Амударё туманида Қурбон ҳайити кенг нишонланди

Муқаддас қадриятларимиз, меҳр-оқибат ва чин инсонпарварлик туйғуларини ўзида мужассам этган улуғ айём – Қурбон ҳайити жонажон юртимиз бўйлаб ўзига хос шукуҳ, файз ва кўтаринки кайфият билан кутиб олинди. Мамлакатимизнинг ҳар бир гўшаси ва маҳаллаларида бўлгани каби Амударё туманида ҳам ушбу муборак байрам кенг миқёсда нишонланди. Хусусан, 27 май куни эрта саҳардан бошлаб Манғит шаҳрида жойлашган “Юсуф эшон бобо” жомеъ масжиди ҳамда туман ҳудудидаги барча бошқа масжидлар юртдошларимиз билан тўлди.

Минглаб юртдошларимиз дастлаб Ҳайит намозидан олдинги маърифий ва руҳий тарбияга бой бўлган маърузаларни катта эътибор билан тингладилар. Ушбу таъсирчан маърузалар давомида Қурбон ҳайитини муносиб нишонлаш, бу қутлуғ кунни улуғ байрам сифатида кўтаринки кайфиятда ўтказиш лозимлиги алоҳида таъкидлаб ўтилди. Шунингдек, уламоларимиз томонидан бу байрамнинг асл моҳияти фақатгина ибодат ва маросимлар билан чекланмаслиги, балки инсонларга ато этилган беҳисоб ва бебаҳо неъматларга шукроналик билдириш, ён-атрофимиздаги кўмакка муҳтож инсонларга беминнат ёрдам қўлини чўзиш, оилаларга қувонч ва шодлик улашишдан иборат эканлиги кенг тушунтирилди.

Давлатимиз раҳбарининг Қурбон ҳайити муносабати билан халқимизга йўллаган байрам табригида ҳам айни шу муҳим жиҳатларга алоҳида урғу берилди. Табрикда таъкидланганидек, тинчлик, меҳр-оқибат ва саховат байрами ҳисобланган Қурбон ҳайити муқаддас динимиз моҳиятида мужассам бўлган эзгу ғоя ва инсонпарвар амалларни яққол ифода этади. Бу олийжаноб жиҳатлар ҳозирги кунда мамлакатимиз бўйлаб инсонпарварлик руҳида, аввало инсон қадрини улуғлаш мақсадида олиб борилаётган кенг кўламли ислоҳотларнинг маъно-мазмунига тўла уйғун ҳамда ҳамоҳанг эканлиги билан барчамиз учун янада азиз ва қадрлидир.

Чиндан ҳам, бу йилги Қурбон ҳайити байрамини ўтказишга юртимизда ҳар қачонгидан ҳам ўзгача тайёргарлик кўрилди. Президентимизнинг бевосита ташаббуси билан ушбу муборак айём арафасида кенг кўламли хайрия ва мурувват тадбирлари амалга оширилди. Жумладан, оғир ва ногиронликни келтириб чиқарувчи мураккаб касалликларга чалинган 10 минг нафар болада жарроҳлик амалиёти ўтказилади. Бундан ташқари, онкологик, гематологик ва онкогематологик ташхиси қўйилган 2 300 нафар беморни чуқурлашган тиббий текширувдан ўтказиш, уларни замонавий усулларда даволаш ва керакли мураккаб жарроҳлик амалиётларини бажариш ишлари бошланди. Шунингдек, камида 350 нафар беморда жигар ва буйрак трансплантатсияси каби ўта мураккаб амалиётлар бажарилади.

Байрам кунларида ижтимоий ҳимояга муҳтож болаларни ҳар томонлама қўллаб-қувватлашга ҳам алоҳида эътибор қаратилмоқда. Жумладан, 8 минг нафардан зиёд етим ва ота-она қарамоғидан бутунлай маҳрум бўлган болалар, шунингдек, Ватан сарҳадларини ҳимоя қилиш йўлида қаҳрамонларча қурбон бўлган ота-оналарнинг фарзандлари учун уларнинг шахсий омонат ҳисобварақларига 200 АҚШ доллари миқдоридаги пул маблағлари ўтказиб берилмоқда. 500 та масжидда аҳоли учун энг қулай шарт-шароитлар яратиш, хусусан, замонавий таҳоратхоналар қуриш, мавжудларини реконструксия қилиш ёки капитал таъмирлаш, шу билан бирга, жойлардаги қабристонларни обод қилиш каби савобли ишлар изчиллик билан амалга оширилмоқда. Шу билан биргаликда, давлат таъминотидаги оилалар, ўзгалар меҳри ва парваришига муҳтож бўлган ёлғиз яшовчи ҳамда ёлғиз кексалар ва ногиронлиги бўлган шахслар махсус кундалик озиқ-овқат тўпламлари билан таъминланмоқда. Мазкур мурувват ва хайрия чора-тадбирларини молиялаштириш учун “Вақф” хайрия жамоат фондига 690 млрд. сўм маблағ ажратилган.

Ушбу мунаввар кунларда 15 минг нафардан зиёд ватандошларимиз Саудия Арабистонида муқаддас ҳаж амалларини адо этмоқдалар. Айниқса, бу йил тарихимизда илк марта “Президент ҳожилари” деб номланган махсус дастур жорий этилгани барча мўмин-мусулмонларни бирдек қувонтирди ва қалбларини ғурурга тўлдирди. Ушбу дастурга мувофиқ, эл-юртимизга сидқидилдан, ҳалол ва фидокорона хизмат қилган 100 нафар юртдошимиз, яъни эл орасида ҳурматга сазовор бўлган уламолар, пиру бадавлат нуронийлар, маҳалла фахрийлари ҳамда уларнинг оила аъзолари давлатнинг тўлақонли кўмагида муборак ҳаж сафарига боришдек имкониятга эга бўлдилар.

Амударё туманидаги барча масжидларда Қурбон ҳайити намози тўлиқ адо этилгач, йиғилган минглаб юртдошларимиз дуога қўл очдилар. Улар шундай дориломон, ёруғ ва фаровон тинч кунларга эсон-омон, соғ-саломат етказгани учун Яратганга беҳисоб шукроналар ва ҳамду санолар айтдилар. Бундан ташқари мустақил юртимизга барқарор тинчлик-хотиржамлик, доимий юксалиш, меҳнаткаш ва бағрикенг халқимизга эса омонлик, қут-барака ва фаровонлик тилаб энг эзгу дуолар қилдилар.

Муборак айём кунларида юртдошларимиз томонидан мамлакатимизнинг турли гўшаларидаги мўтабар зиёратгоҳлар, қабристонлар ва тарихий қадамжоларнинг зиёрат қилиниши эса юртдошларимизнинг ўтган аждодлар руҳига бўлган чуқур эҳтироми ҳамда бой маданий, маънавий меросимизга бўлган юксак ҳурматининг ёрқин ифодасидир.