“Adliya sayli” va “Yoshlar sayli” tadbirlari oʻtkazildi

Bugungi kunda jamiyat taraqqiyoti, avvalo, aholining huquqiy ongi, fuqarolik masʼuliyati va yoshlarning faolligi bilan chambarchas bogʻliq. Shu maʼnoda, Adliya vazirligi tashabbusi bilan tashkil etilgan “Adliya sayli” hamda “Yoshlar sayli” tadbirlari nafaqat huquqiy-maʼrifiy loyiha, balki xalq bilan ochiq muloqot, yoshlarni qoʻllab-quvvatlash va jamiyatda sogʻlom muhitni mustahkamlashga xizmat qiluvchi muhim platformaga aylandi.

Mazkur tadbirlar aholining barcha qatlamlarini qamrab olgani bilan ahamiyatlidir. Ayniqsa, yoshlarning huquqiy bilimini oshirish, ularni Vatanga sadoqat, qonunga hurmat va faol fuqarolik ruhida tarbiyalash masalalariga alohida eʼtibor qaratildi. Tadbir davomida Adliya vazirligi masʼullari hamda tuman hokimi Sobir Xoʻjametov soʻzga chiqib, mamlakatimizda amalga oshirilayotgan huquqiy islohotlar, aholiga yaratilayotgan imkoniyatlar hamda yoshlarning jamiyatdagi oʻrni haqida fikr bildirdi. Shuningdek, fuqarolarning huquqiy madaniyatini yuksaltirish va davlat xizmatlarini xalqchil tizim asosida tashkil etish bugungi kunning ustuvor vazifalaridan biri ekani taʼkidlandi.

Tadbir doirasida oʻtkazilgan “Salomatlik uchun besh ming qadam” ommaviy yurish aktsiyasi sogʻlom turmush tarzini targʻib qilish, aholi oʻrtasida jismoniy faollikni oshirish hamda birdamlik muhitini mustahkamlashga xizmat qildi. Sport musobaqalari esa yoshlarni chiniqish, irodali boʻlish va jamoaviy hamjihatlik ruhida tarbiyalashga qaratilgani bilan eʼtiborga sazovor boʻldi.

Shuningdek, harbiy-vatanparvarlik ruhidagi koʻrgazmali chiqishlar yoshlarda milliy gʻurur va Vatanga muhabbat tuygʻularini yanada kuchaytirdi. Harbiy texnika va maxsus vositalar namoyishi, vatanparvarlik mavzusidagi chiqishlar tadbir ishtirokchilarida katta qiziqish uygʻotdi.

Sayl davomida tashkil etilgan milliy hunarmandchilik, kitob va mahsulotlar yarmarkalari esa milliy qadriyatlarimizni targʻib qilish, yoshlarni kitobxonlikka jalb etish va tadbirkorlik faoliyatini qoʻllab-quvvatlashga xizmat qildi. Koʻrgazmalar hamda madaniy dasturlar tadbirga oʻzgacha ruh va fayz bagʻishladi.

Ayniqsa, fuqarolar murojaatlari yuzasidan tashkil etilgan sayyor qabullar tadbirning eng muhim jihatlaridan biri boʻldi. Mutasaddi tashkilotlar vakillari tomonidan aholining murojaat va takliflari tinglanib, mavjud muammolarni hal etish yuzasidan amaliy yordamlar koʻrsatildi. Bu esa davlat idoralari va xalq oʻrtasidagi ochiq muloqotni mustahkamlashda muhim ahamiyat kasb etdi.

Bugungi globallashuv davrida huquqiy savodxonlikni oshirish, yoshlarni turli yot gʻoyalardan asrash hamda ularning boʻsh vaqtini mazmunli tashkil etish dolzarb vazifalardan biri hisoblanadi. “Adliya sayli” va “Yoshlar sayli” ana shu maqsadlarni amalga oshirishda muhim ijtimoiy loyiha sifatida namoyon boʻldi.

Bir soʻz bilan aytganda, mazkur tadbirlar aholiga huquqiy axborotni yetkazish, davlat xizmatlarini xalqchil va qulay shaklda taqdim etish, yoshlarning jamiyatdagi faolligini oshirish hamda jamiyatda qonunga hurmat ruhini mustahkamlashga xizmat qilmoqda. Eng muhimi, bunday loyihalar inson manfaatlari ustuvor boʻlgan yangi Oʻzbekiston taraqqiyotida muhim oʻrin tutadi.

Charos Arslonova, tuman hokimligining Axborot xizmati rahbari.