СПОРТ — СОҒЛОМ ҲАЁТ ВА ЮКСАК НАТИЖАЛАР ГАРОВИ

Юртимизда жисмоний тарбия ва спорт соҳасига қаратилаётган эътибор тобора кучайиб бораётгани бежиз эмас. Яқинда Президент Шавкат Мирзиёев раислигида ўтказилган видеоселектор йиғилишида айнан шу йўналишдаги устувор вазифалар, эришилган ютуқлар ҳамда долзарб муаммолар атрофлича муҳокама қилинди.

Давлатимиз раҳбари йиғилиш бошида спортнинг жамият ҳаётидаги ўрни ва аҳамиятини алоҳида таъкидлаб, “Спорт бу фақат мусобақа эмас, балки соғлом турмуш тарзи, интизом, ватанпарварлик ва мамлакат нуфузини намоён қиладиган катта куч”, дея эътироф этган эди. Дарҳақиқат, бугунги кунда спорт нафақат жисмоний чиниқиш воситаси, балки ёш авлодни ҳар томонлама баркамол этиб тарбиялашнинг муҳим омилига айланиб бормоқда. Шу мақсадда жойларда ҳам кенг кўламли амалий ишлар олиб борилмоқда.

Хусусан, Амударё туманида ҳам аҳолининг спортга бўлган қизиқишини ошириш, соғлом турмуш тарзини тарғиб этиш мақсадида қатор спорт мусобақалари ташкил этилмоқда. Туман миқёсидаги навбатдаги мусобақалар давлат ташкилотлари, корхона ва муассасалар ходимларидан иборат жамоалар ўртасида бўлиб ўтди.

Яқинда тумандаги 40-сонли умумтаълим мактабининг замонавий ёпиқ, сунъий қопламали спорт майдончасида ўтказилган мини футбол мусобақалари фикримизнинг далилидир. Қизғин ва муросасиз баҳсларга бой бўлган мусобақаларда туман ҳокимлиги, мактабгача ва мактаб таълими бўлими, тиббиёт бирлашмаси, маданият бўлими, санитария-эпидемиологик осойишталик ва жамоат саломатлиги бўлими ҳамда ёшлар ишлари агентлиги туман бўлими жамоалари ўзларининг спорт маҳоратини намойиш этдилар.

Таъкидлаш жоизки, бугунги кунда мамлакатимизда спорт соҳасида эришилаётган ютуқлар эътиборга молик. Сўнгги тўққиз йил ичида 1,5 мингдан ортиқ маҳаллаларда 1 774 та замонавий спорт майдончалари бунёд этилди. Бундан ташқари, 200 дан зиёд йирик спорт иншоотлари барпо этилиб, 4 мингга яқин хусусий спорт клублари фаолият бошлади.

Натижада спорт билан профессионал шуғулланаётган ёшлар сони икки баробарга ошди. Олимпия терма жамоаларимиз таркиби сезиларли кенгайиб, паралимпия йўналишида эса бу кўрсаткич уч баробарга ортди.

Юртимиз спортчиларининг халқаро майдондаги муваффақиятлари эса алоҳида эътирофга лойиқ. Биргина ўтган йилнинг ўзида улар 452 та олтин, 418 та кумуш ва 501 та бронза медалини қўлга киритиб, 50 дан ортиқ жаҳон ва Осиё рекордларини янгилашга муваффақ бўлдилар.

Шунингдек, спорт соҳасига хусусий секторни кенг жалб этиш мақсадида янги имкониятлар яратилмоқда. Яқинда қабул қилинган Президент қарорига мувофиқ, спорт федерацияларига ҳомийлик қилган тадбиркорлар бошқарув тизимида иштирок этиш ҳуқуқига эга бўладилар. Профессионал футбол клубларини молиявий қўллаб-қувватлаган тадбиркорлар эса уларни ишончли бошқарув асосида ривожлантириш имкониятига эга бўлишади.

Амударё туманида давлат муассасалари ходимлари иштирокиа ўтказилган мини футбол мусобақалари ҳам аҳолини спортга фаол жалб қилиш йўлидаги муҳим қадам бўлди. Кескин ва муросасиз кечган учрашувлар якунида туман тиббиёт бирлашмаси жамоаси фахрли биринчи ўринни қўлга киритди. Ушбу мусобақа нафақат ғолибларни аниқлади, балки жамоалар ўртасида дўстлик, ҳамжиҳатлик ва соғлом рақобат муҳитини янада мустаҳкамлади.

Зеро, спорт — бу фақатгина мусобақа эмас. У соғлом жамият пойдевори, ёшлар тарбияси, миллат ғурури ва мамлакат нуфузининг ёрқин ифодасидир. Амударё туманида бу каби спорт мусобақалар яна давом этади.

Чарос Арслонова, туман ҳокимлигининг Ахборот хизмати раҳбари.