Ramazon hayiti namozi katta xursandchilik va shukronalik bilan ado etildi

Musulmon olamining eng qutlugʻ ayyomlaridan biri – muborak Ramazon hayiti butun yurtimiz boʻylab oʻzgacha shukuh, koʻtarinki kayfiyat, mehr-oqibat va cheksiz shukronalik tuygʻulari ostida keng nishonlandi. Erta tongdan mamlakatimizning barcha hududlarida boʻlgani kabi, Amudaryo tumanida joylashgan "Yusuf eshon bobo" jomʼe masjidida ham minglab moʻmin-musulmonlar jam boʻlib, Ramazon hayiti namozini katta xursandchilik va shukronalik bilan ado etdilar.

Mazkur maskanda jamlangan namozxonlar yuzidagi quvonch va shukronalik hissi bugungi kunda yurtimizda hukm surayotgan diniy bagʻrikenglik, millatlararo totuvlik va barqarorlik ijtimoiy muhitining eng yorqin ifodasidir.

Davlatimiz rahbarining Ramazon hayiti munosabati bilan xalqimizga yoʻllagan bayram tabrigida taʼkidlanganidek, keyingi yillarda mamlakatimizda shakllangan goʻzal va ezgu anʼanaga muvofiq, muborak Ramazon oyini munosib oʻtkazish, uning fayzu barokotini har bir xonadonga yetkazish maqsadida bu yil ham keng koʻlamdagi sermazmun va xayrli ishlar amalga oshirildi.

Bu borada, ayniqsa, inson qadrini ulugʻlash, aholining koʻmakka muhtoj qatlamlarini har tomonlama qoʻllab-quvvatlashga qaratilgan saʼy-harakatlar yangi bosqichga koʻtarilganini alohida qayd etish joiz. Real faktlar va raqamlarga eʼtibor qaratadigan boʻlsak, maxsus qaror asosida keyingi oʻttiz besh yil ichida birinchi marta aynan ehtiyojmand qatlamlarni qoʻllab-quvvatlash maqsadida davlat byudjetidan 1 trillion soʻm miqdoridagi mablagʻ ajratildi. Bunday ulkan sarmoya muhtoj va kam taʼminlangan oilalarning turmush sharoitini tubdan yaxshilash, ularga bevosita moddiy madad berish, shuningdek, bemorlarga zarur tibbiy yordam koʻrsatish kabi oʻta muhim, hayotiy zarur, ezgu ishlarga yoʻnaltirilgani bilan ahamiyatlidir.

 Bundan tashqari, ijtimoiy reyestrdagi davolash rejalashtirilgan 6 ming nafar bemorga tibbiy yordam koʻrsatilmoqda, jumladan ogʻir kasallar operatsiya yoʻli bilan davolanmoqda. Shuningdek, aholiga 100 ming dona Ramazon sovgʻalari tarqatildi. “Ramazon tuhfasi” loyihasi doirasida esa ehtiyojmand oilalar, “Muruvvat” va “Saxovat” uylarida yashovchilar hamda xorijdagi vatandoshlarimiz uchun 30 mingdan ortiq iftorlik tadbirlari oʻtkazildi.

Bunday olijanob, savobli va xayrli ishlar muqaddas islom dinimizning asl insonparvarlik mohiyatiga, mehr-shafqat va saxovat tamoyillariga toʻla hamohang boʻlib, inson qadrini yuksaltirishga qaratilgan islohotlarning bevosita amaliy natijalari sifatida barchamizni birdek xursand qiladi.

Maʼnaviy-maʼrifiy va diniy sohadagi yuksalishlar ayniqsa bayram kunlarida oʻzining munosib va yorqin ifodasini topdi. Xususan, mana shu qutlugʻ va muborak kunlarda azim poytaxtimiz Toshkent shahrida qad rostlagan Oʻzbekistondagi Islom tsivilizatsiyasi markazi hamda qadimiy va navqiron Samarqand viloyatida barpo etilgan muhtasham Imom Buxoriy yodgorlik majmuasining ochilishi butun Oʻzbekiston xalqiga oʻziga xos bebaho Ramazon tuhfasi boʻldi.

Bu kabi tarixiy, maʼnaviy va ezgu ishlarning uzviy davomi sifatida bugungi kunda Samarqand shahrida kalom ilmining sultoni, buyuk alloma Imom Moturidiy majmuasi yangidan, zamonaviy arxitektura va milliy meʼmorchilik anʼanalari asosida barpo etilmoqda. Poytaxtimiz Toshkent shahrida esa yaqin kunlarda Xalqaro bagʻrikenglik va dinlararo muloqot markazi oʻz faoliyatini yoʻlga qoʻyadi. Ushbu markaz jonajon Vatanimizning turli millat va dinlararo muloqot, oʻzaro hamkorlik, tinchlik va doʻstlik tarannum etiladigan muqaddas diyor sifatidagi nufuzini xalqaro maydonda yanada oshirishga xizmat qiladi.

Amudaryo tumanidagi "Yusuf eshon bobo" masjidida va yurtimizning barcha goʻshalarida oʻqilgan Ramazon hayiti namozi soʻnggida nuroniy otaxonlarimiz, imom-xatiblar va barcha yigʻilganlar tomonidan elu yurtimiz haqqiga, osmonimiz musaffoligi, yurtimiz tinchligi, dasturxonlarimizga qut-baraka va xalqimizga tinchlik-xotirjamlik soʻrab chin dildan ezgu duolar qilindi.