Ramazon fazilatlari

lloh taologa beadad hamdu sanolar boʻlsinki, oʻn bir oyga choʻzilgan sogʻinch va ishtiyoqdan soʻng nihoyat oylarning sultoni, ezgulik va xayr mavsumi, toatu ibodat fasli, saxovatu duo, tarovehu Qurʼon oyi boʻlmish muborak mohi Ramazon oʻzining tarovati, saxovati va barakoti bilan olamga tashrif buyurib, boshimiz uzra rahmat soyaboni boʻlib turibdi.

Jannatmakon oʻlkamizning moʻʼmin-musulmonlari oylarning eng ulugʻi va eng fazilatlisi boʻlmish bu oyni bir olam shodligu quvonch bilan kutib olmoqdalar.

Alloh taolo Ramazon oyini boshqa barcha oylardan oliy va mufassal qildi. Uni koʻplab buyuk fazilatlar va ulugʻ imtiyozlar bilan xosladi. Imom Tabaroniy Ibn Abbos (roziyal-lohu anhumo)dan rivoyat qilingan hadisda Nabiy (sollal-lohu alayhi vasallam): «Oylarning eng afzali Ramazon oyidir», deganlar.

Ramazon oyining fazilatlarini sanab, tugatib boʻlmaydi. Islomning bosh manbai, insoniyatning qiyomatgacha hayot dasturi - Qurʼoni karim shu oyda nozil boʻlgandir. Ushbu oyda Islom tarixiga zarhal harflar bilan yozilgan juda koʻp olamshumul voqealar sodir boʻlgan. Shu bois, butun dunyo musulmonlari ushbu tabarruk oyni solih amallar va Alloh roziligi yoʻlidagi ibodatlar oyiga aylantirishadi.

Ramazon xayr-saxovat oyidir. Paygʻambarimiz (solallohu alayhi va sallam) bu oyda boshqa oylarga qaraganda yanada saxiyroq boʻlib ketardilar.

Shuning uchun ham qadimdan musulmonlar Ramazon kirganda har galgidan saxovatliroq boʻlishga odatlanganlar. Davlatmand kishilar zakotlarini ham aynan Ramazonda ado etishlari ham shundan. Bu oyning barakasidan har bir uy bahramand boʻlib, moʻʼminlar qalbiga xursandlik va shodlik kirsin uchun odamlar alohida Ramazonga xos xayru ehsonlari bilan bir qatorda zakotlarini ham shu oyda chiqaradilar.

Ramazon rahmat oyidir. Ramazonda Alloh taoloning rahmati joʻsh uradi. Imom Muslim rivoyat qilgan hadisda: «Ramazon boʻlganda rahmat eshiklari ochiladi», deyilgan. Ramazonning avvalgi oʻn kunligi nafaqat oyning, balki yilning «rahmat kunlari» hisoblanadi.

Ramazon magʻfirat oyi. Uning oʻrtadagi oʻn kuni nafaqat oyning, balki yilning «magʻfirat kunlari» hisoblanadi. Ramazon fazilati haqida Salmon (roziyallohu anhu) qilgan rivoyatda Rasululloh (sollallohu alayhi va sallam): «U avvali rahmat, oʻrtasi magʻfirat va oxiri doʻzaxdan ozod boʻlish fursati boʻlgan oydir», deganlar.

Ramazon doʻzaxdan ozod boʻlish oyidir. Ramazon oyida jannat darvozalari ochilib, doʻzax eshiklari yopiladi. Chunki, bu oyda jannatga kirish uchun sabab boʻlgan xayrli ishlar va solih amallar koʻproq bajariladi, doʻzaxga kirish uchun sabab boʻlgan gunoh-maʼsiyatlar va yaramas, jirkanch, uyatli ishlar kamroq sodir etiladi. Jannat darvozalari musulmonlarni xayrli ishlarga shoshilishga targʻib qilib ham ochiladi. Doʻzax eshiklari esa, gunohlardan qaytgan, istigʻfor aytgan, afsus-nadomat chekkan, qayta qilmaslikka niyat qilgan holda tavba qilishga targʻib qilib yopiladi

Uning oxirgi oʻn kunligi «doʻzaxdan ozod boʻlish» kunlari sanaladi. Shu bilan birga, Ramazonda har kecha son-sanoqsiz kishilar doʻzaxdan ozod qilinadi. Imom Termiziy rivoyat qilgan hadisda Rasululloh sollallohu alayhi vasallam: «Ramazonda har kecha Allohning doʻzaxdan ozod qilinadigan bandalari bor», deganlar.

Ramazon – duo oyi. Ramazon oyining har kunida qabul boʻladigan bir duo bor. Rasululloh (sollallohu alayhi va sallam) marhamat qilib dedilar: "Albatta, Ramazonning har kunida barcha musulmonlar uchun qabul boʻladigan bir duo bor” (Imom Ahmad, Bazzor va boshqalar rivoyati).

Agar bu duo roʻza paytida, ayniqsa, iftordan salgina oldin qilinsa, maqsadga muvofiq boʻladi. Yana Rasululloh (sollallohu alayhi va sallam) aytadilar: "Uch kishining duosi qaytarilmaydi: adolatli imom, roʻzadorning to iftor qilgunicha va mazlumning duosi” (Ibn Moja, Termiziy, Ahmad ibn Hanbal, Bayhaqiy, Ibn Hibbon, Tayolisiy, Ibn Xuzayma va Ishoq ibn Rohavayhlar rivoyati).

Bu zikr qilinganlar Ramazon oyining barcha fazilatlarini toʻla qamrab ololmaydi, balki, mazkur fazilatlar oldida daryodan ayrim tomchilar, xolos. Uning fazilat-u xususiyatlarini sanab adogʻiga yetkazish mushkuldir. Alloh taolodan yolvorib soʻraymizki, bu muborak oyni - rahmat va magʻfirat oyini, doʻzaxdan najot beriladigan, duolar ijobat qilinadigan Ramazon oyini barchamizga xayrli va barakotli qilsin! Uni taqvo neʼmatiga erishishimiz uchun vasila qilsin! Omin!