ENG AZIZ, ENG ULUGʻ KUN ShUKUHI

Mustaqillik. Xalqimiz yuarigadan chuqur joy olgan bu ulugʻ kalomni tilga olish kechagina ham gunoh, ham xato, ham... "jinoyat” sari yetaklovchi yoʻl edi. Bu soʻzni dilidan tiliga chiqarganlarning umrlari zabun boʻldi. Mustaqillik tonglari sari intilganlarning qanotlari qirqildi, qadamlariga oʻt tutashdi. Millatga erk, ozodlik, mustaqillik tilagan dil borki, qatagʻon siyosatining qurbonlariga aylandilar. Bugun esa...

Bugun – bu kalom millat hayotining gultojiga aylandi: davralarning shukuhi, suhbatlarning zavqi, kuy-qoʻshiqlarning dillarni yayratib yuborguvchi ohanglarida Mustaqillik shukronasi! Bu shukronalik tuygʻusi xalq hayotining har bir lahzasini, har bir kunini oʻzgartirib yubordi.

24-yil – tarix uchun kiprik qoqgulik fursat. Lekin mamlakatimiz xalqi uchun erk, ozodlik nasimlari, buyuk evrilishlar, yangilanishlar, oʻzgarishlar mezonlaridan turib baho berilsa, yuksak taraqqiyot yillari boʻldi!

Ona Vatanimizning bir parchasi boʻlgan tumanimiz mehnatkashlarining Istiqlol shodiyonalarida namoyish etilgan, 24-yil ichida erishilgan mislsiz yutuqlar aks etib turgan koʻrgazma bilan tanishgan har qanday odam xalqimiz, farzandlarimiz uchun Mustaqillik bergan buyuk imkoniyatlardan yuksak taraqqiyot bosqichiga kirgan Oʻzbekiston davlatiga havas qilmasligi aslo mumkin emas!

Karnay-surnay sadolari bilan boshlangan 29-avgust kungi tumanimiz xalqining Istiqlol shodiyonalari har bir qalbda eng ulugʻ, eng aziz kunga shukronalik tuygʻusini uygʻotdi. Tumanimizdagi 47 ta fuqarolarning oʻzini-oʻzi boshqarish organlari, fermer xoʻjaliklari hamda tadbirkorlar tomonidan tayyorlangan koʻrgazmaga tashrif buyurgan  bayram ishtirokchilari va el-yurt eʼzozidagi mehnat faxriylari tumanimiz xalqi oʻrtasidagi millatlararo totuvlik, maʼnaviy merosimizga, bobomeros qadriyatlarga beqiyos hurmat va eʼtibordan mamnun boʻldilar.

Koʻrgazmadan joy olgan badiiy hunarmandlik sanʼatining ajoyib namunalari boʻlgan turkman gilamlari, oʻzbek, qozoq, rus, tatar, qoraqalpoq kabi koʻp millatli xalqimiz urf-odatlari, milliy liboslari namoyishi bu shunchaki bayram tadbirininggina emas, balki turli millat vakillarining oʻzaro ahil-inoqligi, totuvligining amaliy ifodasi edi. Ushbu koʻrgazmaga tashrif buyurgan keksa-yu yosh tumanimizda yashab, mehnat qilayotgan turli millat vakillari tomonidan tayyorlangan noz-neʼmatlardan tatib koʻrib, bunday dorilomon, toʻkin-sochin, fayz-u tarovatli damlarga shukronalar aytdilar.

Oʻzbekiston va Qoraqalpogʻiston Respublikasi davlat madhiyalari yangrab, tuman madaniyat va sport ishlari boʻlimi tomonidan tayyorlangan teatrlashtirilgan bayram tantanalari boshlandi.

Tuman hokimi R.Yoʻldoshevning tumanimiz ahliga yoʻllagan bayram tabrigini tuman hokimining birinchi oʻrinbosari B.Yernazarov oʻqib eshittirdi.

Shundan soʻng katta shodiyonalar bilan davom etgan bayram  tantanalarida buyuk tarixiy siymolar – Amir Temur Koʻrogon, Toʻmaris, Mir Alisher Navoiy, Berdaq bobolarimizning daʼvatkor ruhdagi soʻzlari bayram ishtirokchilarini toʻlqinlantirib yubordi.

Maktabgacha taʼlim muassasalari tarbiyalanuvchilari, umumtaʼlim maktablari, akademik litsey hamda kollejlarning oʻquvchilari, ovul va mahalallardagi madaniyat va aholi dam olish maskanlarining badiiy havaskorlik jamoalari tomonidan tayyorlangan bayram dasturlari barchaga xush kayfiyat bagʻishladi.

Istiqlol shodiyonalari – eng aziz, eng ulugʻ kun shukuhi har bir qalbda xalqimiz hayotiga kirib kelayotgan yangilik va oʻzgarishlardan mamnunlik hissini uygʻotdi, bayramona tabrik va tilaklarda farovonlikka, tinchlik va osoyishtalikka shukronalik tuygʻulari aks etib turdi.

Milliy oʻyinlar, urf-odatlar va anʼanalar, maʼnaviy qadriyatlarni oʻz ruhiga singdirgan Istiqlol shodiyonalari tumanimiz xalqi hayotida yana bir nurli kun sifatida muhrlanib qoldi.

Bayram tadbirida Qoraqalpogʻiston Respublikasi Vazirlar Kengashi raisi B.Yangiboyev ishtirok etdi.

Robiya YOʻLDOShEVA.