Рамазон ҳайити намози катта хурсандчилик ва шукроналик билан адо этилди

Мусулмон оламининг энг қутлуғ айёмларидан бири – муборак Рамазон ҳайити бутун юртимиз бўйлаб ўзгача шукуҳ, кўтаринки кайфият, меҳр-оқибат ва чексиз шукроналик туйғулари остида кенг нишонланди. Эрта тонгдан мамлакатимизнинг барча ҳудудларида бўлгани каби, Амударё туманида жойлашган "Юсуф эшон бобо" жомъе масжидида ҳам минглаб мўмин-мусулмонлар жам бўлиб, Рамазон ҳайити намозини катта хурсандчилик ва шукроналик билан адо этдилар.

Мазкур масканда жамланган намозхонлар юзидаги қувонч ва шукроналик ҳисси бугунги кунда юртимизда ҳукм сураётган диний бағрикенглик, миллатлараро тотувлик ва барқарорлик ижтимоий муҳитининг энг ёрқин ифодасидир.

Давлатимиз раҳбарининг Рамазон ҳайити муносабати билан халқимизга йўллаган байрам табригида таъкидланганидек, кейинги йилларда мамлакатимизда шаклланган гўзал ва эзгу анъанага мувофиқ, муборак Рамазон ойини муносиб ўтказиш, унинг файзу барокотини ҳар бир хонадонга етказиш мақсадида бу йил ҳам кенг кўламдаги сермазмун ва хайрли ишлар амалга оширилди.

Бу борада, айниқса, инсон қадрини улуғлаш, аҳолининг кўмакка муҳтож қатламларини ҳар томонлама қўллаб-қувватлашга қаратилган саъй-ҳаракатлар янги босқичга кўтарилганини алоҳида қайд этиш жоиз. Реал фактлар ва рақамларга эътибор қаратадиган бўлсак, махсус қарор асосида кейинги ўттиз беш йил ичида биринчи марта айнан эҳтиёжманд қатламларни қўллаб-қувватлаш мақсадида давлат бюджетидан 1 триллион сўм миқдоридаги маблағ ажратилди. Бундай улкан сармоя муҳтож ва кам таъминланган оилаларнинг турмуш шароитини тубдан яхшилаш, уларга бевосита моддий мадад бериш, шунингдек, беморларга зарур тиббий ёрдам кўрсатиш каби ўта муҳим, ҳаётий зарур, эзгу ишларга йўналтирилгани билан аҳамиятлидир.

 Бундан ташқари, ижтимоий реестрдаги даволаш режалаштирилган 6 минг нафар беморга тиббий ёрдам кўрсатилмоқда, жумладан оғир касаллар операция йўли билан даволанмоқда. Шунингдек, аҳолига 100 минг дона Рамазон совғалари тарқатилди. “Рамазон туҳфаси” лойиҳаси доирасида эса эҳтиёжманд оилалар, “Мурувват” ва “Саховат” уйларида яшовчилар ҳамда хориждаги ватандошларимиз учун 30 мингдан ортиқ ифторлик тадбирлари ўтказилди.

Бундай олижаноб, савобли ва хайрли ишлар муқаддас ислом динимизнинг асл инсонпарварлик моҳиятига, меҳр-шафқат ва саховат тамойилларига тўла ҳамоҳанг бўлиб, инсон қадрини юксалтиришга қаратилган ислоҳотларнинг бевосита амалий натижалари сифатида барчамизни бирдек хурсанд қилади.

Маънавий-маърифий ва диний соҳадаги юксалишлар айниқса байрам кунларида ўзининг муносиб ва ёрқин ифодасини топди. Хусусан, мана шу қутлуғ ва муборак кунларда азим пойтахтимиз Тошкент шаҳрида қад ростлаган Ўзбекистондаги Ислом цивилизацияси маркази ҳамда қадимий ва навқирон Самарқанд вилоятида барпо этилган муҳташам Имом Бухорий ёдгорлик мажмуасининг очилиши бутун Ўзбекистон халқига ўзига хос бебаҳо Рамазон туҳфаси бўлди.

Бу каби тарихий, маънавий ва эзгу ишларнинг узвий давоми сифатида бугунги кунда Самарқанд шаҳрида калом илмининг султони, буюк аллома Имом Мотуридий мажмуаси янгидан, замонавий архитектура ва миллий меъморчилик анъаналари асосида барпо этилмоқда. Пойтахтимиз Тошкент шаҳрида эса яқин кунларда Халқаро бағрикенглик ва динлараро мулоқот маркази ўз фаолиятини йўлга қўяди. Ушбу марказ жонажон Ватанимизнинг турли миллат ва динлараро мулоқот, ўзаро ҳамкорлик, тинчлик ва дўстлик тараннум этиладиган муқаддас диёр сифатидаги нуфузини халқаро майдонда янада оширишга хизмат қилади.

Амударё туманидаги "Юсуф эшон бобо" масжидида ва юртимизнинг барча гўшаларида ўқилган Рамазон ҳайити намози сўнггида нуроний отахонларимиз, имом-хатиблар ва барча йиғилганлар томонидан элу юртимиз ҳаққига, осмонимиз мусаффолиги, юртимиз тинчлиги, дастурхонларимизга қут-барака ва халқимизга тинчлик-хотиржамлик сўраб чин дилдан эзгу дуолар қилинди.