SPORT — SOGʻLOM HAYoT VA YuKSAK NATIJALAR GAROVI

Yurtimizda jismoniy tarbiya va sport sohasiga qaratilayotgan eʼtibor tobora kuchayib borayotgani bejiz emas. Yaqinda Prezident Shavkat Mirziyoyev raisligida oʻtkazilgan videoselektor yigʻilishida aynan shu yoʻnalishdagi ustuvor vazifalar, erishilgan yutuqlar hamda dolzarb muammolar atroflicha muhokama qilindi.

Davlatimiz rahbari yigʻilish boshida sportning jamiyat hayotidagi oʻrni va ahamiyatini alohida taʼkidlab, “Sport bu faqat musobaqa emas, balki sogʻlom turmush tarzi, intizom, vatanparvarlik va mamlakat nufuzini namoyon qiladigan katta kuch”, deya eʼtirof etgan edi. Darhaqiqat, bugungi kunda sport nafaqat jismoniy chiniqish vositasi, balki yosh avlodni har tomonlama barkamol etib tarbiyalashning muhim omiliga aylanib bormoqda. Shu maqsadda joylarda ham keng koʻlamli amaliy ishlar olib borilmoqda.

Xususan, Amudaryo tumanida ham aholining sportga boʻlgan qiziqishini oshirish, sogʻlom turmush tarzini targʻib etish maqsadida qator sport musobaqalari tashkil etilmoqda. Tuman miqyosidagi navbatdagi musobaqalar davlat tashkilotlari, korxona va muassasalar xodimlaridan iborat jamoalar oʻrtasida boʻlib oʻtdi.

Yaqinda tumandagi 40-sonli umumtaʼlim maktabining zamonaviy yopiq, sunʼiy qoplamali sport maydonchasida oʻtkazilgan mini futbol musobaqalari fikrimizning dalilidir. Qizgʻin va murosasiz bahslarga boy boʻlgan musobaqalarda tuman hokimligi, maktabgacha va maktab taʼlimi boʻlimi, tibbiyot birlashmasi, madaniyat boʻlimi, sanitariya-epidemiologik osoyishtalik va jamoat salomatligi boʻlimi hamda yoshlar ishlari agentligi tuman boʻlimi jamoalari oʻzlarining sport mahoratini namoyish etdilar.

Taʼkidlash joizki, bugungi kunda mamlakatimizda sport sohasida erishilayotgan yutuqlar eʼtiborga molik. Soʻnggi toʻqqiz yil ichida 1,5 mingdan ortiq mahallalarda 1 774 ta zamonaviy sport maydonchalari bunyod etildi. Bundan tashqari, 200 dan ziyod yirik sport inshootlari barpo etilib, 4 mingga yaqin xususiy sport klublari faoliyat boshladi.

Natijada sport bilan professional shugʻullanayotgan yoshlar soni ikki barobarga oshdi. Olimpiya terma jamoalarimiz tarkibi sezilarli kengayib, paralimpiya yoʻnalishida esa bu koʻrsatkich uch barobarga ortdi.

Yurtimiz sportchilarining xalqaro maydondagi muvaffaqiyatlari esa alohida eʼtirofga loyiq. Birgina oʻtgan yilning oʻzida ular 452 ta oltin, 418 ta kumush va 501 ta bronza medalini qoʻlga kiritib, 50 dan ortiq jahon va Osiyo rekordlarini yangilashga muvaffaq boʻldilar.

Shuningdek, sport sohasiga xususiy sektorni keng jalb etish maqsadida yangi imkoniyatlar yaratilmoqda. Yaqinda qabul qilingan Prezident qaroriga muvofiq, sport federatsiyalariga homiylik qilgan tadbirkorlar boshqaruv tizimida ishtirok etish huquqiga ega boʻladilar. Professional futbol klublarini moliyaviy qoʻllab-quvvatlagan tadbirkorlar esa ularni ishonchli boshqaruv asosida rivojlantirish imkoniyatiga ega boʻlishadi.

Amudaryo tumanida davlat muassasalari xodimlari ishtirokia oʻtkazilgan mini futbol musobaqalari ham aholini sportga faol jalb qilish yoʻlidagi muhim qadam boʻldi. Keskin va murosasiz kechgan uchrashuvlar yakunida tuman tibbiyot birlashmasi jamoasi faxrli birinchi oʻrinni qoʻlga kiritdi. Ushbu musobaqa nafaqat gʻoliblarni aniqladi, balki jamoalar oʻrtasida doʻstlik, hamjihatlik va sogʻlom raqobat muhitini yanada mustahkamladi.

Zero, sport — bu faqatgina musobaqa emas. U sogʻlom jamiyat poydevori, yoshlar tarbiyasi, millat gʻururi va mamlakat nufuzining yorqin ifodasidir. Amudaryo tumanida bu kabi sport musobaqalar yana davom etadi.

Charos Arslonova, tuman hokimligining Axborot xizmati rahbari.