ISTIQLOL VA MUSTAQIL OʻZBEKISTON RAMZI

Istiqlolimizning eng oliy yutuqlaridan biri – yurtimizda tarixan qisqa muddatda milliy davlatchiligimiz huquqiy poydevori yaratilgani bilan bugun har qancha faxrlansak arziydi.

Oʻzbekiston Respublikasi oʻzining 24-yillik mustaqil taraqqiyot yoʻlida erishgan barcha natijalar, xususan, inson huquqlari va erkinliklarining taʼminlanishi, davlat boshqaruvining eng samarali mexanizmi joriy etilishi, fuqarolik jamiyati asoslarining vujudga kelishi va rivojlanishi kabi yutuqlar Konstitutsiya va u asosida qabul qilingan qonunlarning izchil amalga oshirilishi natijasida qoʻlga kiritildi. Prezidentimiz eʼtirof etganidek, «Konstitutsiyamiz oʻz mazmun-mohiyatiga koʻra xalqimiz tafakkurining mahsuli boʻlib, u davlatni davlat, millatni millat sifatida tanitadigan qomusnomadir». Uning barcha moddalari dunyoda umumeʼtirof etilgan tamoyillar, xalqaro huquq normalari va boshqa bir qator xalqaro hujjatlardagi umuminsoniy tamoyillar mazmuni bilan sugʻorilgan.

Konstitutsiya (lotincha "Constitution” – tuzilish, tuzuk) – davlatning Asosiy qonuni. U davlat tuzilishini, hokimiyat va boshqaruv organlari tizimini, ularning vakolati hamda shakllantirilish tartibi, saylov tizimi, fuqarolarning huquq va erkinliklari, jamiyat va shaxsning oʻzaro munosabatlari, shuningdek, sud tizimini belgilab beradi.

Asosiy Qonunimiz yaratilishining murakkab va muhim, ayni chogʻda sharafli solnomasiga nazar solar ekanmiz, hech shubhasiz, Oʻzbekiston Konstitutsiyasi xalqimizning mustaqillik sari uzoq yoʻldagi izlanishlari natijasi ekaniga komil ishonch hosil qilamiz.

Milliy davlatchiligimizning eng muhim qadriyatlarini belgilab beradigan Asosiy Qonunimiz – Oʻzbekiston Respublikasi Konstitutsiyasida mamlakatimizda davlat va jamiyat qurilishining asosiy huquqiy tamoyillari oʻzining aniq ifodasini topgan boʻlib, ular orasida davlat hokimiyatining qonun chiqaruvchi, ijro etuvchi va sud tarmoqlariga boʻlinishi hal qiluvchi qoida sifatida muhrlab qoʻyilgan.

Ana shunday mustahkam huquqiy  poydevor asosida mamalakatimizda tub islohotlar amalga oshirildi, davlat va xoʻjalik boshqaruvining tarkibiy tuzilishi modernizatsiya qilindi va yangilandi, joylarda hokimlik instituti joriy etilib, mahalliy hokimiyat organlari qayta tashkil qilindi, fuqarolarning oʻzini-oʻzini boshqarish organlari tizimi – mahalla instituti rivojlandi va mustahkamlandi.

Diyorimizda ijtimoiy jihatdan yoʻnaltirilgan bozor iqtisodiyoti asoslari yaratilib, yangicha iqtisodiy munosabatlar mexanizmlari joriy etildi, tegishli infratuzilma institutlari tashkil etildi. Bugungi talabga javob beradigan mutlaqo yangi moliya va ikki bosqichli zamonaviy bank tizimlari shakllantirilib, iqtisodiyotimizning barcha soha tarmoqlarida chuqur islohotlar amalga oshirildi.

Mustaqillik yillarida yurtimizda mulkiy munosabatlar sohasida ham tub oʻzgarishlar roʻy berdi. Mamlakatimizda koʻp ukladli iqtisodiyot shakllanib, uning tarkibida xususiy mulk ustuvor rivojlanish imkoniyatiga ega boʻldi. Kichik biznes va xususiy tadbirkorlik iqtisodiyotimizda nafaqat hal qiluvchi oʻrinni egalladi, balki bozorlarimizni zarur tovar, xizmatlar bilan toʻldirish, odamlarning daromadi va farovonligini yuksaltirishning asosiy manbai, aholi bandligini taʼminlashning eng muhim omiliga aylandi.

Biz erishgan marralarning eng muhimi – eski tizimdan butunlay voz kechib, mamlakatimizni isloh etish va demokratlashtirish yoʻlidan dadil borayotganimiz va bu jarayonning hech qachon ortga qaytmaydigan qatʼiy va izchil tus olganini bugungi kunda har bir oʻzbekistonlik chuqur anglab va butun ong-u shuuri bilan his etib yashamoqda.

Demokratlashtirish va liberallashtirish, biz uchun printsipial jihatdan mutlaqo yangi boʻlgan davlatni shakllantirish, albatta, bu bir-ikki yilda hal etiladigan vazifa emas, balki muayyan muddat bilan chegaralanib qolmaydigan uzoq va uzluksiz jarayondir.

Bugungi kunda Konstitutsiyamiz haqida soʻz yuritar ekanmiz, muhtaram Prezidentimiz uqtirganlaridek, eng dolzarb, kerak boʻlsa, eng buyuk vazifamiz – Oliy Qomusimiz belgilab, muhrlab bergan asosiy printsip va tamoyillarni hayotga toʻliq tatbiq etishdan iborat.

Konstitutsiya – nafaqat bugungi kunning, balki u ertangi kunimiz, qurayotgan jamiyatimiz istiqbolini aniqlab beruvchi hujjat, farzandlarimiz yoʻlini yoritib turguvchi mayoqdir.

Shunday ekan, jamiyatimiz hayotining mezoni boʻlgan Konstitutsiyani chuqur va har tamonlama oʻrganishimiz, uning maʼnosiga yetib borishimiz, amaliy hayotimizning doimiy qoʻllanmasiga aylantirishimiz darkor.

Muxtasar aytganda, Asosiy Qonunimiz mamlakatimizda bosqichma-bosqich va izchil amalga oshirilayotgan ijtimoiy-iqtisodiy, siyosiy-huquqiy islohotlarni jadal va barqaror rivojlantirish hamda kelajakda davlatimizni ravnaq toptirishni kafolatlaydi.

S.Xudaybergenov,

D.Tangirov,

Oʻzbekiston Respublikasi Oliy Majlisi Qonunchilik palatasi deputatlari.