oʻrganib chiqildi. Oʻrganish natijalariga koʻra, inspektsiyada mazkur Qonun ijrosi boʻyicha muayyan ishlar amalga oshirilgani, shuning bilan birga ayrim kamchiliklar mavjudligi qayd qilindi. Deputatlar tuman davlat soliq inspektsiyasi va tumandagi barcha davlat tashkilotlari va muassasalarida jismoniy va yuridik shaxslarning murojaatlari bilan ishlash ishlarini yanada yaxshilashni nazarda tutuvchi qaror loyihasini bir ovozdan maʼqulladilar.

Kun tartibidagi ikkinchi masala boʻyicha tuman hokimi oʻrinbosari Alisher Yoʻldoshev soʻzga chiqib, Oʻzbekiston Respublikasi Prezidentining 2016-yil 28-dekabrdagi "Keksalar va nogironlarni davlat tomonidan qoʻllab-quvvatlash tizimini yanada takomillashtirishga doir qoʻshimcha chora-tadbirlar toʻgʻrisida”gi qarorining ijrosi va kelgusidagi vazifalar toʻgʻrisidagi masala yuzasidan axborot berdi.

Axborotda keksa yoshdagi fuqarolarni va nogironlarni davlat tomonidan qoʻllab-quvvatlash, ularning mamlakat ijtimoiy-siyosiy hayotida toʻla huquqli ishtirok etishi uchun zarur shart-sharoitlar yaratish boʻyicha tumanimizda amalga oshirilayotgan ishlar xususida maʼlumotlar keltirildi.

Tumanda aholiga tibbiy xizmat koʻrsatish sifatini yanada yaxshilash borasida amalga oshirilayotgan ishlar boʻyicha tuman tibbiyot birlashmasi boshligʻi Olimboy Xalimov hisobot berdi.

Hisobotda muhtaram Prezidentimiz rahbarligida sogʻliqni saqlash tizimini isloh etish borasida belgilangan vazifalardan kelib chiqib, birlamchi tibbiy-sanitariya muassasalari faoliyatini optimallashtirish, aholining barcha qatlamini zamonaviy tibbiy-profilaktika yordami bilan toʻliq qamrab olish boʻyicha amalga oshirilayotgan ishlarga toʻxtalib oʻtildi.

Kun tartibidagi navbatdagi masala – tuman mahalliy byudjetining 2017-yil birinchi chorakdagi ijrosi toʻgʻrisidagi masala yuzasidan tuman moliya boʻlimi mudiri vazifasini vaqtincha bajaruvchi Baxtiyor Kamolov axborot berdi.

Axborotda 2017-yilning birinchi choragi davomida tuman mahalliy byudjetining daromadlar qismi rejasi 8 mlrd. 65 mln. 436 ming soʻmga belgilangan boʻlib, haqiqatda 8 mlrd. 556 mln. 106 ming soʻmga, yaʼni rejaga nisbatan 106,1 foizga bajarilgani qayd qilindi.

Hisobot davrida mahalliy byudjetning xarajatlar qismi rejasi 24 mlrd. 458 mln. 503 ming soʻmga belgilangan va ushbu mablagʻlar asosan ijtimoiy-madaniy va aholini qoʻllab-quvvatlash xarajatlariga, iqtisodiyot sohasida olib borilayotgan islohotlar talablarini amalga oshirish tadbirlariga qaratilgan.

Kun tartibidagi soʻnggi masala muhokamasida deputatlar "Xalq deputatlari Amudaryo tuman Kengashining reglamenti va Kengash doimiy komissiyalari toʻgʻrisidagi Nizomga oʻzgartish va qoʻshimchalar kiritish boʻyicha tayyorlangan qaror loyihasini muhokama qilib, bir ovozdan tasdiqlanidar.

Kun tartibidagi barcha masalalar boʻyicha tegishli qarorlar qabul qilindi va shuning bilan sessiya oʻz ishini yakunladi.