IShSIZ YoShLAR UChUN MEHNAT YaRMARKASI TAShKIL ETILDI

Yoshlarni munosib ish bilan taʼminlash, ularning bandligini oshirish hamda mehnat bozoridagi mavjud imkoniyatlardan samarali foydalanishini taʼminlash bugungi kunda davlat siyosatining ustuvor yoʻnalishlaridan biri hisoblanadi. Shu maqsadda Amudaryo tumanida navbatdagi Bandlik yarmarkasi tashkil etilib, ishsiz yoshlarni doimiy ish oʻrinlariga yoʻnaltirish, ularning muammo va takliflarini oʻrganish hamda bandlik masalalariga amaliy yechim topishga qaratilgan muhim tadbir oʻtkazildi.

Tuman Madaniyat boʻlimi binosida boʻlib oʻtgan tadbir avvalida ochiq muloqot tashkil etildi. Unda tuman hokimi Sobir Xoʻjametov, respublika ishchi guruhi aʼzolari, hokim oʻrinbosarlari, tegishli tashkilot va idoralar rahbarlari hamda yoshlar ishtirok etdi.

Ochiq muloqot davomida tuman hokimi Sobir Xoʻjametov soʻzga chiqib, mamlakatimizda yoshlarga oid davlat siyosati doirasida ularning bilim olishi, kasb-hunar egallashi, munosib ish bilan taʼminlanishi va tadbirkorlik faoliyatini boshlashi uchun keng imkoniyatlar yaratilayotganini alohida taʼkidladi. Shuningdek, yoshlarning tashabbus va intilishlarini har tomonlama qoʻllab-quvvatlash, ularning muammolarini oʻz vaqtida hal etish hamda bandligini taʼminlash borasida amalga oshirilayotgan tizimli islohotlar haqida soʻz yuritdi.

Muloqot chogʻida yoshlar bilan samimiy fikr almashilib, ularning bandlik, kasb-hunar oʻrganish, tadbirkorlikni yoʻlga qoʻyish hamda oʻz salohiyatini roʻyobga chiqarish borasidagi murojaat va takliflari tinglandi. Bildirilgan masalalar yuzasidan mutasaddi rahbarlarga tegishli topshiriqlar berilib, har bir murojaatni manzilli oʻrganish va amaliy yechim topish yuzasidan vazifalar belgilandi.

Shundan soʻng mehnat yarmarkasi oʻz ishini boshladi. Unda tuman hududida faoliyat yuritayotgan korxona, tashkilot va muassasalar tomonidan taqdim etilgan boʻsh ish oʻrinlari, kasbga tayyorlash va qayta tayyorlash dasturlari, bandlikka koʻmaklashish xizmatlari hamda tadbirkorlikni qoʻllab-quvvatlash boʻyicha mavjud imkoniyatlar ishtirokchilarga taqdim etildi.

Yarmarkada 150 nafardan ortiq ishsiz yoshlar faol qatnashib, oʻz mutaxassisligi, bilim va koʻnikmalariga mos boʻsh ish oʻrinlari bilan tanishdi. Ish beruvchilar bilan bevosita muloqot qilish, mehnat sharoitlari, ish haqi va faoliyat yoʻnalishlari haqida batafsil maʼlumot olish imkoniyatiga ega boʻlgan yoshlar oʻzlarini qiziqtirgan savollarga ham mutaxassislardan javob oldilar. Tadbir yakunlariga koʻra, 22 nafar yoshning bandligi taʼminlanib, ular doimiy ish oʻrinlariga joylashtirildi.

Bugungi kunda yoshlarning bandligini taʼminlash nafaqat ularning daromad manbaini yaratish, balki hayotda oʻz oʻrnini topishi, kasbiy salohiyatini roʻyobga chiqarishi va jamiyat taraqqiyotida faol ishtirok etishi uchun muhim omil hisoblanadi. Shu bois bu kabi mehnat yarmarkalari yoshlar bilan manzilli ishlash, ularning ehtiyoj va qiziqishlarini inobatga olgan holda amaliy yordam koʻrsatishda alohida ahamiyat kasb etmoqda.

Amudaryo tumanida ham yoshlarning bandligini taʼminlash, ularni kasb-hunar egallashga ragʻbatlantirish, tadbirkorlik tashabbuslarini qoʻllab-quvvatlash hamda munosib mehnat faoliyatiga yoʻnaltirish borasidagi tizimli ishlar izchil davom ettirilmoqda.