XALQ DEPUTATLARI TUMAN KENGAShNING SESSIYaLARI OʻTKAZILDI

2015-yil 1, 2 va 3-noyabr kunlari xalq deputatlari tuman Kengashining navbatdagi 8-, 9- va 10-sessiyalari boʻlib oʻtdi.

Sessiyalarga xalq deputatlari tuman Kengashi Reglamentining 16-moddasiga muvofiq tuman hokimi topshirigʻiga asosan 24-"Oq oltin” saylov okrugidan deputat R.Urazbayev raislik qildi.

Sessiyalarda tuman Kengashi deputatlari, hokim oʻrinbosarlari, hokimlik masʼul xodimlari, huquq-tartibot organlari va boʻlimlar rahbarlari, jamoat tashkilotlari, tuman Kengashi huzuridagi "Jamoatchilik nazorati Kengashi” aʼzolari, tijorat banklari rahbarlari, tuman fermerlari Kengashi, qishloq va suv xoʻjaligi, yer resurslari va davlat kadastri boʻlimlari, muqobil mashina traktor parklari, qishloq xoʻjaligiga xizmat koʻrsatuvchi tashkilotlar rahbarlari, fermer xoʻjaliklari rahbarlari hamda ommaviy axborot vositalari vakillari ishtirok etdilar.

Sessiyalar kun tartibida "Qishloq xoʻjaligida iqtisodiy islohotlarni chuqurlashtirish boʻyicha Respublika komissiyasining 2015-yil 21-oktyabrdagi "Fermer xoʻjaliklarining yer uchastkalaridan samarali foydalanish, qishloq xoʻjalik mahsulotlari ishlab chiqarishni yanada koʻpaytirish, fermerlarning moliyaviy holatini yanada yaxshilash maqsadida ularning yer uchastka hajmlarini maqbullashtirish yuzasidan qoʻshimcha chora-tadbirlar toʻgʻrisida”gi 01-03-13-12-sonli yigʻilish bayoni topshiriqlarining tuman hokimi, tuman prokurori va tuman ichki ishlar boʻlimi boshligʻi hududlarida ijrosi toʻgʻrisida”gi va "Tumandagi fermer xoʻjaliklarining taʼminotchi va xizmat koʻrsatuvchi korxonalar oldidagi kreditorlik qarzlarini toʻliq xatlovdan oʻtkazish va qisqartirish boʻyicha amalga oshirilayotgan ishlar toʻgʻrisida”gi masalalar koʻrib chiqildi.

Kun tartibidagi masalalar boʻyicha tuman qishloq va suv xoʻjaligi boʻlimi boshligʻi, Qoraqalpogʻiston Respublikasi Joʻqorgʻi Kengesi deputati, "Jamaotchilik nazorati” Kengashi aʼzosi, Amudaryo tumanida fermer xoʻjaliklari tasarrufidagi yer maydonlari uchastkalari hajmlarini maqbullashtirish boʻyicha ishchi guruhi rahbari oʻrinbosari A.Yuldashev va tuman iqtisodiyot boʻlimi boshligʻi A.Yusupovlar axborot berdi.

Deputatlar paxtachilik va gʻallachilikka, chorvachilik va bogʻdorchilikka ixtisoslashgan, yer uchastkalaridan, suv va boshqa moddiy-texnika resurslaridan samarali va maqsadli foydalanmagan, kontraktatsiya shartnomalarini bajarmagan, qarzdorligi oshib ketgan fermer xoʻjaliklari bilan yer ijara shartnomalarini bekor qilish boʻyicha takliflarni maʼqulladilar.

Shuningdek, maxsus ishchi guruhga fermer xoʻjaliklarining yer maydonlari uchastkalari hajmlarini maqbullashtirishda, talabgorlarni tanlab olishda xolislik, oshkoralik va ochiqlik tamoyillariga qatʼiy rioya qilish vazifasi yuklatildi.

Sessiyada fermer xoʻjaliklarining debitorlik va kreditorlik qarzlarini kamaytirish hamda toʻlov intizomini mustahkamlash boʻyicha amalga oshirilayotgan ishlar boʻyicha ham axborot berildi.

Muzokaralarda 14-Paxtakor saylov okrugidan deputat, tuman Fermerlar Kengashi raisi, "Jamoatchilik nazorati” Kengashi aʼzosi O.Kurbaniyozov, 4-Doʻstlik saylov okrugidan deputat, tuman Kengashi doimiy komissiyasi raisi M.Kazakov, 12-Arna boʻyi saylov okrugidan deputat, tuman Kengashining Agrar, suv xoʻjaligi masalalari va ekologiya boʻyicha doimiy komissiyasi raisi T.Boboniyozov va boshqalar ishtirok etdilar.

Kun tartibidagi masalalar boʻyicha tegishli qarorlar qabul qilindi.