Oʻqituvchilar fidoyi boʻlishgach...
Men uzoq yillar, to nafaqaga chiqqunimcha oʻqituvchi boʻlib ishladim. Bu kasbning zalvorli yukini ham, shon-u sharafini ham yurak-yuragimdan his qilib,qadrlayman. Shu bois, oʻz kasbining fidoyilari boʻlgan yosh oʻqituvchilarni koʻrsam, oʻzimning begʻubor bolalik dunyosiga oshno boʻlib mehnat qilgan davrlarim yodimga tushadi. Maktablarimizda taʼlim-tarbiya ishi uchun jonini fido qilishga tayyor yosh pedagoglar borligidan quvonib ketaman.
Tumanimizdagi 55-sonli umumtaʼlim maktabida mening nevaralarim tahsil olishadi. Nevaralarimning har tong maktabga oshiqib turishlaridan, dars tayyorlashda masʼuliyatni his qilib, oʻquvchilik intizomini mahkam tutishlaridan bilamanki, Davronbek Arikov rahbarligidagi ushbu pedagogik jamoada oʻziga xos tartib-qoida mujassam. Shu bois, maktab oʻqituvchilari oʻz ishiga masʼul, oʻquvchilar esa masʼuliyatli. Eng muhimi, maktab va ota-ona hamkorligi juda yaxshi yoʻlga qoʻyilgan.
Maktabda matematika va informatika fanlarini oʻqitishda esa oʻziga xos tajriba toʻplangan.
2011-yilda oʻzining ilk pedagogik faoliyatini boshlagan informatika fani oʻqituvchisi Rustam Rahmatullayevning har bir darsi oʻquvchilar uchun qiziqarli. Sababi, aynan informatika fani boʻyicha mening nevaram Sohiba Rajabboyeva erishayotgan yutuqlar Rustamjon Rahmatullayevning oʻziga xos uslub yaratishga intilayotganidan yaqqol dalolatdir. Chunki, nevaram Sohiba Rustamjon rahbarligida oʻz tengqurlari orasida juda katta yutuqlarni qoʻlga kiritdi. 2014-yilda informatika fanidan fanlar olimpiadasining Qoraqalpogʻiston Respublikasi bosqichida faxrli 1-oʻrinni egallab, Oʻzbekiston miqyosidagi bosqichda muvaffaqiyatli ishtirok etib qaytdi. Yaqinda esa fanlar olimpiadasining tuman bosqichida Sohiba yana 1-oʻrinni egalladi. Ayni kunda u mazkur bellashuvning Qoraqalpogʻiston Respublikasi bosqichiga tayyorgarlik koʻrmoqda.
Men maktab ota-onalar qoʻmitasining aʼzosi sifatida Rustamjon Rahmatullayevga yosh avlodni mustaqil Vatanga munosib, bilimdon va zukko farzandlar sifatida tarbiyalashdek ezgu ishda katta yutuqlar tilayman hamda oʻz kasbiga fidoyi boʻlgan yosh oʻqituvchilarga minnatdorchilik bildiraman.
Ota-onalar nomidan Orzigul ALLAMOVA.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
